Naktuk tlai dar 5 thlenga Mizoram Chief Electoral Officer S.B Shashank-in Mizoram a chhuahsan loh chuan Thawhlehni zing dar 8 atangin Election Office hnathawkte pisa kai tur dang turin Mizo zawng zawng hnam chhan 'Hnatlang' a thawhchhuah Central YMA chuan a rel.
Nizan khan Vanapa Hall-a CYMA huaihawt Aizawl City huam chhunga YMA Branch hrang hrang hruaitute inhmuhkhawmna ah hian CYMA President Pu Vanlalruata chuan chanchinbumite zawhna chhangin Election Commission Of India (ECI) in ziaka Bru te'n Mizoram chhunga ngeiah vote thlak turin a ti a, a thu hi thlak lo tura a ngaih thu a sawi a. CEO hian anmahni Transit Camp ngeiah thlak tir tum ni-a a lan thu leh an thu neihna piah lama Tripura thlenga Roll Revision an tih duhna te avangte leh Mizoram inthlan chu ralmuang leh a fel fai ber nise a duh lai leh inthlan neih tawh renng rengah a ralmuang ber a nih laiin CEO hian sipai Company 40 a mamawh belh danah inthlan chu ralmuang lo se ti niawma a lan thu a sawi a. State sorkar pawh rawn lova ama thu-a thil a tih chu thil mak tak a ni a ti a. A kaihhruaina hnuaiah hian inthlan hi a felfai dawna an hriat loh thu a sawi a, buaina a chhuah hlauhna avang zawkin inthlanna fel fai a awm theih nan CEO S.B. Shashank hian a hna chawlhsanin Mizoram chhuahsan mai se tih chu an duh dan a nih thu a sawi a ni.
CEO S.B Shashank in Home Department Principal Secy. Pu Lalnunmawia Chuango leh State Sorkar puhna ECI a a thlen chungchangah Pu Vanlalruata chuan State Sorkar a puh a nih chuan a chungah Chief Secretary a la awm a, Chief Secretary thu lo in Central Sorkar dawr theih a nih loh laia, Chief Secretary mawhphurh tir lova Principal Secy Home changtu puh a nih lai chu mak an tih thu a sawi bawk a ni.
Hetihlai hian vawiin tlai dar 4 atang khan Chief Secretary Pu Arvind Ray hovin Chief Secretary Conference Hall-ah Mizoram boruak chungchang thlirin an inhmukhawm a. Hetah hian DGP, Chief Electoral Officer, IGP (Headquarters), IGP (Intelligence), Aizawl district bawrhsap, Additional Secretary Home leh Additional CEO – II te an tel a ni. He thu ziah lai hian an la thukhawm mek a ni. -AIR Aizawl
Post a Comment