RUALPUI LOH 'D' - MIZO STORY NGAIHNAWM LUTUK - TIMES OF MIZORAM

Breaking

Home Top Ad

Post Top Ad

RUALPUI LOH 'D' - MIZO STORY NGAIHNAWM LUTUK

RUALPUI LOH 'D'
( I'm not a lone, but i'm lonely without you)

By- ZeT KhAwLhRinG

MIZO STORY NGAIHNAWM LUTUKBoys hotel a kan roomah chuan kan thian panga chu kan thu bial laih a, signature um kan in chhawp ve ran a, a seh hmeh atan arsa hem hmin kan inchhawp bawk a, tîtî pah chuan kan lem leh zauh zauh thin a, tlangval Rama chu guiter perhin a lo zai vâng vâng a, kan zawm ve pah reng bawk a. Kan zirlai course zo a, a tuk lawk a, mahni pianna ram lam pan tur kan ni bawk a, thawm pawh kan dim vak lem lova, kan lu pawh a kai tha ve viau tawh a, tawng kan inchuh nak nak tan a, awkî pawh a sang tan kher mai. Kan warden in min hau lem lova, min hau pawh nise, kan zawm chuangin ka ring lo.

Mite angin phai lamah awm rei lo mahila, han haw dawn meuh chuan, 'Aw Zoram min nghilh bik suh ang che..... Mi ramah zawng lunglen a nâ e, lâm ang lo let ka nuam e. ' tih te Laltanpuia Tochhawng hla 'Ka lo haw thuai dawn' tih te chu rui lungpûam nen mittui parawl teuhin kan han sa a. A hnu deuhah a mal te te in hla sak tur kan thlang a, kan thlan chhan kan sawi pah zel bawk a.

Thianpa Siama mi lungleng thlan hun a thleng a. 'RUALPUI LOH DI' chu a rawn thlang a, a kai tha tawh deuh bawk nen a kutzungchal nen meuh a tang kawp chuan ding meuhin, "Ka thlan chhan ka sawi dawn" a ti a, a ding bu lâk lâk bawk a, ti hian a thlan chhan chu a sawi a.

He hla ka ngaihthlak apiang hian fam min chan san ta ka thianpa ka hrechhuak thin, he hla hi a duhin a ngaithla ngun em em a, a ning thei lo a ni ber mai. YMA conference kan kal tumin tleirawl tê hi a tawng a, hmeltha a tiin a duh em em bawk a, ani pawh chuan a duh ve em em bawk a, ka thianpa hi nupui fanau nei tawh a ni a, a dinhmun chu tlang takin a hrilh a, tleirawltê-i chuan a hnar phal bik lo, an pahnih inkara hmangaihna lo piang chu an duh thu a timit leh mai turin chakna an nei bik lova, thil theih lah a ni hek lo. Chu hun reilote chu thianghlim tak siin âm takin an hmang a, theih chu nise van laizawl a ni leh thla te pawh chu her liam mai lova chelh din an duh ngei ang. Chutiang thil erawh khuanu remruat danah tih theih a ni silo.

Inkhawmpui tiak zan alo thleng a, hlim taka hun hmangin chu khawvar tur in hmangaih tharte tana thenna ni kawla lo her chhuak tur chu huphurh tak chuan an thlir a. Chu nî; khawchhak lam atanga lo chhuak tur sahuai pawhin a a lo dan theih bik tawh loh tun thlenga hnuai lam bih a, a en duh miah loh chu chhuak lo tura dan han tum chi ziazang a ni si lo. Hreh tak chung chuan an in mangtha ta a.

Mahni khaw lam an thlen ve ve hnu pawh chuan phone hmang tein an lunglen thu chu infah mawlh mawlhin an inhnem tawn thin a, hetih chhung zawng hian ka thianpa hi a inthiam thei ngai lo, a nupui fanau te a hmangaih em em a, a tawn thar dî chu a hmangaih bawk a, an vaia run hmun len za lah chu a rem si lo.

A zan mu chu muhil thei lovin a in let a in let a, a nupui leh a fate an pa kianga thlamuang taka an muhil suk suk chu a en a, a ngaihtuahna pawh a vak thui kher mai, an nu chu then ta ang se, an hmeithai tur leh afate fahrah an ni mai tur chu a ngaihtuah pawh a ngaihtuah chhunzawm ngam lo. . . . Tleirawlte-i nena an intawn dante chu a chhui kir a, nupui fanau nei lova la tlangval chu nise, tûma tih buai lovin zalên takin, hlim takin an leng dun thei ang tih te a ngaihtuah a, hmangaihin la thlahlel viau mahse leng dang chhaina khua a tlai hmain a hmangaih luat vangin inthen mai chu tha zawkin a hria a, thuthlukna harsa tak chu siam turin a rilru chu a siam fel ta a.

A bialnu rawn zin chu sumo counter-ah a lo hmuak a, hlim takin an in chibai a, an hlimna chuan rei a daih dawn lo tih chu a hrechiang khawp mai, a châm chhung chuan hlim takin an inkawm a, a haw ni hma chiah hian an inkar thu chu an sawi fel ta a, an pahnih chuan an mittui a tla zung zung a, inthen chu harsa an ti a ni, mahse, khuanu'n lengdun turin an tan a ruat ve silo, chu thil chu lungawilo mahse lungawi taka an pawm thiam a ngai ta zawk si a, ui tak chungin hun tha zawk hmun tha zawka in tawn leh beiseiin an in mangtha ta a.

Ka thianpa hi ka chhuang tak zet a ni, a nupui fanaute a hmangaih em em a, a bialnu a hmangaih zia leh a duhsak lutuk te hi a ropui ka ti, he hla hi chu ka thianpa tana phuah liau liau ni in ka hria. A kum leh mai chuan ka thianpa chu natna in tlak buakin a hriselna a pan zel a, naupang têin min boral san ta a ni." a ti a.

A hla thu hi ka'n tarlang ve hrim hrim teh ang. H Lalthakima sak ka hriat a ni a, a phuahtu erawh ka hre mai lo.

1.Dar ang kan intawn a tlai lua, chhingkhual a di mampui.
Engvangnge ni lenlai rual lova chung khuanu leng pawh hian min lo duan le.

Kei rual û zawk pawh min sel lova, hmangaihna chhingmit ngeia min thlir thin tu.
I pian a tlai a pawi em mai mampui.
Ka chhuihthangval nun hlui min ngaih tirtu lo ni che.

2.Theihse hun leh ni zamual liam hnu auh kir leh hi ka nuam e.
Ka vanglai hun liam tawh hnu te kha au kir leh ila
hlimte'n kan leng dun tur.

3.Ui chung zelin mangtha le, lengdang i chhai nan khua.
I tlai a nge aw ka bawih mampui.
Chung khuanu lengin damte'n a hual ang che.

He hla kan sak zawh hian thianpa Siama a room lam pan tur chu MAPHASY hlain kan thlah a, a mut hnuah Laltanpuia Tochhawng hla kan sa leh chu a rawn tek phei leh rang khawp mai. Reubena hla thlan te, Chhuana hla thlan te, tlangval Rama hla thlan te, thianpa Pu Thuama lâichhuatpui rem te pawh tarlan a châkawm viau a, heti chinah hian duh tawk rih mai teh ang. Nangni nen hian kan zai ho leh a ngem le!

" Kan hlimnite chuan koh kir ruallohin mual min liam san ta a,

Kum a thar anga thinghnahte an rawn chawr no tha leh anga,

Fartuah leh Vau te pawh mawi takin an rawn par vul leh ang,

Mahse, keini zawng kan sulhnu te'n khuarei an chang tawh anga,

Tlei dang leng ten tualchâi nan an rawn hmang ve tawh ang.

Chutih hunah chuan kan intawng leh a nih ngai chuan NUNHLUI NGAIH LEH LUNGLEN kan hril za tawh zawk ngei ang."

September 24th, 2013
9:00 p.m

No comments:

Post a Comment

Post Bottom Ad