Mizoram Politics: Ni 10.08.2018 khan MNF Vice President Dr.R.Lalthangliana chuan Muallianpuia, Pu C.Sanglinga In-ah Congress party mi 8-te chu MNF-ah a lawmlut. Ni 11.08.2018 hian RD.Rest House S.Vanlaiphai-ah Public meeting neih leh a ni a, Congress -37, -ZNP- 28, Neutral- 4,Total- 69-te chu MNF-ah a lawmlut leh bawk. Hengahte Pu Thangtea chuan thusawiin, "Pathian leh mipui zarah Mizoram inthlanpui lo awm turah hian MNF kan sorkar ngei dawn a. India ram bung hrang hrang 40 dawn awmah Congress party chu Punjab leh Mizoramah chiah an sorkar ta a, Central-ah nasa taka tlain State dangah pawh hnawl zel an la ni.
Congress party kalphung chu Indira Gandhi hun lai atang tawhin mihausa an hausa tual tual a, mirethei kan rethei tial tial a, he principle hi an kalphung reh thei lo a ni. Miretheite retheihna hmanga suma inleitlin leh ringawt hi an kal phung chu a ni. Tunah chuan inthlanpuiah pawh Central lamah Prime Minister emaw, Minister-te campaign-pui tura koh tur an nei tawh lo. Kan sorkar ang a, Mizorama la awm ngai lo, Decentralisation of power and function kan kalpui dawn a. The Mizoram Local Self Government Act, 2019 (Zoram thar dinna tura Dan ruangam) chu Assembly Session hmasa berah kan pass dawn a ni," a ti.
Dr.Thangtea chuan, "Local Government Committee-ten an khawtlang mamawhte chu District Level-ah an thlen ang a, chu chu State Level-ah an thlen leh ang. Khawtlang mamawh hrang hrang- School te, Community Hall-te, Side Drain leh Step te, Culvert te, Zunin siam te, kawnglaihte leh thil dang dang pawh tualchhung sorkarin an thawk tawh ang a, corruption leh sum pelhe tam tak a bo phah ang a, langtlang takin tih a ni tawh dawn a. Minister leh MLA-te thuneihna pawh a tlem phah ang. Democracy tih avanga thuneihna pawngsual tam tak hi a bo phah bawk ang. Hei hian Zoramthar hmel min hmuhtir dawn a ni," a ti.
MNF Vice President chuan, "Congress-ho hian NLUP hi budget atangin party induhsakna uchuak tak hmangin an sem a, MLA pawh ni pha lo, bial ruk(6)ah party worker-te pek turin an thlang a, chu chu Social Activist Pi Vanramchhuangin diklo tiin High Court-ah a khing a, Court chuan thutlingah pawmin kar li chhung atan a stay a, hei pawh hi Congress-ho chuan MNF-ten kan tihah an puh leh daih a, kan tih ni hauh si lo hi min la rawn puh dawn chauh a ni, dawt muhlum sawia mipui bum hi pawi tihna chhete mah an nei lo," a ti bawk.
Hnathial Government College Principal kal chhuak ta Pu Vanlalhnema pawhin thusawiin, "MNF chu Mizo Nationalism-a innghat a ni a, Mizo kan awm chhung chuan MNF a ral lo ang. Regional Party hi chu Vai party pawhin an hlau bik a, anmahnia innghat Congress-te chu Vai hoin an hlau ve lo. Congress Minister-te hian Mizo Hnam pum ai an awhzo lo a, Congress party ai chauh an awh a ni. Pathian nung hming lam reng siin, Chal an hnawih sen a, Kohhran hian haw hle tura ka ngaih laiin an la haw nep ka ti," a ti bawk. - Press Release
Post a Comment