Mizoram Sawrkarin Lalremsiami Nuai 10 Pe - TIMES OF MIZORAM

Post Top Ad

19 Sep 2018

Mizoram Sawrkarin Lalremsiami Nuai 10 Pe

Mizoram sorkarin Rs 10,00,000 leh in luah tur a pe


September 19, 2018 (nilaini)-ah Hockey Mizoram chuan Aizawl Press Club-ah chanchinbu mite kawmin, Mizoram sorkarin Asian Games 2018 hmeichhe hockey atanga silver medal latu Lalremsiami hnenah Rs nuai 10 an pe tih an puang.

Kolasib tleirawl tan hian Falkland RAY Project – Housing hnuaiah 'Individual Housing Unit' pakhat an dah bawk a, sorkar hmalaknaah Hockey Mizoram an lawm hle.

Pu Lalfamkima, Kolasib College Veng chuan Siami hlawhtlinna avangin a nu leh pate hnenah lawmpuina Rs 20,000 a hlan a, player panga ve vein hockey an khelh theihna tur ram a thlawnin Hockey Mizoram hnenah a pe tel. Sorkar tanpuinaa tihpuitlin an inbeisei a, Lalremsiami Hockey Ground tih a phuah nghal.

Olympics tih lova khawvela infiamna hunpui lian ber Asian Games-ah kum 18 mi Siami hi Mizo zinga medal la hmasa ber a nih bakah, silver medal awrh hmasa ber a ni.

August 6 atanga September 18, 2018 chhungin Indonesia-in Asiad vawi 18-na a thleng. Hmeichhe hockey final-ah India-in 1-2 in Japan hneh lo mah se kum 20 chhunga India hmeichhe team-in final a luh leh hmasak ber a ni.

Mizo awm chhun Siami hi team tan player pawimawh a ni phak a, forward thawh hlawk leh hun kal zela India innghahna ber ni thei turin an beisei.

Mizoram sorkarin Sports Incentive Cash Award pek dan a kalpui mekah Asian Games mi mal inelna huanga silver medal late hnenah Rs nuai 4 pek tur a ni a, Siami hi team-a tel a nih avangin Rs nuai 4 aia tlem dawng tur a ni.

(He dan hi July 21, 2008 khan Sports and Youth Services Department chuan a tichhuak a, tun thlengin siam that a la ni lo niin official-ten an sawi.)

Mizoram sorkarin Rs nuai 10 a pe hi a phak tawkah duhsakna sang tak a ni tih a lang a, NEC, Shillong chuan Rs nuai 5 an pe bawk.

Central Sports Ministry-in Sports Incentive Cash Award a kalpui mekah India hmeichhe hockey team-in Rs nuai 100 an dawng thei a, squad chhunga player 32-in a inzat theuha an insem tur a ni thung.

Chutih rualin mi mal inelnaa silver lain Rs nuai 20 an la dawn a, hemi zahve aia tlem hi team-a silver laten an dawng thei dawn lo tih danah a awm tel. Chuvangin Siami hian Central Sports Ministry atangin Rs nuai 10 a dawng thei ang.

NIHLAWH BIK AN AWM

India ram chhunga state hrang hrangin ram tana infiammi hlawhtlingte sum an pek dan a inang lo nasa hle. Sorkarin sum a pek danah Haryana chhunga cheng infiammite aia nihlawh an awm lo va, khawvelah pawh a ber ang hiala sawi an ni.

HARYANA : Haryana hian an state atanga Asian Games gold medal latu Neeraj Chopra (javelin),Amit Panghal (boxing), Bajrang Punia (wrestling) leh Vinesh Phogat (wrestling) te hnenah Rs vaibelchhe 3 theuh an pe. Shooter Lakshya Sheoran chuan silver a la a, Rs vaibelchhe 1.5 a dawng phak.

ODISHA : Asian Games zo taa India state hrang hrang zinga an state infiammite tana pawk ber chu Odisha an ni a tihtheih. Sorkarin dan a neih saah gold - Rs nuai 40, silver - Rs nuai 25, bronze - Rs nuai 12.5 a ni.

Mahse, Odhisa hian hmeichhia 100m leh 200m-a pahnihna ni ve ve Dutee Chand-i hnenah Rs vaibelchhe 3 an hlan a, silver medal pakhatah Rs vaibelchhe 1.5 an seng ngam. Tokyo Olympics 2020 atana a inbuatsaihna tur zawng zawng an tumsak bawk ang.

Chu mai ni lovin hmeichhe hockey team-ah an state player pali an awm a, Rs vaibelchhe 1 theuh an pe a, Mizo nula Siami aiin an dawng tam deuh hlek.

DELHI : Asian Games a zawh hnuah Chief Minister Arvind Kejriwal chuan Delhi atanga gold latuten Rs vaibelchhe 1, silver-in Rs nuai 75 leh bronze-in Rs nuai 50 an dawng ang tih a puang a, India tana medal la thei infiammi 11 an kawl.

MADHYA PRADESH : Madhya Pradesh-in Mizoram ang thovin Asian Games 2018-ah medal la thei infiammi pakhat an nei. Archery-ah India hmeichhe compound team zingah Muskan Kirar a tel a, silver medal a awrh a, sorkarin Rs nuai 75 an pe.

TAMIL NADU : 4x400m mixed relay team-ah Arokia Rajiv a tel a, pahnihna an ni. Tamil Nadu Chief Minister K Palaniswami chuan Rs nuai 30 pek a nih tur thu a puang. Ani bakah hian an state atanga bronze medal dawngtu mi pangain Rs nuai 20 theuh an dawng bawk.

WEST BENGAL : Rickshaw nawr chi hmanga eizawng fanu Swapna Barman chuan India-in gold a lak ngai lohna heptathlon-ah hnehna a chang a, gold medal rau rauah ngaihhlut a hlawh. Mahse, West Bengal sorkarin Rs nuai 10 an pe a, ei a zawn zui zel theih nan sorkar hna nghet erawh an pe tel. Mahse, sorkar chet dan an dem.

UTTAR PRADESH : Athletic huang atangin kum 32 mi Sudha Singh chu 3000m steeplechase-ah pahnihna a ni a, Uttar Pradesh sorkarin Rs nuai 30 bakah gazetted officer hna an pe. 10m Air Pistol-a gold medal latu Saurabh Chaudhary chuan Rs nuai 50 a dawng ve thung.

Hockey player LalremsiamiPUNJAB : Punjab state sorkar an pawk vak lo va, an kalphungah Asiad gold medal latute hnenah Rs nuai 26 an pe thin a, an tipung maithei tih thawm a awm. Medal la infiammi 20 an nei.

MIZORAM : July 21, 2008 atangin Mizoram sorkar hnuaiah Asian Games mi mal inelna huanga gold medal latuin Rs nuai 8, silver-ah nuai 4 leh bronze-ah nuai 2 an dawng thei. Mahse, he dan kalpui a nih hnua medal la hmasa ber Siami'n sorkar tiam sa aia tam fe Rs nuai 10 a hui dawn.

Thlalak :
Lalremsiami te in, Kolasib College Veng (Sports and Youth Services Department thlalak)
India hockey player Lalremsiami

Thang Khuma T-a

No comments:

Post a Comment

Post Bottom Ad