HNAM CHHANNA KAWNGZAWHAH MIPUI ZAWNG ZAWNG SAWM - DAN LOVA KHAWDIN MZP LEH MINISTER TEN SAWI HO

HNAM CHHANNA KAWNGZAWHAH MIPUI ZAWNG ZAWNG SAWM

Vawiin ni 21st January, 2019 (Thawhtanni) chhun dar 12:00 khan MZP General Headquarters hruaitute chuan Local Administration Department(LAD) changtu Minister, Pu K. Lalrinliana chu a Office-ah an kawm a, Mizoram chhunga dan lova khawdin leh Mizoram leh Assam State inrina ramri chungchang sawipui a ni.

MZP hruaitute chuan, Mizoram chhungah dan lova khawdin khaw 21 lai a awm thu Minister hnenah hian an thlen a. Heng khuate hi Lunglei, District chhungah khaw 19 awmin, Mamit District chhungah khaw 2 a awm bawk. Heng khuate hi Chakma leh Tuikukte din a ni a, heng khuate hi rang taka Mizoram Sorkar chuan endika țhiat nghal turin an ngen nghal a ni. Minister chuan, ‘‘MZP ten heng khua dan lova din in lo hmu chhuak hi a lawmawm hle a, a rang thei ang bera țhiah a nih theih nan hmalak a ni ang,’’ tiin, MZP hruaitute chu a chhang a ni.

DAN LOVA KHAWDIN MZP LEH MINISTER TEN SAWI HO

MZP hruaitute chuan, Kolasib, bialtu Pu K. Lalrinliana, chu Bairabi Zophai leh a chheh vel bialtu a nih angin, ramri chungchang an sawipui nghal a, MZP chuan Bairabi Zophai hmunah hian ZOFATE CHAWLHBUK a din ngei a ngaih thu leh, sak a nih hma chu tawp san an tum loh thu an thlen nghal a ni. Minister chuan, 'Bairabi Zophai hmunah hian Zofate Chawlhbuk a din ngei theihna turin, bialtu MLA a nih ang pawha hmalak a tum thu leh a hmunah ngei MZP hruaitute nen enho a nih tur thu’ MZP hruaitute a lo hrilh a ni.

Ni 23rd January,2019(Nilaini) chawhma dar 11:00 hian MZP chuan Mizoram pumah The Citizenship Amendment Bill, 2016 dodalna hrang hrang karah pass luih tumna a awm avangin Hnam Chhanna Kawngzawh a huaihawt dawn a. Aizawl khawpui chhungah Chhim leh Hmar ațanga zawh tur niin, Chhimlamah Khatla kawn ațanga zawh țan a ni ang a, Hmarlamah Zarkawt ațang zawh țan a ni ang a,Intawhkhawmna Vanapa Hall kawtah hian All NGO hruaituten thu sawina hun an neih dawn bakah India Prime Minister leh Union Home Minister lim hal nghal a ni ang.

MZP General Headquarters chuan, ‘Hnam Chhanna Kawngzawh’ ah hian ram leh hnam tan Mizo mipui leh Zirlai zawng zawngte lo pen chhuak vek turin a sawmin a ngen nawn leh a ni.

Source: MZP Press Release