Pu Laltlanzova Khiangte Aizawl North-II MNF Official Candidate Chanchin Tlangpui

Pu Laltlanzova Khiangte  Pu Kapchhunga Khiangte (MPS Rtd) leh Pi Lalrimawii te fapa panga zinga upa ber dawttu niin, December 20, 1978 khan Aizawl Civil Hospital-ah a lo piang a. Ramhlun South, Aizawl-ah a seilian a. A nu leh pate pawhin la dampuiin, Ramhlun South-ah hian a unaute nen an la chengho vek a ni.

Chhungkua.
Kum 2014 khan Dr. Ruth Vanlalhmangaihi Ralte D/o Lalrinmawia (LRM), Ramhlun South nen an innei a. Fanu 1 leh fapa 1 an nei tawh a. Tunah hian Ramhlun South-ah an chhungkuain an cheng mek a ni.


Kohhran rawngbawlna

Kristian chhungkuaa seilian, Kohhran rawngbawlna lama tui mi tak a ni a. Zaipawl lamahte pawh inhmang thinin, a tlangval laiin Leprosy Mission Choir-ahte pawh a lo tel ve tawh a. Tunah hian Ramhlun Presbyterian Kohhran-ah rawngbawltu niin, Puitling Sunday School zirtirtu ni lai mek a ni.

Zirna lam

Pu Laltlanzova Khiangte hi zirna lamah chuan M.A. (History) a ni a. Ramthar Veng Primary School-I (Pi Kimi School), Champhai Govt. Middle School, Ramhlun Middle School, Hrangchhuana High School, Saiha Govt. HSS, Hrangbana College leh Ahmednagar College-ahte lehkha a zir thin a ni.

Eizawnna

Journalism leh literature lama tui mi a ni a. Hun engemawchen journalism a luh chilh a. Vanglaini chanchinbuah hun engemawchen a thawk a. Chumi hnuah amahin naupang chanchinbu, Mizo Kids-te a tichhuak thin a. Hemi rual hian naupang lehkhabu, 'Beramno' a tichhuak thin bawk a. Naupang chhiar tur chi lehkhabu engemawzat letlingin, a tichhuak tawh bawk a ni. Heng naupang chanchinbute leh a lehkhabu lehlinte pawh hian hriat a hlawh ve thin hle.


Ram rawngbawlna

Ram leh khawtlang hmasawnna vei mi a ni a. Chanchinbu hrang hrangah article-te a ziak thin a. Pawl chi hrang hrangahte a inhman kual hnuin kum 2015 November thlaa Aizawl Municipal Corporation (AMC) inthlanah MNF official candidate niin, hneh taka thlan tlin a ni a. Heta tang hian mipui leh khawtlang rawngbawl turin a inpe pumhlum ta a ni.

Ram leh khawtlang hmasawnna vei mi tak a nih avangin Journalist a nih lai atang pawhin ram hmasawnna tur zirin India ram state dangahte a lo feh chhuak tawh thin a. AMC Councillor a nih hnuah pawh India ram leh India ram pawn thlengin ram hmasawnna turte zirin a feh chhuak ngun hle a. Ram leh mipui hmasawnna atana inzir belh zel leh, mipui tana rawngbawl hi a thupui ber a ni.

MNF party chuan Pu Laltlanzova Khiangte hi AMC-a a hnathawhah te, a bial mipuite tana a inpeknaahte ram leh mipui rawngbawl zel tlak, mi rinawm, taima leh viak tha tak niin a hria a. Kum 2018-a Mizoram inthlanpui lo awm turah Aizawl North-II a MNF official candidate turin a lo thlang ta a ni. ~ Ramtea Chhangte

Post a Comment

0 Comments