ZDF (Zoram Decentralization Front) chuan kan ram rorel dan kalphung (system) thlak turin an indin tih ni 20-09-2016 (Tuesday) khan Aizawl Press Club-ah Press Conference neiin an inpuang ta rup mai a, an hruaitute lah chu an insit hle mai a, ZDF Gen. Hqrs. Advisory Board te lah kohhran hrang hranga Pastor pension te leh Upa te an nichung pawhin an insit hle bawk.
An dinchhan ber chu : Mizorama roreltute rorel dan (system) - District Council hunlai atangin tun thleng hian sawrkarna siamtu party te han inthlak thin mahse, a mihring chauh an inthlak a ni mai a, an rorel dan kalhmang (system) erawhchu tunthleng hian a la pangngai pat reng si a, Hetianga rorel dan kalphung (system) that lo hem emna chu mi tlemte thuneihna leh hausakna, mi tam zawkte retheihna thlentu a lo ni ta hial mai. Hei hian hnam nun leh kohhran pawh nasa takin a nghawng mek bawk. Hetiang rorel dan (system) hi kalpui zel a nih chuan Zoram mipui tam zawk (70% vel zet) te nun leh khawsakna dinhmun chu a ngaihtuahawm hle dawn a ni.
Chuvangin, hetiang rorel dan kalphung (system) himlo tak hi hmangzui tawh lovin India Danpuiin state tinte hman tura a siam tlawhchhana National Commission to review the working of the constitution-in Mizoram tan bik a rawtna a siam - STATE RORELNA HNUAIAH RORELNA INKHAICHHAWNG 2 (pahnih): DISTRICT RORELNA (District Sawrkar) LEH VILLAGE RORELNA (Tualchhung Sawrkar) AWM RAWH SE, a tih hi kan ram rorel dan (system) thar atan hmang tura beihpui (Movement) thlak turin ZDF (Zoram Decebtralization front) hi din a ni tih an puang ta pawp mai a ni.
Rorel dan kalphung (system) tharah chuan mipuiin khaw hrang hrangah vantlang inkhawmin an khua leh mipui mawh atngin plan an siam ang. Tin, District aiawha rorel tura thlan ten thuneihna neiin ro an rel thei tawh ang a, khawtin leh chhungtinin kan chanvo kan chang thei tawh dawn a ni. India Danpui siamthat vawi 73-na hmanga District leh Tualchhung sawrkar siamin MIPUI RORELNA TAK TAK nei turin hma an la tan tih an puang a ni.
ZDF (Zoram Decentralization Front) hruaitute chuan, Mi lian leh thiltithei te, mifing leh remhria te leh thingtlang leh mirethei hmangaihtu inti ten a tak taka MIPUIIN THUNEIHNA NEIA RO KAN REL THEIHNA hi an hman duh si loh leh hetianga rorelna nei tur hian hma an lak duh si loh avangin kohhran hrang hranga pastor pension rual te nen ram rorel dan kalphung (system) thar a rorelna nei turin an auchhuak ta tih an puang a, ZDF hmalakna atang hian Mipui Rorelna tak tak nei tura beihpui thlak turin LUNGTE TE KAN AUCHHUAK TA A NI, tiin Press Conference-ah an inpuanna thu an puang ta a ni. HETIANG RORELNA DUHTU MITHA TAM TAK IN AWM TIH KAN HRIA A, MIN HRUAI TURIN KAN SAWM CHE U A NI tiin an inpumpek thu leh midang tan hmun an kian reng tih thu an puang tel bawk.
ZDF (Zoram Decentralization Front) HRUAITUTE: ZDF Gen. Hqrs. President Pu Lawmthanga, Vice President – Pu Biakzama, Treasurer – C. Lalmuanpuia, Gen. Secretaries: Jona L.Pachuau, Joseph Lalringkima, F.Lalrawna, VL.Huapa leh Secretary ah R.Zamawia te an ni. Advisory Board ah hian Pastor pension leh Upa te leh service retired te nen mi 30 zet an awm bawk a, Press Conference an neih ni khan Rev. Zaidarhzauva a lut ve nghal bawk.
ZDF Advisory Board hruaitute chu: Chairman - Rev.Liandawla, Vice Chairman- Rev.Lalchungnunga leh Rev.Darchungnunga te an ni a, Gen. Secretary- Upa Lalbiaktluanga, Secretary- Rev.Dr.V.Kapenga, Treasurer- Rev.C.Lianzuala te an ni.
@ R Thanga R Thanga
@ R Thanga R Thanga
Post a Comment