Serlui Bial MLA Candidate Pu Lalmuanpuia Punte Chanchin Thenkhat


Pu Lalmuanpuia Punte Pu Lalmuanpuia Punte hi Pu Thanzama leh Pi Rokhumi (L) fa hmasa ber niin kum 1967 May ni 16 khan Ṭuahzawl khuaah a lo piang a, anu hi kum 1984 khan a boral. An unau hi an vaiin 10 (mipa 5 leh hmeichhia 5) an ni. Kum 1990 khan lalhmachhuani nen innei in fanu 2 an nei a. Aizawl Kanan Vengah an khawsa mek a ni. Amah hi Salvation Army kohhran niin Kanan Corps ah an lawi a, Corps council member niin Missionary Board leh Building Board ah Assistant Secretary ani bawk.

Zirna lamah chuan BA a ni a. Kum 1981 khan Pianghleia High School, Electric Veng, Aizawla a kal laiin MZP leh Mizoram police inhmuh thiam loh tan tirh a Aizawl PS khawlai a Zirlai pungkhawm hnawhdarh nana Mizorama a hmasa ber atana tear gas an hman ni khan pungkhawm hnawhdarh zingah tel vein heta ṭang hian a rilruah politics a lut ṭan a. Kum 1989 khan Ṭuahzawl khuaah MNYF Secretary ah ṭangin , ahnuah Aizawl Kanan Veng MNF Unit Asst. Secretary ah aṭang leh a, Aizawl West II Block MNYF Committee memberah tel chho zelin a hnuah Block pui Joint Secretary ah a awm chho leh a, tichuan politicsa tuina leh a activity te avangin MNYF Headquarters (Hnam Run) ah kum 1991 kum laihawl vel aṭangin Organiser ah lakluh a ni chho ta zel a. MNYF Headquarters ah hian Joint Secretary thleng nihnaa chelh hman a. Hetih lai hian All Mizo Students’ Association (AMSA) ah Executive members a ni bawk.

Kum 1992 khan Mizoram sorkarin MBBS zirtur an thlan danah thil fello a awm a, hnamdang 5 lai thlan an nih avangin zirlai pawl hrang hrang kalkhawm ten sorkhar thiltih dik loh dodal turin Mizo Students’ Joint Action Committee (MSJAC) an dinna zingah telin Vice Chairman ah thlan a ni a. MSJAC chuan nasa takin Mizoram sorkar thiltih dik lo chu sawiselin Aizawl ah kawngzawh te leh Mizoram pum huap total bandh te an huaihawt hnuah pawh sorkarin a thiltih diklo a sut duh loh avangin buaina nasa tak a chhuak ta a, zirlai tam tak man an ni a, amah pawh hi Aizawl DC an dawr laiin DC office chhungah a ṭhian dang 3 nen man an ni a. Zirlai an man nasat avangin Aizawl jail a khat vek tawh si a, zirlai tam tak nen Kolasib jail an sak zawh tawh pawisa awm loh avanga luah theih loh chu chawpchilh taka chei tharin a luah hmasa ber tuah an ṭang a, hemi atanga tun thlengin Kolasib jail chu luah zui a ni ta zel a ni.

Buaina a nasat em avangin Mizoram sorkar pawhina thltih dikloh chu sutin Mizoram quota a MBBS zirtur hnam dang a thlante pawh paiha Mizo an dah leh tak avangin buaina pawh a tawp zui a MSJAC pawh chu a tawp zui ve ta nghal a ni.

Pu Lalmuanpuia Punte MSJAC a tawp hnu hemi kum vek , 1992 kum tawp lamah Mizoram sorkar in Mizoram Gurkha te hnenah ram leilung fa ang hial dinhmun pek a tum avangin a dodal turin Mizo National Students’Joint Action Committee (MINSAC) a lo ding thar leh a. A din atanga reilo te ah Chairman Lalruatkima a inhnuhdawh avangin Vice Chairman Vanlalsawma chu Chairman ah thlan a ni a, Vice Chairman hmun ruakah chuan a awmloh hlanin thlan a ni leh ta a. MNYF Headquarters a Joint secretary ni reng chunga zirlai pawla inhman chu ṭha lo tiin, ram leh hnam tana zau zawka inhman tumin MNYF party active worker nihna chu kum 1993 kumtir lam khan a lo chawlhsan ta a ni.

Hetihlai hian MZP chu a chaklo em em mai a, zirlai pawl hrang hrang a tam em em mai a. Chutia zirlai pawl hrang hrang awm chu tha lo tia inzawmkhawm tuma hmalaknaah a sulsutu ber zinga mi a ni. Kum 1993 kum tawpa Mizoram election lo awm tur um a a thiante political party a luh tumte pawh lut lo hram tura ngenin, “Mizoram leh hnam siam ṭhat nan keini ho hian political party kan luhchilh ni a la awm ngei ang tih ka ring, mahsela tunah hi chuan Mizo zirlai pawl hlawmkhat siam a party pawn lama Mizo hnam tana hna kan thawh a tul hrih a ni, kei ngei pawh party active worker atanga chawlin helamah hian inhman ka tum a, I bei tlang ang u” tiin a sawm ṭhin. Tichuan aṭhiante nen nasa taka an beihna chu hlawhtlingin kum 1993 khan zirlai pawl hrang hrang te chu MZP ah lungrual takin an inchhungkhawm thei ta a ni. Adhoc in President atan hnawn a ni ta, Assembly kovin President atan thlan tlin a ni zui leh ta a ni.

Kum 1994 a Mizoram leh Cachar inkar kawnglaih Mizoram sorkar in a tihtawp thut avangin Mizoram sorkar nawrna atan MZP chuan Vairengteah kawnglaih hnatlang an kova, Police ten manin Jailah a tan phah leh ta a. MZP President a nih lai hian MZP in CHAKMA FOREIGNERS QUIT ORDER tichhuakin, nasa takin sorkar nen innawr foin Jail a luh phah tam hle. MZP President ah vawi 3 (Adhoc nen vawi 4) thlantlin a ni a. Kum 1993a MZP an tharthawh leh atangin term khat aia tam President nihna chelh awmchhunleh President naupang ber ani. Hetih lai vel hian Mizo Youth Convention ah a theihtawkin a inhmang bawk. MZP President a nih loh hnuah pawh MZP chhuahsan lovin MZp ah nasa takin a inhmang chhunzawm a. Politics luhchilh lovin ram leh hnam humhalh kawngah ke nasa takin a pen ṭhin.

Kum 1999 ah North East Students’ Organisation (NESO) Vice Chairman niin; he nihna hi kum 2012 thleng khan a chelh a ni. NESO Vice Chairman a nih chhungzawng hian NESO a athawhpuite thuikhawmtu leh an chak loh deuh lai pawh a NESO dawmkang rengtu a ni. NE state danga zirlai hruaitu ho zingah chuan a lar ber leh thunei ber pawl mi 3 zinga pakhat a ni ṭhin. NESO Chairman Dr. Samujal Bhatacharya phei chuan, “Punte-a hi NESO chakna thahrui, kan mutthluk laia min kaithotu leh chakna min petu, min nawr nung reng ṭhin tu a ni. A ni hi awm lo se NESO hi hetiang dinhmunah hian kan ding lovang” a ti fo ṭhin.

Zofate inpumkhatna veimi leh duh em em tu a nih avangin kum 19994 atangin ZORO ah inhmangin Secretary te, General Secretary ni chhovin tunah hian Vice President a ni mek a. Zofate inpumkhata rorelna pakhat hnuaia kan awm theih nan nasa taka inhmangin kum 2002 leh 2003 khan Geneva ah Indigenous Peoples pual bika an buatsaih UNO session hrang hrang ah ama senso intum chawpa kal in; thu te pawh vawi 2 lai a sawi a ni. ZoRO hmalakna in UNO kher lo foreign hmundanga Indigenous conference ah pawh a kal fo ṭhin. Kum 2004 December thlaa Asia khawmualpui huapa terrorism chungchanga inrawnkhawmna Asia Consultation on Terrorism and Anti Terrorism Measures ah pawh Mortheast aiawha kal mi 3 chauh zingah a tel pha a ni.

Ram leh hnam vei mi a nih avangin Zoram humhalhna atan Mizoram pum Tribal Area a lo nih theih na turin Mizoram District awm zawng zawng hi Autonomous District Council a siam vek nise tih kum 1994 a MZP Assembly, Lungleia neih tuma passed chu a vei em em a. MZP in thildang ngaihtuah tur hmanhmawh thlaka neih fo avangin hmala hman lo mahse a rilruah he thil hi a thi ngai lo. Hmasawnna inkhairuallo lutuk, Aizawlin Mizoram budget tuihang ṭha zawng zawng an hui vek bik nia ngaiin thingtlang lam mite lo changkan ve theihna tur leh development inkhairual zawk nan district zawng zawng ADC a siam vek a ṭul hle nia ngaiin kum 1999 khan AUTONOMOUS DISTRICT COUNCIL, HNAM INPUMKHATNA NGE INTHENDARHNA? tih booklet copy 20,000 zet siamin a thlawnin Zoram dun tluan ah a sem darh a, thingtlang mipui ngaihven a hlawh hle. Mizorama Panchayati Raj hman rawtna awm chu a tha lo nia ngaiin kum 2001 khan PANCHAYATI RAJ LEH SIXTH SCHEDUL KHAIKHINNA tih booklet copy 10,000 lai mai a siam leh a, athlawnin hei pawh hi a sem darh leh bawk. Mipui ngaihven ahlawh hle.

Hel pawl hrang hrang hian an hel chhan hrethiamtu mi langsar deuh palai atan an hmang fo thin. Naga ho pawhin Pu Zoramthanga pawh an hman thin kha. Chutiang bawkin HPCD te pawh in a booklet pahniha ADC ṭhat zia a thehdarh vak avang leh a hnathawh tawh dangte an hriat in Hmar tawng thiam miah lo mahse PALAI ATAN an sawm ta chawt mai a, HPCD leh Mizoram sorkar inbiak naah palaiah a ṭang ve ta hial a ni. Hmar chungchang lovah pawh Manipur lama Zohnahthlak hnam hrang hrang te harsatnaah pawh palaiah a lo ṭang fo tawh thin.

Aizawl khawpui inawp dan fello lutuk hi a vei em em ṭhin a, Municipal Aizawl khawpuia hman ve duhtu Pu C. Lalramdina (L) kaihhruaiin kum 1999 March ni 29 khan Aizawl pa zahawm tak tak sawmkhawmin ngaihtuahtu pawl Mizoram Municipal Steering Committee (MMSC) an din pui a, general Secretary ah ṭang nghalin tun thleng hian he nihna hi a la chelh. AMC lo din theihna turah pawh a mawhphurtu zingah a tel ve phak a ni. PRISM ah pawh active worker ni ve lo mahse a din tirh atangin member rinawm tak a ni a, an programme ah a bang ngai lo. India state tam taka an chin thar inthlan chik taka en thlithlaitu pawl Mizoram State Election Watch Committee dintu zingah tellin, Vice Chairman a ni a, Tuivawl bialah din a tum avangin he nihna hi a bansan ta a ni.

Mizo hnam inpumkhatna duh em em tu a ni a, Duhlian tawng hmang lo te a ngaihsakin an harsatnaah a tanpui peih em em a ngainat pawh a hlawh hle. Paihte hnam phei chuan kum 2012 khan Khuado Kut an hman naah Mizo hnam impumkhatna atan a hnathawhte ngaihhlut sakin chawimawi nan Paite puan an pe nghe nghe. Hmar Students’ Association pawhin chawimawna thuziak leh Hmar puan an pe. MSU General Hedqtr. pawhin Mizo hnam inpumkhatna atana a thawhrim avang bawkin chawimawina thuziak an pe bawk.

Mizo hnam insuihkhawmna duhtu a nih angin HPCD ten an area chhunga YMA din khapna order an siam a seal hial an thehluh tir khan a rilru a tina em em mai a, inpumkhatna tichhe theitu tur a ni tih hriain order sut tir leh theih dan a ngaihtuah thin. Mizoram Hmar Welfare Committee din a Vice Chairman a an thlan khan; a awmloh laia thlan mah ni se hun remchangah ngaiin a pawm nghal a, theihtawp chhuaha hma la nghal in kumin June thla tawp khan he order hi HPCD chuan a sut ta a ni. Hei mai bakah HPCD ten Hmar khaw 15 laia VC inthlang thei lova an siam pawh MHWC ngenna avangin inthlanna muanawm tak neih theih a lo ni leh ta bawk

Post a comment

Powered by Blogger.