REIEK AIENG PROCESSING UNIT - MIZORAM - TIMES OF MIZORAM

Breaking

Home Top Ad

Post Top Ad

REIEK AIENG PROCESSING UNIT - MIZORAM

FINANCE MINISTER-IN REIEK-AH AIENG PROCESSING UNIT LUNGPHUM A PHUM
mizoram chanchinthar

Mission for Organic Value Chain Development (MOVCD-NER) kaltlanga hmalakna chi khat Mission Organic Mizoram (MOM) hnuaia Reiek Block Turmeric Growers’ Society Processing Unit thar tur lungphum chu nimin September ni 27, 2018 khan Finance Minister Pu Lalsawta’n a phum. He hunah hian Bialtu MLA Pu Lalrobiaka bakah Principal Secretary, Finance Pu Lalnunmawia Chuaungo, Commissioner & Secretary, Agriculture Pu Lalhmingthanga leh Mission Director, MOVCD-NER Dr.H.Saithantluanga te pawh an tel.

Reiek Block Turmeric Growers’ Society Processing Unit lungphum puala inkhawm Reiek Block Farmers & Producers Organisation (FPO) Chairman Pu K.Vanlalchuanga kaihhruaiah Khuallian Finance Minister Pu Lalsawta chuan Reiek, Ailawng leh Khawrihnim khuaa kuthnathawktute chu tangrual thiam tak an nih leh thawhhona tha tak an nei thei chu a lawmawm hle a ni, a ti. Mizote hi hnam taima tak an ni a, hmun dangah hnamdang karah pawh awm mahse pianpui talent tha tak an neih avangin Mizote chu kawng hrang hrangah a hruaitu dinhmun an luah fo a ni, a ti. Mizo mipuiten political party leh sorkar an sawi chhiat ang em em chuan an chhe lova, mahni infak ang em em chuan tumah an tha bik lo tih sawiin Pu Lalsawta chuan mipui lam an tan thiam phawt chuan sorkar lam chuan theihtawp chhuahpui turin a inpeih reng a ni, a ti bawk. Mizorama loneitu/kuthnathawktuten an hriat tur pawimawh chu an thlai thar leh thil dehchhuah atanga sumdawnna liantham nei tur chuan an tharchhuah/siamchhuah thilte a tam tham tur a ni a, a huhova thlai chin ‘contract farming’ lam pawh uar deuh deuh a tul a rin thu a sawi. Mizorama mihausate pawhin agriculture lamah an sum peipun (invest) tam deuh deuh se, thlai leh ran vulh lamah pawh tun aiin sumdawnna kalpui tam zawk se a duh thu a sawi bawk. Sorkar lamin mipui mamawh intawm - heng kawlphetha, kawng tha, tui hnianghnar taka a awm theih nana theihtawp chhuah a tul bawk, a ti. Mizote hian Mizoram chhung leh Mizote zingah chauhah kan rilru a chen hi a pawi a, hei vang hian kan thil tharchhuah leh siamchhuahah te pawh ulukna chang an hre lo thin chuan hralhchhuah a ti harsa thin a ni, a ti.


Bialtu MLA Pu Lalrobiaka pawhin thu sawiin hnam leh mimal ang pawhin intodelhna tel lo chuan zahawmna a awm thei lo a ni, a ti. Mizoram thlai tharchhuah zingah aieng leh hmarcha-ah te nasa takin tanlak a ni mek a, state pawn atang pawhin heng thlai pahnihten ngaihven an hlawh hle tawh a ni, a ti bawk. Kuthnathawktuten hma an lo lak tawh zawng zawng tisawt lehzual turin tunai khawvel thiam technology nena thawh kawp thiam chuan hmasawnna pawh a chak ang tiin duhsakna a hlan a ni.

Principal Secretary Pu Lalnunmawia Chuaungo chuan Reiek atanga aieng hralh tura siamchhuah chu ‘organic certification’ a neih zel a pawimawh dawn a, hmundang atang aieng tharchhuah luahlan tur chuan Mizoram aieng chu ‘organic’ dik tak a nihna hian a pui hle dawn a ni, a ti. Certificate pek an nih hmain thlai/hlo tur ‘pesticides’ hmang chu an test vek dawn avangin a ruka hman chi emaw tlemte hman chu a pawi lovang tia hmang mai emaw tumah awm lo se tiin fimkhur turin aieng chingtute a chah a. Vawi khat an tihsual pawhin Mizoram atanga ‘organic’ hming pua lo chhuak thlai leh thildangte reng reng chu rintlak lovah khawvelin an hmuh palh hlauh chuan Mizo loneitu/kuthnathawktute tan a pawi thui viau thei a ni, a ti bawk.


Agriculture Secretary Pu Lalhmingthanga chuan Mission for Organic Value Chain Development (MOVCD-NER) hnauaih Mizora chhunga hmalakna hrang hrangte a tarlang a. Kum 2014 daih tawh khan DoNER hnuaiah hmarchhak bial state-te tan ‘Organic Farming Workshop’ neih a nih hnuah hmalakna eng eng emawni chu awm mahse a hlahtling tak tak thei lova; kum 2016 khan sorkar laipuia Ministry of Agriculture chuan ‘organic farming’ hi uluk zawka a kalpui tak hnuah hmasawnna nasa tak hmuh tur a awm chho zel a ni, a ti. Mizoramah pawh ‘Mission Organis Mizoram’ (MOM) te din a ni a, Reiek leh W. Phaileng-ah ‘Organic Youth Club’ din a ni bawk a, chu bakah transport subsidy leh fruit subsidy thlengin sorkar chuan a ruahman zel a ni, a ti bawk. Tun dinhmunah Mizoramah MOVCD-NER kaltlangin Farmers & Producers Organisation (FPO) 14 din a ni tawh a, chung chuan ram hectare 6117 enkawlin farmer 7972 hnenah tanpuina chi hrang hrang pek mek a ni tih a tarlang. MOM hnuaiah hian thil hrang hrang 7 tharchhuah/siamchhuah mek a ni a, chungte chu : aieng (turmeric powder), thingpui fe (organic tea), hmarcha um (Traditional Mizo Chilli Pickle), hmarcha hmui (Mizo Chilli Roasted & Crushed), sawhthing powder (Ginger Powder), sawhthing hmui (Ginger Flakes) leh aieng atang siam ‘Turmeric Dried Finger’ te an ni tih a sawi bawk. - DIPR


No comments:

Post a Comment

Post Bottom Ad