Mizoram Assembly Speaker Pu Hiphei chuan naktuk hian Speaker atanga a banna a thehlut dawn nia thudawn a ni.
Thudawn danin Pu Hiphei hian chawhma dar 10-ah Speaker pisa-ah kalin hunserh a hman hnu-ah Deputy Speaker Pu R. Lalrinawma hnenah banna a thehlut ang a, Congress party member a nihna atanga a banna a thehlut zui ang a, chutah BJP Office Atal Bhavan-ah lawi lutin BJP zawm ang a, thu sawiin chhun dar 12-ah chanchinbumite a kawm ang. Hetihlai hian Pu Hiphei bial, Palak assembly bialah chuan rorellai Congress party chuan MLA hlui Pu K.T. Rokhaw an candidate dawn nia rin a ni.
Mara Autonomous District Council a Parliamentary Committee chuan Zirtawpni khan resolution siamin Siaha assembly biala Pu S. Hiato leh Palak bialah Pu K.T. Rokhaw din tir turin rawtna an siam a. Pu Rokhaw hi Pu Hiphei leh Pu K. Riachho inchuhna kara a thelhna atana MDC tam zawkin an pawm theih a nih thu dawn a ni.
Pu Hiphei hi Mara Autonomous District Congress Committee (MADCC) a nomination board chuan Palak assembly biala ding turin rawtna an siam a. Mahse, Palak bial chhunga Congress MDC 11 zinga 6 chuan IAS chawl tawh Pu K. Riachho an duh zawk thu rorellai MPCC president Pu Lal Thanhawla hnenah an thlen ve thung a. Rei fe an inkar tawn hnu-ah Pu K.T. Rokhaw din tir tur hian an sir tluk ta a ni. Pu Hiphei hi Palak bialah hian BJP candidate a ni dawn em tih a la hriat loh ni a thudawn a ni. - AIR Aizawl
Post a Comment