PARTY SAWHKHAWK TUR THLIRNA - PAWLITIKS THUZIAK - TIMES OF MIZORAM

15 Dec 2018

PARTY SAWHKHAWK TUR THLIRNA - PAWLITIKS THUZIAK

PARTY SAWHKHAWK TUR THLIRNA 

"Lo tla tla ta se" tih hmangin 10th October khan thu ka lo ziak tawh a, inthlan hmaa ka ziah a ni a, a danglam thui lo, kan thual leh teh ang.

Mizoram Minister 2019

CONGRESS -
MLA 34 atangin MLA 5 neiin an tla ta a, engtin nge an awm zui zel ang le. Ka thuziahah khan an tla a nih chuan Pu Hawla hian AICC ah MPCC President atanga banna a thehlut ang tiin ka sawi a, a thleng dik lo. 1998 a chiang taka an tlak tum khan rang takin AICC ah banna a thehlut a, an pawmsak lo a nih kha. Tun tuma an tlakna ah hian ni 5 a liam pawhin banna a la theh lut lo thung.

Aizawl Post 12th Dec chhuakah chuan Politics chawlhsan a tumna a rei tawh thu leh ama thu a nih lo thu a sawi tarlan a ni a, MPCC President atanga chawlh chungchangah pawh Party in an thlan leh thlan loh a nih thu in a chhang. Kum 80 ral a kai ve tawh a, AICC ah hian banna thlen sela an pawm tawh hial maithei. Pu Hawla hi chawl ta se an buai laihin a rinawm. Pu CL.Ruala, Pu Zodintluanga, Pu Lalthanzara te hi a thlaktu tura langsar an ni ngei ang.

Tun inthlana an tlak hian nghawng a la nei chho zelin a rinawm a, Opposition Leader tak ngial pawh hauh pha lovin an awm leh nghala, kum a thar anga chhuak pheuh pheuh an awm leh ngei ang. Hruaitu kawmah Pu Hawla thlak duh tawhna inhruipawhna a nasat viau leh hruaitu inchuhna a nasat viau phei chuan keh chhe takin an awm zui lovang tih a sawi theih loh. Party chhungah pawh hian thlak duhna a ri ve zauh zauh niin an sawi. Central lamah Congress a harh thar erawh chuan boruak a rawn keng lut ve mai thin a, Mizote ah erawh Family ngai reng chuan a kai harh zo tawhin a rinawm loh. Hruaitu lawkah Change an mamawh tawh. Pu Hawla hian nachang hria se, Party President atanga chawlh hi an Party tan a tha ber tawh tih hmu thiam se an la thatpui leh ang. A Pu Hawlna a rei tawh e mai.

ZPM -
An ni hi MLA nei miah lo atangin MLA 8 an nei thei a, hotupa ber bial 2 ah a tling bawk a, an phur surh surh khawp mai. An phur mah mah a tih theih tep. Kar khat em pawh a la vei lova, MPCC lam leh Pu Hawla pawhin puitling takin an tlak an pawm thu leh MNF duhsakna tawngkam mawi an hlan mawlh mawlh laiin ZPM hotupa Pu Duha chuan 'An kum a upa sawt tih bak thil thar hmuh tur a awm lovang' tih te a sawi nghal vut vut a, mipui mawhpuhna rawngkai lek lek hriattur a awm bawk. Pu Duha hian kum 5 lai Sorkar beihna hun a nei dawn a, a hmanhmawhin a phur hle tih a hriattheih.

ZPM hi inthlan hma khan Independent Candidate an nih vangin BJP in an leikhawm vak mai ang tih hlauhna a awm a, hlauh tur pawh a ni. Rin loh takin an phur a, tunah Party khata intelkhawm tumin Constitution duang tur an in din nghal ulh ulh mai. MPC lam pawh hian an remti tawh niawm tak a ni. Hetianga an kal chho a nih chuan beisei awm tak an la ni chho dawn a, Congress ai hian an rawn dingchang hmasa tawh ngeiin a rinawm.

Hotupa ber Pu Duha hi a pawimawh dawn a, Party inremkhawm pangngai anga kal ve tum mai se, Party President, GS etc siamin heng VUC, CAUCAS, Steering Committee te hi thiat vek se an rinawm zawk ang. Pu Duha hi Congress nena sawi zawm a awm leh thin hi thil pawi tak a ni. Vote thlak dawn tep leh Result puan hma khan Sorkarna siam zo an awm loh chuan ZPM leh Congress an thawh ho tur thu kha a ri ring hman leh hle a nih kha!! An aia dinhmun chhe zawk Congress in intei len nan thiam takin an la rawn zim leh ngei dawn a, heng hunah hian Pu Duha hi a tal pelh tlat thin. 2023 inthlan thlir rana kum/thla uluk taka an chhiar chhoh a Party pakhata Solid taka an kal chuan MNF thlak tu turin kan pawm thlap tlang tawh ngei ang.

Mizoram Chief Minister

MNF -
Ruling an ni a, sawi thui angai lem lo, Pu Zorama CM hmasak khan kan Budget kha Vbc.550 vel a ni a, tun Sorkar ah hian Vbc.9700 a ni chho a, tun Financial Year ah hian 20% in a pung chho leh dawn niin an sawi. CM pahnih Budget enkawl zat inthlau tak thir chuan an pahnih rau rauah Pu Zorama hi a taima in hna a thawk nasa zawkah ka ngai.

Pu Zorama leh Pu Tawnluia hi chuan an mimal tan 2023 hi chu thlir tawh lul lo se, hmingtha tak leh hnuhma ropui tak hnutchhhiah tumin tun Term hi hman tum sela, Party lamah pawh anmahni thlaktu tur ruangam tarlang thiam se a lawmawm ngawt ang. Kum 75 vel bawr tawha Term 2 an la thlir lui ve ngat ngat a nih chuan an mimal mai nilo an Party ti chhetu bulpui ber an ni ve tawh ngei ang. MNF hruaitute ah hian 2023 ah chuan CHANGE hmuh kan duh thup tawh dawn a, a thleng lo a nih chuan an beisei aia reilo an Sorkar maithei bawk. Party emaw hruaitu dangte atanga nawr chi a ni lova, anmahni nachang hriatnaah Party a in nghat ang chu.

BJP -
Central ah rorel lo se chu an tiahvai maiin a rinawm. An MLA neih chhun hi Assembly House ah pawh Rest Room atan Congress emaw ZPM emaw Room a zawm thei ang tih a nih hmel a, an ropui teh chiam lo. Party President leh a thawhpui inkarah Strategy inhmu tawk lo a awm a, an buai phah a nih kha. Hruaitu vengva thenkhatin tun inthlan thlir lovin 2023 tinzawn ila, tunah chuan Mizote leh BJP inkar siamthat a, in ngaihzawn tir phawt a ngai an tih laiin hruaitu lawk ten MLA neih hrim hrim tuma hma an lakna chu Mamit ah Tuiuk lamah a puakkeh a, mipuiin a hma aiin BJP kan huat phaha, Party dang hial pawhin BJP an in thawhpui loh siak a ni ta ringawt a nih kha!! Mizorama hian BJP MLA 5 tal nei tur pawhin suma sual chhuah chi niin a lang lo. President atangin thlak an ngai.

PRISM -
An ni ho hi 4/5 chu awhawm ve tak an awm a, an Policy a ropui viau bawk. Anmahni lawnga kal tum ngar ngar lo hian ngaihtuahna thar siam se, mihring tlemte awmna Mizoramah hian Party awm duah hi tul lo ti a tam zawk kan ni ang. Tha viau mahse an Sorkar hun hi tuna PRISM hruaitute hian an hmu pha lovang. ZPM inhrual mum tum lai hi nangching se, Policy pawh thawh ve sela, inchhung lut law law se a finthlak ang. A hmaa Corruption do pawl anga kan hmel hriat ang khan an kal a rem tawh chiah si lova, Party an nih tawh avangin dingchang lo tur nih reng ai chuan in awih nunna tur leh an Policy tha tak tak a hlawhtlinna mual lam pan thiam mai se an tangkaina tur zawk pawh a ni ngei ang.

Ziaktu: David Sailo

No comments:

Post a Comment

Post Bottom Ad