Nimin chawhma dar 11-12 inkar khan Mizoram leh Manipur inrina lui, Tuiruangah lawng a chesual a, mi pali an thia hriat a ni a, mi pakhat ruang hmuh a ni tawh.
Sakawrdai YMA hruaitute hnen aṭanga Vanglaini thu dawn danin, Sakawrdai khaw mite chu an khua aṭanga km. 20 vela hlá Tuiruang leh a chhehvela Sakawrdai ramah lo an nei a; feh tur hian an khua aṭangin lirthei hmangin an kal a, Tuiruang aṭangin lawngin lo an pan leh ṭhin.
Nimin khan feh tura kal mi 20 vel chuanna lawng chu a chesual a, mi pali chu chin hriat lohin an awm zui a, mi dang zawng chu hmuh chhuah an ni tawh. Hun eng emaw chen tui tlate zawn an nih hnuah PWD SA Lalpawlliana ruang hmuh a ni a, he thu ziah lai thleng hian mi dang pathum hmuh an la ni lo.
Tuia tla la hmuh lohte chu - Lalchhandami, J Hranglura leh Lalroliana te an ni. Tuia tla mi palite hi Sakawrdai khua vek an nih bakah, kum 40-50 inkar vel an ni.
Zawhna chhangin Sakawrdai YMA hruaitute chuan, tuitla zawn dan tur mumal taka siamin zawn nghal a nih thu a sawi a, "Zawn hmuh an nih hma chuan zawn hna hi thawh a ni ang. Khaw ṭhenawm aṭang pawhin tuitla zawng tur hian an rawn thawk chhuak a ni," an ti.
-Vanglaini
-Vanglaini
Post a Comment