Mizo Idol 2018: Zonet buatsaih Mizo Idol Season 6 chu July 25 aṭang khan ṭan a ni a, District parukah audition neih zawh a ni tawh. District Audition-ah hian second round lut sa te nen mi 78 an tling a, zanin aṭangin Aizawl-ah final audition neih ṭan a ni ve thung ang.
Chhim lamah zaithiam an tam?
District paruk - Champhai, Serchhip, Lunglei, Lawngtlai, Siaha leh Kolasib-ahte audition hi zawhfel a ni tawh a, chhim lamah zai thiam an tam niin result aṭang chuan a lang. Lawngtlai-ah chuan contestant 32 zinga 17 zet an tling a, District Audition-a tling tamna ber an nih rih.
Contestant tamna Lunglei-ah chuan mi 68 zinga mi 15 ten audition an paltlang a, Siaha District-ah pawh contestant 17 zinga pasarihin second round an lut bawk. Heng District pathum aṭang hian Idol 2015-a top 50 (second round lut sa) tel lo pawhin mi 39 zet an tling a ni.
Audition neih hmasak berna Champhai-ah chuan mi 56 inlan zinga 14 ten intihsiak an hmachhawn zui thei dawn a, Serchhip District aṭangin mi 10 an tling bawk. Hetih lai hian contestant 50 awmna Kolasib Audition result kim chang hriat a la ni lo a, zanin hian puan a ni ang. District paruk aṭanga tling zingah hian Idol 2015-a top 50 tling tawh te chu second round lut sah an nih avangin chhiar tel an ni.
Aizawl District aṭangin tel an ṭhahnem
Zanin dar 7:30 aṭang hian final audition neih a ni dawn a, zan sarih a awh dawn. Aizawl District Audition-ah hian mi 344 zet an inlan dawn a, Mizo Idol 2018-a tel zawng zawng zahve chuang zet an ni. Mizo Idol Season 6-a tel tuma hming pe lut zawng zawng hi an vaiin mi 597 an ni.
August 8, Nilai zanah audition hi chunzawm a ni ang a, mi 40 an zai ang. August 9, 10 leh 11 zanah chhunzawm leh a ni ang a, karleh Thawhlehni zanah zawhfel a ni ang.
Mizo Idol 2018 Judge tur te
District Audition neih chhung khan District tinah endik hna thawktu hran ṭheuh ruat an ni a, Aizawl-ah pawh endik hna thawk tur hian mi pathum ruat an ni. Mizo Idol-a hnuhma ṭha tak tak lo hnutchhiah tawh Robin-a leh Rinzauva Sailo te kan hmu leh dawn a, Feli Thangluah a ṭhu dawn bawk. Rimawi khawvela hriat hlawh tak tak ten endik hna an thawk tur hi entu mipui lam tan pawh thu lawmawm tak a ni ngei ang.
Chutih rual chuan Feli Tangluah hi a tawp thleng a inlan dawm em a la chaing lo a, Rinzauva leh Robin-a te erawh Mizo Idol tihlutu an ni tluan leh dawn thung. -Vanglaini
Post a Comment