ICFAI MIZORAM UNIVERSITY-AH TRI-NATIONAL CONFERENCE - TIMES OF MIZORAM

Breaking

Home Top Ad

Post Top Ad

ICFAI MIZORAM UNIVERSITY-AH TRI-NATIONAL CONFERENCE

ICFAI MIZORAM UNIVERSITYTri-National Conference of India, Bangladesh and Myanmar on Regional Cooperation through Mizoram’ tih chu vawiin khan ICFAI University, Mizoram-ah Department of Political Science, ICFAI University Mizoram leh Planning & Programme Implementation Department, Government of Mizoram tangkawp chuan an buatsaih a. Mizoram Governor Pu Kummanam Rajasekharan chu Khuallian niin he Conference hi a hmanpui a ni. 

Pu Kummanam Rajasekharan chuan hmarchhak bial chu India mai bakah Asia chhima ramte tan hmun pawimawh tak a luah thu sawiin, ei leh bar, eizawnna siam, industry din chungchangah leh hmasawnna hrim hrima ramdangte a la phak loh thu a sawi a. Kum 1990-a India economy siam tha tura hmalaknate chuan a nghawng phak lova a hriat thu te sawiin, helai ramte tihmasawn tura ngaihtuahna thar kan sen a ngai a ni, a ti. Tri-National Conference chuan ram insumdawntawnna, ram venhim leh ruihhlo tawlh chungchangah sawihona remchang a siam tur thu a sawi a. Hnamzia thila thenawm ramte nen inzawmna tam tak a awm thu sawiin, hnamzia pholang thei zawnga hmalaknate chuan inlaichinna tha zawk a siam tur thu a sawi a ni. Conference-a an thil sawiho te chuan thawhhona tha nei tura thutlukna leh ngaihtuahna thar a neih tir a rin thu a sawi bawk a ni. 

Khulzahawm Pu Lalsawta, Planning & Programme Implementation Department Minister pawhin Conference chuan ram pathumte inkara thawhhona tha nei thei tura remchanna a siam theih a rin thu a sawi a. Ram a ralmuan chauhin hmasawnna hna a thawh theih a ni tiin, thenawm ramte nena inrem taka khawsak a pawimawh thu a sawi a ni. Remna hnuaia insumdawntawnna te chuan hmarchhak bial tan thatna a thlen tur thu sawiin, he conference hian mahni ngaihdan sawichhuana remchang a siam dawn a ni, a ti bawk.

India Ambassador hlui, Pu Gautam Mukhopadhyaya chuan India hmarchhak biala ramte, a bikin Mizoram pawimawhnate a sawi a. Zirna in, damlo inenkawlna, Information and Communication Technology tihchangtlung te, cultural exchange buatsaih te, tourism, food processing, thing leh mau humhalh leh inkawlpawhna siam that te chu Mizoram dinchhuahna tur a nih thu a sawi a ni. Dr. Shah Mohammad Tanvir Monsur, Asst. High Commissioner of Bangladesh to India pawhin inkalpawhna tha leh zirna in te tihchangtlun a rawt a ni.  

Lt. Gen. AK Misra, AVSM, ICFAI University Mizoram Vice Chancellor chuan inlawmna thu sawiin, University hmalakna leh a hlawhtlinna hrang hrangte a tarlang nghal a ni. Trade & Investment leh Culture & Politics tih thupuite hmangin panel discussion neih a ni bawk. 

Post Bottom Ad