Mizorama inthlan kaihhnawih thil buaina thleng mek chungchang a hmuna enfiah turin Election Commission Team chuan Aizawl an lo thleng a, ECI Teamah hian Jharkhand State CEO L Khiangte, Director of Election Commission Nikhil Kumar leh Election Commision Secy SB Joshi te an tel a ni.
ECI Team hian vawiin tlai khan NGO Coordination Committee meeting an neihpui nghal a, meeting chungchang hi ngaihchan a ni a, Mizoram Kohhran Hruaitute Committee nen dar 6 leh a chanve khan inbe leh tura ruahmanna siam a ni.
Election Commission in a tih anga Mizoram State Home Secy Pu Lalnunmawia Chuaungo sawn anih avanga lungawilo Tlawmngai Pawl hrang hrang intelkhawmna, NGO Co-ordination Committee chuan a hektu ni a puh Chief Electoral Officer (CEO) SB Shasank-a Mizoram atanga sawn chhuak turin vawiin khan Mizoram hmun hrang hrangah ‘Hnam Hnatlang’ thawh a ni.
Aizawl-ah chuan Treasury Square-a Chief Electoral Officer office tualah mipui thahnem tak pungkhawmin hmar lamah Vanapa Hall kawt thlengin mipui an khat a. Chhim lam kawngpui leh Tennis court chhehvelah pawh mipui an pungkhawm a. pungkhawmte hian Bru-te’n Mizoram pawna vote an thlak an duh loh thu te, inthlanna dik leh felfai neih theihna tura daltu ni a an hriat CEO SB Shahsank-a an duh loh thu leh haw tura an duh thu te au rualpuiin thu ziak te an keng bawk a ni.
Hnam chhan hnatlang hi Central YMA Vice President Pu R Lalngheta’n kaihruaiin, Central YMA General Secretary Pu Lalhmachhuana’n Bru-te’n anmahni camp-a vote an thlak lohna tura Chief Election Officer hnenah pawh an thlen thin thu sawiin, Mizo mipui zawng zawng duh dan an thlen te ngai pawimawh loin a tlem zawk Bru-te ngenna chu hun rei lote chhunga tihhlawhtlinsak a nih thin a ti a. Central YMA President chuan Dan hnuaiah Mizo officer pakhatin hma a la a, tute emawin an ngaih theih loh avanga rang taka ‘action’ an lak theih laiin, Mizote chu khaw dang sial hmuhin a hmu ta em ni, tih chu a zawhna a nih thu a sawi.
Mizoram atanga CEO a chhuah a, Bru-ten vote an neihna hmun ngeia vote an thlak theihna tura an hmalakna chu tha thlah loa a tawp thlenga beih zel an tum thu a sawi bawk.
Hnam chhan hnatlangah hian Mizoram Upa Pawl, MHIP, MZP leh MSu Gen. Hqrs. President \heuh ten thu an sawi bawk a. Aizawl-a Hnam hnatlang neih a nih lai hian sumdawnna hmun tam zawk chu a inkhar a, sorkar hnathawk te pawh Office kai mumal loin zirna in te pawh khar an ni a, buaina engmah chhuak loin hnatlanga thawkte hi chawhnu her hretah NGO Co-ordination hmalakna ngaichang rih turin an tin a ni.
Lunglei-ah pawh NGO Co-Ordination Committee huaihawtin DC Office tualah Hnam hnatlang thawh a ni a, MZP Hqrs. Lunglei President kaihhruaiah hian YMA, MUP, MHIP, MZP, MSU leh Chhimbial chhantu aiawh ten thu an sawi a, mipui kal an thahnem hle tih Lungleia kan Corr. chuan a sawi a, tawngtairualna te neiin tlai dar 3 thleng DC Office tualah hian thut a ni a. DC Office leh Election Office te pawh kharin hna an thawk lo a, sorkar office, zirnain leh dawr te pawh khar vek a ni a, buaina chhuak erawh a awm lo a ni.
Champhai Dist. Joint NGO bul tumin Hnam chhan hnatlang, Keifangtlanga DC Complex-ah buatsaih a ni a, Jt. NGO Comt. Vice Chairman kaihhruaiah hian Tlawmngai Pawl hrang hrangte’n thu an sawi a. Sikul, office leh dawr te khar a ni.
Serchhipah chuan DC office peng IOC-ah NGO Coordination huaihawtin mipui 2,000 chuang pungkhawmin, NGO Coordination Secretary, YMA Sub hqrs Secy ni bawk Pu Lalrammawia kaihhruaiin sit-in demonstration neih a ni a, Sub hqrs YMA, MUP, MHIP MZP leh MSU Sub-Hqrs. President-te’n thu sawiin, CEO Shasank-a Mizoram atanga chhuak tura an duh thu leh Mizote tanrual a tul thu an sawi a ni.
Mamit-a chuan zing dar 8 atangin Mamit khawpui chhungah Total Bandh huaihawt a ni a. Bandh hian mipui thlawp a hlawh that avangin chhun dar 12-ah tihtawp a ni.
Kolasib-ah chuan All NGO Coordination Committee huaihawtin DC office tualah Hnam chhan hnatlang neih a ni a, mipui an thahnem hle tih kan Corr. chuan a sawi a. Sorkar pisa, zirna in, Bank leh private company office te bakah dawr thenkhat khar a ni a.
All NGO Co-ordination Committee hian resolution siamin DC hnenah an thehlut a. An resolution-ah chuan CEO Shasank-a chhuak tura an duh thu sawiin, Tripura Transit Campa Bru awm, 2nd Summary Revision of Electoral Roll 2018-a paih tawh, dan lo anga Kolasib DEO-in electoral roll-a thun a tum an ti a, chu chu tha an tih loh thu leh, paih hlen vek tura an duh thu an tarlang a. Roll-a Bru-te thun tum chungchangah hian an innawr zui a ni.
All NGO Co-Ordination Committee ten vawiina Mizo Hnam Hnatlang an koh hi Lawngtlai District-a Tlawmgai pawl lian ber, Young Lai Association chuan an thlawp thu thuchhuah siamin an sawi a. CEO SB Shashank-a’n Pu Lalnunmawia Chuaungo chungchanga hma a lak danah lungawi harsa an tiin a thil tih danah ram leh hnam hmusitna leh inthamlohna lian tak a awm nia an hriat thu an sawi a. NGO Co-Ordination Committee-in Mizoram mipuite tana hma an lak mekna leh Hnam Hnatlang an ko chu an thlawp tlat a, a tawp thlengin an thlawp zel dawn a ni , an ti a, Mizoram chhung ngei a hnam dang ten Mizote min rap bet zawng leh a hnuai chhiah zawnga hma an la thin chu thleng nawn tawh ngai lo se tih hi an ti a ni.
(AIR Corr. & PTCs)
Post a Comment