SIKTUITHIANG KUT - Mizo Hmeichhiate Insuihkhawm Nan - TIMES OF MIZORAM

Breaking

Home Top Ad

Post Top Ad

SIKTUITHIANG KUT - Mizo Hmeichhiate Insuihkhawm Nan

SIKTUITHIANG KUT SIKTUITHIANG KUT: Vawiin khan MHIP General Headquarters leh Art & Culture Department buatsaihin Siktuithiang Kut Sipai lammual ah hman a ni a, Pu R.Romawia, Art & Culture Minister chu Khuallian niin Coopertion Minister Pi Vanlalawmpuii Chawngthu, Pu Sangdingliana, Secretary Art & Culture, Pu R Hmingthanzuala, Director, Pi Saipuii, President MHIP Gen. Headquarters ten an telpui a, Aizawl district chhunga MHIP branch 56 te an tel bawk.

Art & Culture Minister Pu R Romawia chuan MHIP General Headquarters leh Art & Culture Department ten Mizo hmeichhiate insuihkhawm nan  a Siktuithiang Kut an buatsaih chu lawmawm a tih thu a sawi a, Mizo hmeichhiate hian kan Mipa te lakah hian kawng hrangah himna kan mamawh a, chung himna pe thei tur chuan mizo mipa ten tan kan lak thar a ngai a ni, a ti. Pu R Romawia chuan, Hmeichhia leh mipa intluktlanna turin sawrkarin hma ala mek zel a, inthlanna chi hrang hrangahte pawh hmeichhe tan hmun siam belh zel tum a ni, a ti bawk.

SIKTUITHIANG KUT Art & Culture Director Pu R Hmingthanzuala chuan, Siktuithiang hi Kristian kan nih hnu a lo piang a ni a, kan hnam lam dangte aia naupang deuh ni mahse Zo nun ze mawi- Tlawmngaihna, rinawmna, taimaknate leh Zo hnahthlak inpumkhatna atan leh kan hnam zepui vawn nun zel nan I hman tangkai ang u, a ti a, He Kut hi kan hnam zia humhalh nan leh vawn himna hmanraw pawimawh tak a nih ngei ka beisei, a ti bawk. Pi Saipuii, President MHIP General Headquarters chuan Kan tu leh faten kan hnam zai leh lam an chhawm nun zel na atan he Siktuithiang Kut hi buatsaih a ni, a ti a, a vawi khatna atan Siktuithiang Kut kan hmang thei hi a lawmawm hle a ni, a ti bawk.

Siktuithiang Kut lawmnaah hian Zaipawl leh mal zai te ngaihthlak a ni a, Siktuithiang lampui entir a ni bawk. -DIPR

No comments:

Post a Comment

Post Bottom Ad