ECI DELHI PALAITEN MIZORAM AN RAWN TLAWH DAWN
Nov 5, 2018(MSR): Election Commission of India (ECI) New Delhi a thawktute chuan Nov.28, 2018 a Mizoram State Assembly Election lo awm tur chu an ngaihven hle a. Tun hnaia Mizoram CEO S.B. Shashank, IAS (conferred) in diklo taka a aia senior zawk Mizo pa, IAS val Pu Lalnunmawia Chuaungo, Principal Secy to the Gov’t of Mizoram chu Tripura State a Bru refugee chungchanga ngaihdan in an loh vanga ECI, Delhi hnena a hekna avangin, Pu Lalnunmawia sawn per tak lawp chungchangte leh Election kal pui a tum dan chu Mizoram leh Mizo Hnam tam him tawklo leh thildik tawklo a awm tih vangte leh Mizo Hnam hmusit a an ngaih vangin CEO SB Shashank chu Mizoram chhuahsan tura Nov 5 ni tlak hma thlenga hun an pek chungchangte leh All NGO Co-ordination Committee duhdante rawn ngaihven a, endik tuma lo kal tur Official te Nov 6, 2018, chawhnu 1:53pm ah Jet Airways Flights# 9W-881-in Lengpui Airport an lo tum dawn a ni.
Airport lamah te pawh buaina siam lovin, mipui sang tela lo hmuah chi an ni mai thei e! He hun hi Mizo Hnam tanrualzia tarlan hun remchang tur a ni. Ni khat chauh chu i ram leh hnam tan pen chhuah tum rawh. I inchhir ngai lovang! Zak suh. Mizo ni si a tel ve loh kha zak zawk ang che. Political party thil a ni lo. Mizo Hnam issue a ni e.
ECI Team te hi 3 an ni ang a, Pu L. Khiangte, IAS, CEO Jharkhand State in a rawn ho ang a; Shri Nikhir Kumar, Director, ECI leh Shri S.B. Joshi, Secretary ECI te an ni dawn a ni.
Mizoram Kohhran Hruaitu Comtt (MKHC) te chu ECI-CEO leh All NGO Co-ordination Comtt inkarah palai hna thawkin, Nov 6 a “Mizo Hnam Hnatlang” kohva, Governor North Gate leh CEO Office inkara Mizo mipui a tam thei ang ber S.B Shashank office kal dang tura hnatlang an koh chu a muan awm (Peace Rally) zawng kal pui ni se, tia an ngen angin naktukah mipui sang tam tak pungkhawmte chuan buaina leh harsatna te siamlo tura beisei an ni. Ruahman lawk angin “Mizo Hnam Hnatlang” chu zing dar 7am atangin kal chhoh pui mup mup a ni tho dawn a ni. Aizawla i awm chuan tel ve ngei tum ang che!
Chapchar Kut vela “Tawlhloh Puan” leh “Thangchhuah Diar” khim mawi sa tliah ngawt anglo deuhvin, naktuka “Mizo Hnam Hnatlang”ah chuan mipui tam takin, kan Pi Pute hun laia “Tawlhloh Puan” an bah tawh chuan pen khat pawha hnungtawlh an tum chhin ngailo angin, Mizo rilru takin an rawn bat chhuakin, an khim tial fer fur mai thei. Naktukah chuan Mizo mipui, Mizo Hnam chhan hnatlangte chu Governor North Gate leh CEO Office inkarah an tlim cham hmur mai turah ngaih an ni.
Hetih lai hian S.B Shashank-an diklo taka a hek vanga Mizoram atanga sawn chhuah thut Pu Lalnunmawia Chuaungo, IAS chuan vawiinah New Delhi thlengin, Delhi khawpuia DMZP te chuan “Tawlhloh Puan” nen ropui takin an lo hmuak a ni.
Pu Lalnunmawia Chuaungo hi Mizoram Finances & Accounts Service Association (MF&ASA) Gen. Hqrs, Aizawl chuan a thiltihah diklohna a nei lova, an thlawpin an tan tlat tih thuchhuah siamin, he an pawl thuchhuahah hian Secy Pu Thara Lungtau leh President Pu Ramchuana te chuan hming an ziak a ni. ~ CT Lalrinawma
Post a Comment