Unau 3 IAS Tling Thei Chuaungo Chhungkua - Lalthara, Lalsawta leh Lalnunmawia Chuaungo - TIMES OF MIZORAM

Breaking

Home Top Ad

Post Top Ad

Unau 3 IAS Tling Thei Chuaungo Chhungkua - Lalthara, Lalsawta leh Lalnunmawia Chuaungo

Unau 3 IASMizo zingah mai pawh ni lovin India ram chhungah hian unau pathuma IAS Officer ni thei hi sawi tur an tam vak lovang. 

Reiek khua Pu Ngama (L) leh Pi Laithangpuii-te fapa pathum Lalthara, Lalsawta leh Lalnunmawia-te unau chuan Indian Administrative Service (IAS) hna ah an tling veka, an farnu Dr Lalhmasaii Chuaungo pawh hian Mizoram University hnuaiah Reader & Head, Department of Education-ah hna a thawk mek bawk.

Pu Lalthara IAS, Nagaland State-a Chief Secretary hna lo chelh tawh hi 1975-ah IAS hna a inziak tling a, he mi hma hian IPS hna hi 1974-ah pek a lo ni tawha, IAS a exam theih na chhan hi he tih lai hian a kum hi IAS atan a la tlem vang a ni. IAS ni tur hian kum 21 a nih a ngai, Pu Lalthara hian he tih hunlai hian a la pha lo a ni.
Unau 3 IAS Tling Thei Chuaungo Chhungkua - Lalthara, Lalsawta leh Lalnunmawia Chuaungo
Harsatna hrang hrang atanga lehkha rawn zir chhuak Pu Lalthara hian zirna lamah Reiek Primary School atanga bul tanin Middle School pawh an khuaah bawk hian a zir chhuak a, St Paul’s H/S atangin Matrict a pass hnuah Shillong lamah mahni in chawm chawpin lehkha a zir a, College a kal chunga lehkha a zir chhungin a unau dangte Reiek leh Aizawl lama lehkha zir mekte chu Shillong-ah chah thla in lehkha an zir ho a ni. 

A nau Pu Lalsawta nen chhun lamah hna thawkin zan lamah College an kal thung a, he tia harsa taka an zir hnu hian Pathian malsawmna dawngin 1974-a UPSC exam-ah kan sawi tawh angin IPS hna pek a nia, 1975-ah UPSC exam nawn lehin IAS hna hi pek a lo nita a ni.

Nagaland Cadre a nih angin Nagaland ngar ngar-ah sawrkar hna hi thawk kual ani deuh ber a, Nagaland District hrang hrangah te thawk kualin Bawrhsap hnate chelhin, Nagaland Sawrkar Officer zingah mipui hriat leh ngainat, An State sawrkar khaipa te zingah a tel ṭhin a, Nagaland pawhin an fak em em ṭhin ani.

Pu Lalthara nau Pu Lalsawta Chuaungo hi 1981-ah IAS ah a inziak tling a, IAS hna a hmuh hma hian 1979 kumah UPSC kaltlang tho-in Indian Account & Audit Service (IAAS) hna pek a ni a, hun enge maw chen he hna hi a thawh hnuin IAS-ah hian a tling chho leh ta a.

A ni pawhin Reiek atanga zirna rawn tan chhoin harsatna avangin a lehkha zir te chu hlothlawh a ngaih avangin a chawl a, a u Pu Lalthara’n Shillong lamah a hminga sawrkar hna han thawh tur a hmuh hnuah Cherrapunji lamah pawl 9 & 10 a zira, Assam Board hun lai khan HSLC hi First Division-ah a tling chho a ni. Shillong-ah inhlawhfa chungin lehkha an unauin an zir chho a, harsatna hrang hrang karah vawiin ni hi lo thleng chho an ni.

IAS a nihna hi West Bengal Cadre a nia, Ranchi-ah leh khaw dang dangah te hna pawimawh hrang hrang a chelh kual a, Mizoram sawrkar ah pawh hna pawimawh tak tak a lo chelh tawh ṭhin bawk.

An Unau zinga naupang ber Pu Lalnunmawia Chuaungo Gujarat cadre, IAS hna vuan mek chuan a u te zarah IAS a nih ve thu a sawi ṭhin. ‘Ka u te’n harsa takin lehkha an zir a, mahni inchawm-in, thi leh thau pawlhin hlawhtlin loh hlauin an zir chhuak a, kei erawh hi chu ka u te thawhchhuah sa ring a, harsatna em em pawh awm lova lehkha zir chho ka ni a, an mahni ang ka nih loh chuan a va zahthlak dawn em ve le tiin ka inngaihtuah a, chu chuan tan nasa takin min pe a ni’ a ti tawp.

Reiek khuah pawl 9 thleng a zira, a u te angin a thiam thei pawl ah a tang lo, Shillong atanga Matric a zawh hnuah, St Edmand’s College atangin BA (Hons) a zir chhuak a ni.
Unau 3 IAS Tling Thei Chuaungo Chhungkua - Lalthara, Lalsawta leh Lalnunmawia Chuaungo
A U Pu Lalsawta ang bawkin UPSC a exam hmasak in IAAS hna pek hmasak a ni a, kum hnih zen zawn a thawh hnuah UPSC exam-ah IAS hna hi 1987-ah pek a ni. IAS a nih hnu hian NEC hnuaiah Shillong-ah kum 1996 - 2001 chhung khan Deputation-in a rawn awm a, hemi hnu hian Gujarat lamah kir lehin Distict hrang hrang ah hna hrang hrang thawkin a awmleh tawh a ni. A nupui Pi Lalhruaitluangi nen hian fapa 3 leh fanu 1 an nei ani.

A cadre neihna Gujarat ah Sawrkar hna lian leh pawimawh tak tak a chelh ṭhin a, Tuna kan PM, Narendra Modi hi Gujarat CM a nih lai pawh khan a rinrawl ber pakhat a ni.

Kan hriat angin, Mizoram sawrkar ngenna in Mizoram ah lak chhoh ani a, Home, Finance & Accounts ah Principal Secretary hna a rawn chelh a, Mizoram tan a theihtawp chhuah duh mi, Hnam hmangaihna rilru luangliam nei mi leh, Dikna a ṭang ngam leh mi huaisen tak ani.

English medium kal.miah lo a, Unau 3, IAS a in ziak tling thei kan nei hi a ropui takzet ani.

Tuikuk, Chakma issue kan neih chhoh mek ah leh,Kan Hnam tan a thil tak tak ti tur hian Mizo tlangval IAS kan chhuah mawlh mawlh a va ngai ta em!.
Unau 3 IAS Tling Thei Chuaungo Chhungkua - Lalthara, Lalsawta leh Lalnunmawia Chuaungo
In awmtleina(Entertainment) hrang hrang a kan rik mup mup lai hian Chakma ho chuan min harhchhuah khalh tawh. Chakma IAS, IPS,etc.. ten dan leh thuneihna hnuai a Mizo te an khalh kawi tak tak hma hian i harhchhuak ila, UPSC exam ah tlin mawlh mawlh tum in a hnam a ṭhanharh a ngai ta... 

Tuikuk pawh Politics ah an mit a keu ta hle mai, Vote bank ang a kan politician ten an hman laiin an mahni hnam bil MLA te neih ve a, Constitution in minority tan a himna leh autonomous pek a sawi chu chang ngei turin Zirna leh Politics ah an harh mek e..

Heng kan mi hrat khawkheng, Unau 3 a, IAS tling thei te hi 'Role model' ah mizo ṭhalai te hian i hmang ang u, India ram a lehkha thiam tamna State kan ni a, Central Service kan chhuah tam chuan mizoram ah mai nilo, India ram huap pawn mizo te hi ngaihsan kan ni ang a, hnam dang pawn min zah em em dawn ani.


Ṭan ila sauh sauh ang u khai.

#IsraelElemZote

No comments:

Post a Comment

Post Bottom Ad