Thuhma:
Kumin Logos Course-a ‘Tirhkoh Paula Chanchin Zirna’ tih topic min chantir ve hi ka lawm hle a; chutih rualin Paula chanchin kher hi chu kan hriat belsa deuh ruak a nih avangin ngaihnawm danglam taka han sawi thiam a har dawn hle. Kan Bible-a Thuthlung Tharah leh kristian hmasate chanchinah hian Paula hi a langsar hle a, hnuhma a ngah a, a chanchin ziakna ringawt pawh lehkhabu chhah pui pui a tam hle a. Ziaka thu han hnutchhiah dawn hian kim lo leh phuai luai deuha tih ai chuan tiin phek chhahpui, hlui lawih tham rawn phawrchhuah mai duhna a awm ve thin a; mahse, tum/zan khat chauh zir tur anih hre rengin ngaih pawimawh zual chauh kan thur chhuak dawn a. Chuti a nih chuan Paula chanchina thil pawimawh tak tak, Damaska kawnga thil thleng te, theologian ropui a nihna te, a zirtirna tlangpui leh a missionary rawngbawlna chanchin ngaihnawm takte kan sawi lang hman dawn lo a. A mimal chanchin leh amah atanga zirchhuah tur kan neih te kan zirho thung dawn a ni.
1. PAULA HI TU NGE A NIH?
1.1 A hming:
Mizote hian thil dik tawk zan lo hriatbel tak hi kan ngah fu awm mange ka ti thin a, chung zingah chuan Paula hming hi a tel vein ka hria. A pianthar hma chuan ‘Saula’ a ni a, a pianthar hnuah ‘Paula’ a lo ni ta, tiin kan hre tlangpui awm e, sermon-ah hial pawh ka ngaithla ve fo tawh! Chiang taka hriat theihah chuan Paula hian atir atang rengin hming pahnih – Hebrai hming ‘Saula’ (Tirh. 9:1; 13:1; a awmzia chu ‘dil’ tihna – Tirh. 7:58; 13:9) tih leh Rom/Grik hming ‘Paula’ (Paulus/Paulos) tih a nei a. Mi thiam thenkhat chuan pahnih ni lovin pathum a nei an ti a, chungte chu Saula (Hebrai), ‘Paulus’ (Latin/Rom) leh ‘Paulos’ (Grik) tih te hi. Paulus tih leh Paulos tih hi Grik tawngah chuan a inhnaih khawp mai a, thuhmun a nih theih avangin a hming pahnih kan hriat larsa (Saula leh Paula) hi pawm mai ila a sual lo berin a rinawm. Chanchin Tha hrila a zinna Kupra thliarkar atangin Paula tih hi hman lar zawk a ni ta (Tirh. 13:9).
1.2 A Mizia:
Ralkhata a thawm len leh a thuziak pawhraw aiin hmaichhanah chuan pa nem lam mah; chutih rualin pa awm nem leh rilru nem ni hauh si lo, mi tum ruh, thil tih tawh laklawha tlawmsan ve zing zeng ngai lo, hlawhtlin tum tlat mi a ni. Amah hi mize chak lam, lamtang atana tha tak, hnialkhan hre si; mahse, zui zawh harsa tak tur mi a ni. Rual kawm thiam tak a nih avangin hmelhriat leh thian tha pawh a ngah a, a bengvar a, a inpe zova, mi daihriat ngah leh knowledge zau, a thil hriat zawng chiang taka hre thin, mi accurate tak kan tih ang chi hi a ni. Tunlai tawng takin – Paula hi chu mi pakhat a tling a ni!
1.3 A mimal chungchang:
Paula mimal chungchang ziaktu tam berin an sawi dan chuan pa te lam deuh, sa tha len lawn, bawp kual teng tawng, a pa tet ngaihtuaha thahrui nei tak, sam ngah lem lo, mithmul buk tha tak, hnar ngul zum van mai, hmel zahawm leh ngainatawm tak a ni a. Amah hi Isua aiin kum 10 velin a naupang zawk a ni awm e.
Paula chanchin kan hriat theihna hnar ber chu Tirhkohte Thiltih bu leh a lehkhathawn te a ni a, Thuthlung Thar mi thiamte ngaihdan tlangpuiah chuan Paula hian Isua hi a tisa put lai ni khan ahring ahranin a tawng lo a, a zirtirna pawh a chhim ve lo a ni ang, hria ni sela chu Isua thusawi hi vawi khat tal a sawi chhawng (quote) ve tur a ni, an ti. Hei hian Tarsa khua atanga Jerusalem-a thiam zir tura a kal hun sawilan ni chiah lo mah se, a tlangval zet zawt hnua kal angin a ngaihruat theih phah em? A nih loh leh thil dang inphum ru a awm zawk em ni?
Kristiante zingah chuan Paula aia ropui leh thawhhlawk tur hi an vang khawp ang. An hunlai khawvelah amah aia Chanchin Tha hril kawnga pianna hmun dik, seilenna leh training nei tha, leh amah aia nihna danglam leh tha fawr nei thei tur mihring hi an awm thei lo hial ang! ‘Pathian bel ruat’ (Tirh. 9:15) tia sawi hi a awm hliah hliah a ni. Paula hian nihna pathum a nei, chungte chu: Tarsa khawchhuak (Tirh. 21:39) a nih avangin Grik/Jentail mi tih theih a ni a, thlahtute lamah chuan Juda mi dik tak a ni bawk a (Tirh. 22:3; 2 Kor. 11:22), tin, khua leh tui neihna lamah chuan Rom mi dik tak a ni bawk (Tirh. 22:24-29)!
1.3.1 Tarsa khaw chhuak, khawpui tlangval a ni
Mipuite hnena a pian leh murna a sawidan chuan, “Kilikia rama Tarsa khuaa piang ka ni, khaw namena awm ka ni lo ve,” a ti a (Tirh. 21:39; 22:3). Hei hian hetih hun laia Tarsa khaw ropui dan leh chapo pui tham a nih zia a tarlang a ni. Tarsa khua hi khawpui hlun tak, 860 BCE hma lam daiha awm tawh kha a ni a. Assuria lal ropui Shalmaneser III khan 1000 BCE laihawl vel khan Tarsa khua hi a lo luah tawh a. Alexander Ropuia’n 333 BCE khan Persia-ho kut atangin a la a. Chumi hnuah Seleucid rorelna hnuaiah 312 – 65 BCE chhung a awm leh a. Rom sorkar a lo lian a, Tarsa khua chu khaw ropui takah a din chho thar leh a, khawpui zalen tak nih an phalsak bawk.
Augustus-a hunlai (27 BCE – 14 CE) khan he khawpui hian a vawrtawp hun a tawng tih theih a ni. Sumdawnna leh finna lamah a hming a thang hle, ‘Grik finna khawpui’ tih hming an puttir hial a, University te a awm a, zirna tha duhin khawvel hmun hrang hrang atangin he hmun hi an rawn pankhawm thin a. Stoic leh Epicurea mifingte he khuaah hian an tam hle a, tin, mi fing lar tak tak Antipaters, Archedemus, Athenodorus, Cordylion, Nestor leh Zenoa te kha Tarsa khaw chhuak vek an ni. Chutianga philosophy thuk pui pui buaipuina leh ngaih hlutna kara piang leh seilian a ni a. Paula hi University-ah te kalin philosophy lamah degree sang tak a neih thu hi hriat ni chiah lo mah se, an philosophy thuk pui pui – entirnan Stoicism te hi a hre khat hle tih a theology atang hian a hriat theih! Chu mai ni lovin chung philosophy thuk pui pui aia ril leh thuk zawk Chanchin Tha Mawl – Kraws Thuchah a rawn tlangau pui ta zawk a ni!
Tarsa khua hi sumdawnna lamah pawh a duai lo hle, kel hmul atanga thil chi hrang hrang – puan in, kawr, blanket, kawnghren, thutphah, etc. siamah pawh a hmingthang hle. A seilenna hian a zir miau avangin a rawngbawlnaah pawh mahni intodelh thei khawpin puan in siam a thiam! Tarsa khaw tawng tualleng chu Grik tawng a ni a, Paul pawh hian a thiam tawk hle a ni ang (Tirh. 21:37). A seilenna boruak hian Paula nun leh rawngbawlnaah kawngro a su thui hle a ni. Paula hi Tarsa khaw chhuak, khawpui tlangval a ni.
1.3.2 Juda ziktluak a ni
Paula thlirna atang chuan Tarsa khawchhuak a nih leh Rom khua leh tui nihna a neih ai chuan Juda ziktluak a nihna hi a pawimawh ber. A pianpui nihna hrang hrangte (natural advantages) a thlir kir vang vanga a chhuan ber chu, “… ni riat nia serh tan, Israel thlaha mi, Benjamin chia mi, Hebraite laka Hebraia piang; Dan lamah chuan Pharisai, thahnemngaih lamah chuan Kohhranho tiduhdahtu; Dan thua felnaah chuan sawisel bo,” a nihna kha a ni (Phil. 3:4-6). Israel lal hmasa ber, Saula thisen kai, Saula hming pu phak a ni a. Hebraite laka Hebrai a tih chhan kher pawh hi Juda mi rau rauah pawh tawng leh culture-ah a ziding, pianpui tawng atan Hebrai leh Aramaic tawng hmang ngat chin, Tarsa khuaa a pian mai avanga Hellenistic Jew ni tura an ngaih ngawt ang a nih loh thu a sawina a ni. Damaska daiah pawh khan ama pianpui tawng ngatin Tholeh Isua khan a bia a ni (Tirh. 26:14). Paula pianchhuahna chhungkua hi Juda rut mai (orthodox) chhungkua anni tih a hriat a, chuvangin Jerusalema lehkha zira an tirh hian teenage anih hma a ni ngei ang, teenage a nih chuan Gamaliela school-ah a kal ngei tawh a rinawm. Pharisai fapa (Tirh. 23:6) a inti hi a pa pawh kha pharisai a ni tihna ni lovin Pharisaite ke bula zir chhuak a nih thu a sawina a nih zawk hmel. Khermei taka Dan zawm tum Pharisai pawla mi ni thin mah se, a pianthar hnuah erawh chuan (a Pharisai nihna) Dan avanga felna chu nei tawh lovin, Krista rin avanga felna nei zawkin, amaha a awm theihna turin engkim a chan ta zawk a ni (Phil. 3:9).
Paula hian Juda mi a nihna hi a hnualsuat lo mai pawh ni lovin a hmang tangkai hle a, hemi hmang hian a chipui mi tam tak Krista hnenah a hruai lut a ni. Grik finna thuk tak atanga zi chhuak a nihna aiin Juda mi a nihna hian a nun leh a theology-ah hmun a luah lian zawk a ni tih a Lehkhathawn atang hian a hriat theih.
1.3.3 Rom mi nihna a nei
Mi naranin an neih phak loh, an dahsan em em, Rom mi nihna Paulan a neih hi Jentailte tieng tura Pathian bel ruat a nihzia tarlangtu pawimawh tak a ni. Rom mi nihna hi inchawimawina satliah a ni ngawt lo. Rom danin an zahawmna leh himna a humhalhsak tlat avangin chhenfakawm tham tak a tling. Rom mi chu phuar, vuak, leh khenbeh theih a ni lo. Sila nen Philippi khuaah engmah hrechiang lovin an vuak ringawt tum khan Rom mi a nihnain a cho let a, an hlauthawng leh hle si a nih kha (Tirh. 16:37-39). Jerusalemah pawh Rom mi a nihna avangin vuak lakah a him bawk a (Tirh. 22:25). Paula hian hetiang dinhmun tha bik a neih hi loh theih loh tih lovah chuan a hmang zen zen lo a ni. Rom mi nihna hi mi thenkhatin sum tam tak sengin an lei laiin Paula erawh chu Rom mi renga piang a ni a (cf. Tirh. 22:28), a nu leh pate hnen atanga a rochun tihna a ni.
Paula nihna pathum kan tarlante hi a hraw hlawm thiau thiau hle, mimal pakhat awrh thawt atan chuan a pui mah mah a ni, tih mai tur a ni. Hetiang taka ropui hi Pathianin a rawngbawl turin a phiawk chat mai a, hei hian Pathian themthiamzia leh a Chanchin Tha a ngaihhlutzia a lantirin ka hre thin. A nihna pathum aia ropui zawk Pathianin title thar a pe a, chu chu Tirhkoh, Jentail-te Tirhkoh tih a ni.
2. TIRHKOH PAULA NUN LEH RAWNGBAWLNA ATANGA RILRU KHAWIH ZUALTE
Tuna kan sawi tur hi ‘fahrah pawnpui’ an sawi ang deuh hi a ni a, pawhna lam lam tlin, vei zawng apiang Paula nun nena hmeh bela sermon pate thlak theihna tham vek a ni a, sawi tur a tam thei dawn khawp mai. Nimahsela, kan rawngbawlna atana pawimawh tura ngaih, ngaihmawh zual bik, ziaktu tam ber pawhin an sawi lan thin, a biblical deuh deuhte tarlan kan tum dawn a. Kan nuna hmehbel tur lam erawh chu sawihona lama sawi atan kan khek thung dawn a ni.
2.1 A mission-ah Paula hi a chiang
A hunlai finna khawvel ngaihtuah chuan Paula hian thu tha fawr danglam bik a sawi hran lo; nimahsela, a sawi tam thung a, ama hmel landan ang angin Chanchin Tha mawl (simple gospel) a zirtir a, mi rilru lem zawng (fancy way) takin a thluk hran lo, a hmuh leh hriat kha fiah takin a sawi tawp mai a (1 Kor. 1:17). A rawngbawlna hmun atangin sum leh hamthatna umin a buai ve ngai lova (1 Kor. 9:17-18). Krista an hmuh theihna daltua tan a hlau hle a, nuihsawh chana chang, sawisel tur zawng reng renga hmanhlelte lakah pawh remchang pakhat mah siam lovin a fimkhur thei a, a inveng seng bawk a, Krista hnena a hruailuh theih dawn phawt chuan dinhmun hnuaihnung bera awm pawh a ngam thung a ni (2 Kor. 6:3; 1 Kor. 9:19).
Paula hi a thil tih tawhna lamah chuan theihtawp chhuaha ti vak thin a ni a. Amah pawh a thawkrim a, thawhrimna a ngai hlu a, thawk rim turin a rawngbawlpuite pawh a fuih nasa hle (Rom 1:13; 16:12; 1 Kor. 3:8; 16:16; Phil. 2:14-16; 1 Tim. 4:10; 2 Tim. 2:6). Mi dang zawng aia a thawh rim theihnaah khan a lawm hle (1 Kor. 15:10). Chapo zawngin a sawi lova, Pathian khawngaihna avang chauh a ni tiin chawimawina Pathian hnenah a hlan (2 Kor. 5:11-15). Lawmman hmu thei ngei tura tlan, a uma um tang tang mi a ni (Phil 3:12-14).
2.2 Mi huaisen leh mi tumruh a ni
Paula chanchina ropui deuh chu mi huaisen tak a nihna hi a ni. Dik nia a hriatah chuan huai takin a kal mai a, engmahin a dal lo. A nunna atana hlauhawmah pawh harsatna hmachhawn turin a kal lui tho, “…Lalpa Isua hming avang chuan Jerusalem khuaa phuar chang ka huam lova, thih pawh ka huam asin,” (Tirh. 21:13) a ti mai a nih kha! Dik nia a hriat chu huai takin a sawi hmiah bawk. Tirhkoh Petera meuh pawh a khak hreh lo (Gal. 2:14). A hlauh ber chu a chunga roreltu Pathian a ni, a mihring puite fak mawina umin a buai ve ngai lo (1 Kor. 4:3-4; Gal. 1:10).
2.3 Mi inzir-mi, mi thiam, mi ril, inpuahchahna tha nei a ni
Paula chanchin tlangpui kan hriat tak ang khan zir thiamna lamah chuan mi chungchuang a ni a. Damaska kawnga Tholeh Isua a hnena a inlara a pianthar atang khan a khawvel chawp leh chilhin a lo danglam zo ta a. A mamawh hmasak ber chu Pre-Service Training a ni, chumi tur chuan Arabia ramah a kal bo ta nghal a, kum thum ngawt Pathian thu zirin Jentailte zinga Chanchin Tha a hril dan turte inpuahchah nan a hmang a ni (Gal 1:17). He thu hi Tirhkohte Thiltih buah hian kan hmu lo thung a, hei vang hi a ni mahna hrilhfiahtute hian an tuipui chiam loh ni! Paula hi Pathian tan a tha ber, a tih theih tawka sang ber hlan duh thin mi a ni a, chuvangin inbuatsaihna tha tawk nei tura a kal bo (bethel?) pawh hi a tih awm tak reng a ni. Paula kha tunlai mi thiamte anga kawng hmang fel tak nena Pathian thu chhep chhuak thin (Systematic Theologian) ang hi lo ni chiah lo pawh ni se, Pathian thua a rilzia leh mi mawl berte tan pawha hriatthiam theih tura a sawi thiamzia ngaihtuah hian Theologian ropui tak chu a ni chiang a ni. Tin, chu ber aia a ropuina chu a taka a tawnhriat leh a nunpui thin Pathian thu a sawi thin, Rom lehkhathawn hian Paula rilru thukzia a pho lang chiang hle a ni.
Paul hian ruahmanna fel tak (strategic plan) neiin mission hna a thawk thin, a hun leh a hmun azira insiamrem thei lo tur khawpa ruahman sa zui tlur tum mi (rigid strategist) chu a ni lo. Chanchin Tha hi khawvel huap (worldwide) a nih avangin a darh zau theih berna turin khawpui lian (metropolitan city) a zuan a, sakhaw ngaihsakho zingah – Synagogue-ah lutin Chanchin Tha hrilna remchang a thin. Synagogue-ah hian Juda darh hote (diaspora Jews) leh Jentail saphunte (proselytes) an lo awm thin tlangpui a. Chanchin Tha phun ngheh nan Kohhran din (church planting) hi a ngai pawimawh hle. A kalna apiangah mi dangte hnena Chanchin Tha tlangaupui chhawng thei tur mi chher a tum hram hram thin. Atheni khuaa Hriat loh Pathian betute kristiana a hruai luh dan nalh tak mai te hi thu ngaihnawm tak a tlingin ka hria! Paula hi mi thiam leh mi inzir mi tak, inpuahchahna tha tak nena rawngbawl thin a ni.
2.4 Chanchin Tha avangin a tuar nasa hle
Paulan Chanchin Tha avanga a tuarna te hi a lo turu hlawm khawp mai! A mal mal pawn zir tham a tling ang. Ama tawngkam ngei hi i lo en teh ang:
Krista rawngbawltute an ni maw? (mi a angin han sawi ta ila) Ka ni zawk mah; thawh rimnaahte nasa lehzualin, tan ina tannaahte nasa lehzualin, vuaknaahte hleihluak takin, thihnaahte vawi tam tak. Judate lakah vuakna(hlapna) vawi khata vawi sawmli tling lo vawi nga ka tawk a; vawi thum tianga vuakin ka awm a, vawi khat lunga denin ka awm a, vawi thum lawng chhiatna ka tawk a, zan khat leh ni khat tuifinriatah ka awm a; khaw fannaahte vawi tam tak, luite laka hlauhawmahte, suamhmangte laka hlauhawmahte, ka chipuite laka hlauhawmahte, Jentailte laka hlauhawmahte, khawpuia hlauhawmahte, thlalera hlauhawmahte, tuifinriata hlauhawmahte, unau derte zinga hlauhawmahte; thawhhahna leh thawhrimnaah te, mutmawhnaahte vawi tam tak; riltam leh tuihalnaah te, chaw ngheinaahte, vawi tam tak khawsik leh saruaka awmnaah te. Heng pawn lam thil ka sawi bakah hian Kohhranho zawng zawng ka ngaihtuahna, ni tin mi delh rengtu hi a awm bawk a (2 Kor. 11:23-28).
He’ng tuarna namen lo tak chhel taka a tuar theihna chhan chu Pathian thiltihtheihna amahah chak taka a thawh vang a ni, a ti (2 Kor. 4:4-8). Paula taksaa hling awm kha eng nge a nih chiah kan hre thei lo, mi thiam hote paw’n thutlukna an siam ngam lo, hriat theih chinah chuan taksa lama natna benvawn, engtik lai pawha awm reng, zual lai nei thin, amah ngei pawh tenawm leh hmuhsitawma siam thei a ni (2 Kor. 12:7-8; Gal. 4:13-14). Chak lo leh hlauvin, nasa taka khurin awm thin mah sela (1 Kor. 2:3), a tuar tam tulh tulh a, a chhel tial tial a, a hnuah phei chuan Krista avanga a tuarna ah khan lawm em emin Pathian a fak thei tawh zawk a ni (Kol. 1:24-26).
2.5 Thawhhona tha a ngai pawimawh
Paula hi rawngbawltu tha chungchuang, mi dangte entawn tura amah intarlang ngam a ni. Inpumkhatna leh khawtlang dam tlanna (shalomic society) a ngai pawimawh hle (1 Kor. 7:17-19). Chu’ng chu a takin a au chhuahpui a, a nunpui bawk a, Van Lal nau ang a tahna kalvariah an dang chuang love tih ang khan Juda leh Grik (Jentail), bawih leh bawih lo, mipa leh hmeichhia inthliarna awm thin kha tha a ti lo a ni (Gal. 3:28). Paula chuan eng mi pawh rawngbawlpui theih loh a nei lo, naupang atangin nula tlangval, hmeithai leh pitar putar lamin, mi hausa leh rethei a thliar lova, hnam dang a thliar hek lo (1 Tim. 5:1-3). Tumah amah aiin a dahhniam ngai lova, a hnung zuitute pawh a assistant angin a en ve ngai lova, tiatpui (fellow worker) enin a en zawk thin! A rawngbawlpuite tangkaina leh hlutna a hmu thiam em em a, mi dang thawhpui a thiam a ni (Rom 16).
2.6 Mi inngaitlawm a ni
Paula hian chhuang duh sela chuan chhuan tur a ngah hle, thlahtute lamah, chhungkaw inrochun thilah, seilenna khuaah, sakhaw mina kawngah, thiamna lamah, Chanchin Tha hril kawnga inpekna leh thawhrimnaah leh tuarna thuah, etc; nimahsela, Krista kraws leh a chak lohna bak chhuan tur a neih loh zia a hrechiang a (1 Kor. 9:16; 2 Kor. 10:8; 12:5, 9; Gal. 6:14; Phil. 3:4-6). Ralkhatah tawngkam khauh tak tak han chhakchhuah chang nei mah se, a tawngkam thiam tawk loh vang te a ni a (2 Kor. 11:6), a takah chuan mi nem tak, tlin lohna ngah tak nia inhria, zuamawm tak a lo ni leh thin. A tlin lohnate chu hnual nan a hmang ve lo, a tlin theihna Pathianah a intulut deuh deuh thin!
2.7 Thlarau mi tak a ni
A natna (hling) damna (kianna) turin Lalpa hnenah vawi thum a tawngtai a (2 Kor. 12:8) tiha vawi thum a tih hi vawi thum chiah chiah tihna a ni a ngem (?), nge ni a tawngtai tam zia sawina ni zawk ang (?). Engpawhnisela, hei hian Paula khermei zia a tarlang telin ka hria. Pathian hnena a tawngtai zat leh a tawngtaina subject lamin a chhinchhiah vek tihna a ni dawn a, chutiang mi a nih chuan tawngtaia rak vak vak, sawi ngai sawi sawi mi chu a ni lo phawt mai a! Chuti a nih chuan Mizo thlarau mina nen chuan a inpersan ta deuh em? Paula thlarau mina hi a fim viau e ti lovin Asia rama thu hril Thlarau Thianghlimin a khap a, Troas khuaa a zel hmuhin Makedonia rama kal turin a ngen tak chiam avangin an kal chawpchilh ve leh nghal mai bawk a! A missionary zin vawi thumnaa Ephesi a tlawh tum khan, Appolova phun Kohhran hote khan Thlarau Thianghlim awm leh awm loh pawh an lo hre lova, Paulan baptisma a chantir a, Thlarau Thianghlim chu an chungah a lo thleng ta a, tichuan tawng hriat lohtein thu an sawi a (Tirh. 19:1-6), an lam ta ve ang (?). Mihlim ram kan tih ang ho hi Paula hian a buaipui (tackle) ve nasa a, a zia nawi te te thleng hian a hre viau mai hi a mak hle a ni.
Hmawrbawkna:
A chunga Paula chanchin kan zirna tlemte atang pawh hian Paula’n Chanchin Tha a dah laipuizia, Pathian a rinzia, a thahnem ngaihzia a lang thei a. Theihtawp tak meuha a thawh pawhin ‘bawih thahnem lo’ a nihzia a hrechiang a. Amah hi a taka Pathian thu nun chhuahpuitu leh entawn atana a nun tarchhuak ngam a ni a. Pathian ram tan Paula aia tangkai leh thawhhlawk hi khawvelah an piang leh thei tawh lovin a rinawm hial a ni.
SAWIHO / NGAIHTUAHZUI TURTE
- Paula hi Pathian ‘bel ruat’ a nihzia sawiho ni sela. ‘Bel ruat’ tih leh ‘ruat lawk’ tih hi thu awmze inang a ni em? Ruat lawk (Predestination) thu hi in pawm em?
- Paula ziaah hian a eng hi nge a hlawhtlinna thuruk ber nia in hriat?
- Paula missionary hna thawh dan hmang (strategy/ralrel dan) hi tunlaiah a la tha tawkin kan hria em? Hindu hnam tha ho hi engtiangin nge kan hmachhawn ang?
- Rawngbawlnaa thiamna leh inpekna pawimawh kawp zia sawiho ni se, chutih rualin mi inpe te hi Pathianin thiamna a pe chawp thei tho em?
- Mizote zingah pawh mi thiam an pung tial tial a, Bible zirtirna thlengin an rawn hmu nep chhova, hei hi a chhan eng nge ni ang? Atheist-a inchhal ngamte pawh kan Mizo thalaite zingah an lo awm ta hi eng vang nge ni ang, engtia hmachhawn tur nge?
- Thawhho thiam pawimawhna sawiho nise.
- Thlarau mi tih leh Thlarau Thianghlim hnathawh kan hriatthiam dan sawiho nise.
- Tirhkoh Paula rilru huaisenna leh tlangna ang hi tunlaia thalaite rawngbawlnah hian engtiang taka pawimawh nge ni a in hriat.
He paper-in a sawi lan ve loh, Paula theology thenkhat famkim tawk lo nia an hriat an sawisel thin a awm, chungte chu:
(i) Chhandamna ngheh zia – tlu mah sela meia kaltlang ang maia vanram kai tur anga ngaih theiha sawi hi a zau mah mah a ni, an ti thin.
(ii) Hmeichhe ordination chungchangah Paula daltu lian ber a ni, an ti thin.
(iii) Paula lehkhathawnte hi Kohhranah rin dan hrang siam chhuaktu bul ber a ni, an ti thin.
Heng hote hi han sawizau teh u.
Post a Comment