LALRINSANGA RALTE SERLUI CONSTITUENCY MNF CANDIDATE CHANCHIN - TIMES OF MIZORAM

Post Top Ad

16 Oct 2018

LALRINSANGA RALTE SERLUI CONSTITUENCY MNF CANDIDATE CHANCHIN

SERLUI CONSTITUENCY A MNF CANDIDATE TUR LALRINSANGA RALTE CHANCHIN

Serlui Bial MNF CandidateKumin, 2018 MLA inthlan pui lo awm tura Serlui biala MNF Candidate Pu Lalrinsanga Ralte(Rsa) hi Pu Rosanga Ralte leh Pi Chhimtlangthangi te fa pathum zing a upa ber niin, May ni 26, 1978 khan Aizawl Dinthar Vengah a piang a. Tunah hian a nupui Pi Lalhminghlui nen fapa pathum neiin Aizawl Dinthar venga an chenna inah an khawsa mek a ni.

ZIRNA LAM :-
Pu Lalrinsanga Ralte hian Govt. Aizawl West College atangin tha takin BA a pass a, he college-a a kal lai atangin zirlai pawlah a inhmang chho tan a. College Students’ Union-ah Magazine Editor te, Asst. General Secretary post te chelh chhovin, Mizo Zirlai Pawl General Headquarters-ah Executive Committee Member niin ram leh hnam tan ke a pen chhuak tan a ni.

KOHHRAN RAWNGBAWLNA LAM:-
Pu Lalrinsanga Ralte hi naupang tê a nih lai atanga nu leh pa thu awih, insumthei leh nun uluk tak, zu leh sa ruihtheihthila fihlim niin kohhran leh khawtlang rawngbawlna lama tui tak a ni. Kum 1992 khan kum 10 chhung zet Sande Sikul kaikim lawmman Pi ZAII MEDAL chu a dawng a, Dinthar kohhran atanga hetiang lawmman dawng hmasa ber a ni nghe nghe. Naupang Sande Sikul department hrang hrangah hun rei tak chhung chu zirtirtu a ni a, tunah hian Dinthar Presbyterian Kohhran-ah rawngbawltu niin, Puitling Sande Sikul zirtirtu a ni mek a ni.

KHAWTLANG RAWNGBAWLNA LAM:-
Naupang tê ni chungin kum 2012 khan Aizawl-a Local Council inthlan hmasak berah khan MNF ticket-in thlan tlin a ni a, Dinthar Local Council member tura thlan tlin zingah vote hmu sang ber te zinga mi a ni. Infiamna lamah pawh theihtawpa inhmangin hun rei tak chu Dinthar Football Club hruaitu a ni a, Aizawl West Zone Football Association-ah Honorary Secretary hmasa ber a ni bawk.

RAM RAWNGBAWLNA LAM:-
Pu Lalrinsanga Ralte hi naupang tê a nih lai atanga ram leh hnam vei em em mai a ni a, high school a kal lai atangin politics hi a lo tuipui viau tawh a. Ram leh hnam hmasawnna duhtu, Zofate inpumkhatna duh em emtu a nih avangin a thinlungah politics hi a thi thei tak tak lo va. Tichuan, College a kal lai, kum 1998 khan politics chu a taka luhchilhin MNF party-ah a lut ta a ni.

Party-a a luh rual hian MNF Thalai Block President niin bul a tan a, kum 2000 atang khan MNYF Headquarters-ah inhmang tanin nihna hrang hrang a chelh chho va. MNF Thalai General Secretary te hial a nih hnuah kum 2009 khan MNF Party Joint Secretary atana ruat a ni a. A kum leh, 2010 khan MNF party High Command member tur, ram pum huapa thlan chhuah mi 70 zingah a vote hmu sáng ber te zinga mi a ni chho ta zel a. Secretary-ah ruat zui nghal niin, chu nihna chu tun thleng hian a la chelh zel a ni.

Tichuan, ram leh hnam tana hna a thawhna tur kawng chu inhawng zau zelin, MNF Nomination Committee chuan kum 2018 MLA Election lo awm turah Serlui Constituency-a ding turin a ruat ta a ni. ‘Pathian leh kan ram tan’ tih a taka nunpuitu, mi harsa leh tanpui ngai a hmuhte tanpui lova kalsan ngai lo, rinawm leh taima taka Serlui bial mipuite tana lo thawk thintu Pu Lalrinsanga Ralte hi Serlui bial mipuite’n kan ban phak MLA kan neih ngei theihna turin i vote theuh ang u.

"Pathian khawngaihna avang leh kan hotute duhsakna avangin Serlui bialah MNF party candidate tura ruat ka ni ta a. Kan bial mipuite tanpuina, tawiawmna leh thahnemngaihna tel lo chuan engmah lo mai ka ni dawn si a. Kan bial, Mizoram chhuahka leh luhka ber hi tihhmasawna awm a, bial hmasawn chak tak kan nih theihna turin, khawngaih taka in vote hlu tak min pe turin ka ngên takzet che u a ni.
In tana hnathawh hi ka duhthusam ber a ni a; min thlang tling a nih phawt chuan, khawi hmunah pawh, engtik hunah pawh, in bialtu MLA, in innghah ngamna, mitin ban phak MLA nih ngei ka tum ang." - LALRINSANGA RALTE (RSA)

Issued by MNF Serlui North & South Block

No comments:

Post a Comment

Post Bottom Ad