Prime Minister hlui thi ta, Bharat Ratna chawimawina pawh dawng tawh, Atal Bihari Vajpayee-a hriatrengna atana siam cheng za thir, vawiin khan Prime Minister Narendra Modi-a’n New Delhi-ah a tlangzarh.
Thu sawiin Prime Minister chuan Atalji-a chu a thih hma, kum 10 dawn chu vantlang hmaah inlan tawh lo mahse a thih hnua suntu leh zahna lantirtu a ngah zia atang hian hmangaih leh zah a hlawh zia a chiang hle a ni, a ti a, thusawi thiam, India ramin thusawi thiam ber a neihte zing a mi a ni, a ti bawk.
CHENG ZA THIR PRIME MINISTER HLUI ATAL BIHARI HREITRENG NAN
Mi thenkhat chu thuneihna an chan loh chuan an awm hle hle theih loh thu pawh sawiin Prime Minister chuan Atalji-a erawh kha chu hun rei tak eptu lam thutnaah thu mahse ram mamawh thil pawimawh a dinchhuahpui reng thei a ni, a ti a, democracy dinhmun sang ber chantir reng chu Atalji-a duh dan a nih thu leh ngaihdan leh duhdan ringawt kalpui thin mi a nih loh thu a tarlang bawk.
Cheng za thir tlangzarh inkhawm hi Parliament House Annexe-ah neih a ni a, Lok Sabha Speaker Sumitra Mahajan, Union Finance Minister, Arun Jaitley, Culture Minister Dr Mahesh Sharma-te bakah BJP hruaitu senior LK Advani, BJP President Amit Shah leh midang thahnem tak an tel a ni.
Naktuk hi Atal Bihari Vajpayee-a piancham vawi 94-na a ni a, a lawm nan Good Governance Day atan hman a ni ang. - AIR
Post a Comment