Board of Control for Cricket in India (BCCI)- in Cricket Association of Mizoram (CAM) la luta permanent member nihna a pek hnuah vawiin khan a vawi khatna atan BCCI chuan Regency Hotel, Aizawl ah programme pawimawh tak Seminar on Anti Doping and Anti Corruption chu CAM nena tangkawpin an buatsaih a. Hetah hian CAM President, Mizoram Chief Minister Pu Lal Thanhawla chu khuallian niin hawnna hun a hmanpui a ni.
Pu Lal Thanhawla chuan kum tam tak hnuah Mizoram Cricket Association chu BCCI member ah a tel ve thei ta a, ram chhung hmun hrang hrangah BCCI buatsaih tournament-ah Mizo thalaite an tel thei tawh dawn hi thil lawmawm leh ropui tak a ni tih sawiin Mizoram cricketer te lakah beiseina sang tak kan nei a ni, a ti. Infiammi thenkhatin rilru thalo tak puin mahni intihchakna turin damdawi an hmang ru thin a, hei hi sportsman spirit nen a inkalh tlat a, midang bum an tumnaah mahni an inbum a ni, a ti a. Anmahni leh Mizoram an tihmualpho loh nan fimkhur turin Chief Minister chuan cricketer te a chah a, tum reng vang ni hauh lova hriatloh avanga doping test paltlang lo an awm thin tiin ei leh in, hritlang damdawi emaw pumna damdawi emaw an ei thlenga fimkhur tur leh an thil eiah danin a phal loh, doping test-a an tlak phah theihna tur thil a tel em tih hre chiang turin a chah. Mizo thalai tam takin eizawn nan football an hmang tawh a, a aia tha zawk cricket chu Mizo thalaiten eizawnnan leh hausakpui nan an hman theih a beisei thu Chief Minister chuan a sawi a ni.
Cricket Association of Mizoram chu BCCI member a nih tak avangin Mizoram team te chu India ram hmun hrang hranga cricket inelnaah an tel thei tawh dawn a. Damdawi hman phalloh doping chungchang leh cricket a diklo taka mi bum tumna corruption chungchang zirtirna Anti Doping and Anti Corruption seminar chu BCCI hian a vawikhatna atan Mizoram cricket players te tan a buatsaih a ni. BCCI atang hian Anti Corruption Unit Integrity Manager Anshuman Upadhyay leh Anti Doping, Age Verification & Medical Consultant Dr Abhijit Salvi an lo kal a. Anni pahnih hian vawiin nilengin Cricket Association of Mizoram hruaitute leh players te an zirtir a ni. -DIPR
Post a Comment