KRISTIANNA LEH POLITICS - Vanlalsanga Tochhawng

Vanlalsanga Tochhawng
- Khawbung.

KRISTIANNA LEH POLITICS
Political scientist ten politics an hrilhfiah dan kawng khatah chuan, ‘Politics chu thuneihna, rorelna, ram awp dan/rorel dan, thutlukna siam dan leh thuneihna in a zawmpui thil hrang hrang te zirchianna a ni a. Tin, chung thil zawng zawng ten vantlang/ khawtlang nun kawng hrang hranga nghawng a neih dan zirchianna a ni,’ tih a ni. A tawi zawngin ‘Politics’ chu zirna peng hrang hrang zinga peng pakhat, Social Science chhunga peng pawimawh tak pakhat a ni tihna a nih chu.

A chunga hrilhfiahna kan han tarlan aṭanga thil lang chiang em em mai pakhat chu ‘Politics hi mipui mimir te tel lo chuan a awm thei lo va, a famkim thei lo’ tih hi a ni. Thuneihna leh rorelna chuan roreltu leh rorelsaka awm te a rawn keng tel nghal a. Chutiang zelin, ram inawpna leh inkaihhruaina dan leh thutlukna siamna tur a awm dawn chuan chutianga kaihruaitu/siamtu leh siamsak/kaihhruai tur an awm ve ngei ngei a ngai a. Khawtlang nun hi politics darthlalang a ni. Mipui mimir khaw hawi, rilru sukthlék leh vei zawng hian politics ah nghawng thui tak a nei a. Chutiang chiah chuan politics pawhin khawtlang nunah nghawng thui tak a nei bawk.

Politics kan tih hi Greek ṭawng ‘Polis’ tih aṭanga lo piang a ni a, a awmzia chu "Khawtlang leh ram inrelbawl dan" tihna mai a ni. Greek hovin Polis an tih chu mahnia fel taka ro inrel thei khua chu Polis/Politics an ti ṭhin a ni awm e. Politics hi tualchhunga hna pakhat emaw thuneihna emaw kan zirthiamnate leh kan sakhuana a kan inrelbawl dan zawng zawng hi Politics a ni a, a huam zauvin sawi tur pawh a tam hle a ni. Politics hian mi zawng zang a khawih a, tumah tih bik leh thlùr bik a nei chuang lo va, kan zavai hian a chhungah chuan kan awm vek a ni.

Politics hi ka ngaihtuah peih ve lo ti ṭhin mah ila, kan nunphungahte, kan chhungkaw tih dan, NGO leh Kohhrana kan inkaihhruaina chen hian Politics chu a ni vek tawh zawk a ni. “ Politics a inrawlh nasa lutuk a” kan tihte hi chu kan duhâmna leh Politics kan hman sual vangte a ni daih tawh ṭhin. Party thuneihna an hmansual uchuakna ringawt hi politics chhia emaw kan tih chuan a dik lovang. Kan khawtlang leh chungkaw inrelbawlna a dik tawh loh chuan keimahni politics kha a diklo a ni mai.

Politics kan sawi rik rual chiah hian keimahni nunphung hi ngaihtuah nghal ila, tu party hmalak dan ringawt niloin, kan nundan zawng zawng hi mihringte kan inlaichinnate leh kan indawr tawnnate, kan khawsak phunga kan inrelbawl dan zawng zawng hi a huam vek si a. Nu leh pa tam tak chuan Politics kan hriat chian tawk loh ṭhin avang hian thil ṭhalo tak angah kan ngai a, hlemhlétna leh duhâmna, thil tithei zawkte intâwllénna hmun ringawtah te kan ngai ṭhin. Kohhran mite tana tel vena turah kan ngai lo va. Sawi pawh ngam awm khawpin kan hmu khawlo zo tawh a. Hei hi a chhan ni ta bera lang chu, politics hmansual vang a ni deuh ber mai awm e.

Thuthlung hlui ah chuan Israel te chunga rorel turin Pathianin roreltute amah ngeiin a ruat ṭhin a. Chung mite chuan an rorel dan tur te chu amahin a hrilh ṭhin a, an mahni kaltlangin Pathianin an chungah ro a rel ṭhin a ni tih kan hria. Lal anneih hmaa an roreltu hnuhnung ber Samuela chu alo tar a, rorel thei a lo nih tak loh ah chuan Samuela hnenah chuan Israel mipuite chuan LAL neih an dil ta a. Samuela chuan rem ti chiah lo mahse Pathianin Lal neih chu a remtih sak ta a ni, chuta ṭang chuan zawlnei te kaltlangin Pathian chuan Israel-te lal tur chu Hriak thih in a ruat ta ṭhin a ni. An sual pawh in Pathian in a mi, a zawlneite ngei hmangin a zilh ṭhin a nih kha.

Pathian chuan ram hruai leh rorelna chu a mite hmangin a thuhnuai ah a dah reng tho va. Pathianin heti khawp a rorelna leh roreltu tur a ngaih pawimawha a duh tui a, siam ṭhat nan a mite a hman ṭhin laia keini a mite inti-Christian in tite hian kan inrawlhna tur a nilo kan ti a nih chuan, Pathian duh ang duhpui vetu, a mah zuitu tak tak kan ni angem le? Rukru pawh nise kan party anih chuan ka vote ang titute kutah kan dah mai a nih chuan Pathian duh dan kan kalh a ni thei mai ang em? Kohhran chuan Pathian rawng a bawl ang nga, ram hruainaah a inrawlh tur a nilo kan ti anih chuan in ngaih tuah ṭhat angai a ni mai lo maw?

Kohhran hruaituten rawng an bawl theih nana ṭan khawhtute chu an hnuaia kohhran te kan ni. Chung kohhran te chuan kan in relbawlna tur atan sawrkar ring deuh vek kan ni. Sawrkar aṭanga direct-a poisa hmulo te pawhin sawrkar hnathawkte hnen aṭangin poisa an hmu leh tho va. Sawrkar a ṭhat loh chuan indirect in kohhran pawh a chhe nghal dawn, kohhran hruaitute pawh an awm thei lo ang. Chuvangin party a buai lo, thil dik tak tak duh leh sual do tur bera ngaih leh sorkar rorelna hnuaia awm lo kohhran hruaitute hian ram rorelnaah a khalh ngiltu an nilo a nih chuan tu in nge khalh ngil tura kan ngaih le? Opposition te tihtur a kan dah a nih chuan mitdel leh mitdel inhruai hi kan tawrh phah ziah thei. Politics ah hian lehkha thiam leh viak ṭha tak tak an lut ngai silova, lehkha zir sang pawh pass ṭawk ṭawk te hi an lut duh cháwk bawk si. Isua ṭawngṭai dan min zirtir pawh, kohhran zawng zawngin kan pawm ah pawh “Kan Pa vana mi…. ramte, thiltihtheihna te, ropuite chatuan i ta a ni si a” kan tih hi mawle!

Politics dik tak chu Pathian thu nen a inrem a ni mai lo va, Pathian thu a ni zawk mah. Kan Bible-a Mari hla Lk. 1 : 45-ah hian Politics khelh dan tur dik chu a awm a, hetiangin: Thlarau nun (Spiritual): Ka nun hian Lalpa a chawimawi e. Ka thlarau pawh min Chhandamtu chungah a lawm ta em em a. Nun hona (Social Life) : A bânin a tha chakzia a entir a, mi chapote chu an inngaihtuahnain a tidarh ta a. Ram rorelna (Politics) : An ṭhutphaha lal ṭhute chu a hnuk thla a, hnam tlawmte chu a chawimawi a. Ei leh bar (Economics) : Rilṭamte chu thil ṭha takin a tipuar a, hausate chu kut ruakin a kal botir ta a. A chunga mi ang hian politics dik chuan thlarau nun te, nun hona te, ram rorelna leh eizawnnate hi a fún kim vek a. Mahni hmasialna reng reng a lang lo. Hei hi Lal Isua politics khelh dan chu a ni.

Mi tam zawkte hian politics hi chu Pathian ṭihtute khelh tur ni lovin kan hria a, rawngbawltu, politics boruaka inchiah pawh hmu khaw lo khawpin politics hi kan hlau niin a lang. Heng mite hian kan hriat atana ṭha chu - Politics hi kan Lalpa ta a ni a, ringtu ṭhate hlei hlei hian an khel tur a ni. Kan ngawihsan hmak chuan beram chawm turin chinghnia kan ruai tihnaa ni ang. Politics hian kan nun a khawih vek a, kan pindan ril ber aṭanga kan Pulpit thleng hian a khawih phak a ni. He thu pawm thei lo hi chuan politics awmzia a la hre lo hle a, kan Bible lo zir thar leh rawh se. Khawvela kan awm chhungin thlarau hlangin kan awm thei lo va, chaw kan mamawh a, silhfen kan mamawh a, midangte nena nun ho kan mamawh hle bawk. Tuna kan ram rorelna hi a dik lo a nih chuan a chhunga cheng kristian te’n mawh kan phur a, kan nunin kan bula mite a la hneh lo hle tihna a ni ang.

Mi tam tak chuan politics hi dawt sawina awm tawkah kan ngai a. Hei hian Pathian kan ṭih lohzia a ti lang chiang leh zual awm e. Candidate ten dawt hmanga an campaign mai piahah, campaigners tena dawt hmanga kan pute tlinna tura thu kan sawi tam zia te hi. Heng polititian te leh campaigners te hi kohhran mi leh sa te vek kan nih avangin dah hran theih loh kal kawp tlat a nihzia hmuh thiam angai ta. Vantlang mipui, vote neia thlaktu tur pawh hi kohhran mite tho kan la ni leh zel bawk.

Mi tam tak chuan ka duh ka hmu lo, chuvang chuan vote ka thlak dawn lo an ti ṭhin. Mahse, vote hi kan thlak emaw, thlak lo emaw, tu emaw chuan sawrkarna a chang dawn tho tho va. Vote kan thlak loh vangin roreltuin tih tura a tih leh min kaihhruaina hi kan hlam chhiah theih dawn loh avangin, kan tih ngei ngei tur chu vote thlak hi a ni hrim hrim a ni. Hmasang kohhran hruaitu hmasa te chuan, "Kohhranin sawrkar a tithiang hlim ang nga, sawrkarin kohhrana a humhim ang," an lo tih khan, kan tun dinhmunah hian kohhran leh pilitics hi kan thlir kawp thiam a hun ta viau lo maw?

Post a Comment

0 Comments