Aizawl- International Spinal Injury Society [ISCoS] chu nimin Khawvel pum huap Spinal Cord Injury Day khan Vanapa hall kawtah inhmuhkhawmin hun an hmang a. An President Lalnunpuia Rivung chuan an pawlah member za vel an awm mek a, an la in zawng chhuak mek zel a ni'' a ti.
An pawl chuan Whatsapp group 2 an nei a 'Life with wheel chair' leh 'Spinal cord Injury Society' bakah face book group 'Spinal Cord Injury Support Mizoram' an nei tih a sawi a, Social media kaltlang in an natna inenkawl dante an in hrilh tawn a, nitin an in kawm a, depression nei tan tel a tha hle bakah fiamthute thawhin an nun a ti hlim hle tih a sawi bawk.
Spinal Cord Injury Society of Mizoram leh Spinal Cord Injury Support Mizoram founder Dave Chhakhhuak, Gaithersburg USA a awm mek chuan Video conference hmanga a member puite bia in 'Spinal Cord Injury Society of Mizoram hi kum thum kalta khan an din a ni tawh a, mahse a function hleithei lova, tunah chuan chak takin a kal chhoh tawh a beisei a a ti a.
Pu Dave Chhakchhuak chuan Spinal injury chu hri ang a nilova, tihdam mai theih a nih bawk loh a vangin in enkawl fimkhur a ngai a, a enkawltu a zirin a nun a hlimin a rei thei bawk mahse an rilru a pawimawh ber a ti. SCI vang in nupa inthenna a tam hle a, natna zawngah chuan kawppuite kalsan an tam berin a rinawm, a ti a, ram chhunga sci vanga natna hreawm tak tuarte zawn chhuah a, theih dan dan a in puih tawn chu an pawl thil tum ber a ni a sum a in tanpui hi a pawimawh em em ang bawkin natna leh a enkawldan in hrilh pawh a pawimawh hle a ni a ti.
Spinal cord injury vanga damdawin pan ngaite hi sawrkarin credit facility a pekte zingah an tel lova harsatna an neih phah thu dawn a ni a. Mizo Neurologist an awm lova, Rehabilitation center mumal tak pawh Mizoramin a neilo a, Tuna MIMER damdawinah hian physical, occupational therapy pekna turte ruahmannaah a tel tih an sawi a ni. -AIR News
Post a Comment