PRISM Election Symbol LunghluPRISM party chuan nimin khan an pisaah Election Commission of India (ECI)-in PRISM a pawm lawmna leh an election symbol tlangzarhna hun an hmang a, an election symbol chu lunghlu (diamond) lem a ni. Symbol tlangzarhtu, PRISM president Vanlalruata chuan, mi dik lo leh ram tana ṭha lote an phûm bo dawn niin a sawi.

Vanlalruata chuan, kum 2008 MLA inthlanpui dáwnah MLA ni tlak lo list an siam a, political party-te an pe tih sawiin, "Khami aṭang khan mi 

ṭha lo tam tak politics aṭangin phûm bo an ni. Kumin 2018 MLA Inthlanpui aṭang hian mi dik lo leh ṭha lo tam tak kan ram politics aṭangin tho chhuak leh ngai tawh lo turin kan phûm bo dawn a ni,” a ti.





PRISM President chuan, Mi­zorama inthlan kalpui dan siamṭhat chu an hnapui pakhat tur a ni tih sawiin, "Thil dik lo hi kan hmaa MLA inthlanpui aṭang hian kan siamṭha vek dawn. MLA candidate ni turte dik taka nomination file turin ka chah lâwk a ni," a ti a; thuneitute pawh inzir a, dik taka dan kengkawh ngam turin an ngen lâwk tih a sawi.

ECI chuan Representation of the People Act, 1951 Section 29A hmangin PRISM chu India rama political party angin July 27, 2018-ah a pawm a; an registration no. chu 56/374/2017-18/PPS-I a ni. - Vanglaini

Post a comment

Powered by Blogger.