Tunlai chu Hriata Chhangte in social media mai bakah titi a luah hnem hle a, MP inthlan kan hnaih vang leh heti lama Mizo ten kan duh tui tak deuh vang pawh a ni maithei. A chiang awm deuhte zawt kualin ti hian a chanchin ka rawn ziak ve a, kim lo leh fel hlel a awm ang tih ring chungin, chutiang ah chuan mipuite leh amah Pu Hriata Chhangte ngei pawh ngaihdam ka dil nghal e.
1. Serchhip Damdawi In ah ni 15 March 1965 5:15 AM ah Pu C. Kaphnuna ( L) leh Pi Lalnuntluangi (L) inkarah a piang.
2. Pu C. Kaphnuna hian a nupui hmasa zawk Pi C. Laltawni atangin (i) Prof. Dr. C. Sangluaii M. A ( Eng), PhD Principal, Govt. Serchhip College (ii) Sr. Advocate C. Lalramzauva MA (English), LL. B Adviser to CM, Mizoram te leh a nupui hnuhnung zawk Pi K. Lalnuntluangi ( L) atangin:
(i) Er. LAL HRIATRENGA CHHANGTE, B. Tech (Mining Engineering), LL. B, Ex-Deputy Controller of Mines, Ministry of Mines, Govt. of India.
(ii) Dr. Lalawmpuia Chhangte ( First Mizo Diebetologist), Civil Hospital, Aizawl
(iii) Lalhungchhunga Chhangte ( 1969-1989)
iv) Lalhruaizela Chhangte, Serchhip te fa a hring a.
ZIRNA LAM:
I) Primary leh Middle School chu Midland English School, Serchhip atangin a zir chhuak a.
ii) HSLC examination erawh chu Government High School, Serchhip atangin kum 1981 khan First Division with Star ah passed in Mizoram pum ah 8-na ani. ( Khang hun lai khan MBSE chuan Distinction Division hi la siam lovin 75% & above a passed kha First Division with Star vuah anih kha).
iii) Pre University Course( PUC/ Plus 2 Science) chu St. Edmund's College atangin kum 1983 ah First Division ah a zo leh a. Khami kum khan NEHU hnuai a PUC ( Science) Mizo zirlaite First Division a passed tlemte zingah a tel nghe nghe.
iv) B. Tech ( Mining Engineering) hi Indian School of Mines, Dhanbad ( tunah chuan ISM-IIT Dhanbad an tih tak) atangin Second Division ( 2.56 OGPA ) in May 1989 ah a passed thung.
v) LL. B hi Mizoram sawrkar hnuaia a thawh laiin a zir tan a, kum 1994 khan ONGC, Ahmedabad a thawk lehin, chuta thawk chung chuan Aizawl Law College (tuna Mizoram Law College tih tak) atang hian class vawi 1 chiah kal hman siin LL. B. Final exams chu Second Division-ah a passed. hemi tum 1994 ( January Session) hian NEHU ah 2-na ani hlauh.
vi) ZIRNA LAMAH HIAN A TUI HLE A NIANG...
ONGC Ahmedabad a thawh laiin Sir L. A. Shah Law College, Ahmedabad, Gujarat University hnuai ah LL. M ( Master's in Commercial Law) a zir zawm leh a. ONGC, Sibsagar ah sawn anih avangin a zir zo hman lo. Chutah IBM, Guwahati a thawh leh hnuah B. R. Medi Law College, Guwahati, Gauhati University hnuaiah LL. M a zir zawm leh tak na a, transfer and posting in a ti buai ve em thin a ni.
IBM, Kolkata a thawh laiin BCS ( Bachelor in Christian Studies) chu Correspondence in Aizawl Theological College hnuai ah a zir leh a. BCS hi a pass chiah lo na a, Pathian thu hriatna lamah a thuk phahin a zir duh vang ngawt pawh hian Pathian thu ah a tui hle tih a lang.
IBM, Guwahati a awm vawi hnihna ah MBA, Sikkim Manipal University, Guwahati Study Centre atangin a zir leh a. 3rd Semester thleng a zir hman a, MBA pawh hi zir zo hman lovin Bangalore ah a poem san leh ani.
HNATHAWH LAM.... Thatchhe thiam lo kan tih ang chi, taima ngaisang zet mai a ni a.
I) MIZORAM SAWRKAR :
June ni 20, 1989 atanga ni 30 June 1992 chhungin Geology & Mining Wing, Directorate of Industries ( tuna Directorate of Geology & Mineral Resources an tih tak) ah hian Assistant Mining Engineer in a thawk ve a. Mizoram sawrkar hnuai a thawh chhungin tuna the Mizoram Minor Minerals Concession Rules 2000 lo ni ta hi a buaipui hmasa ber tu niin khatih hun lai a Mizoram sawrkar hmalakna a MUTHI Shell Limestone project ah khan Project Manager-in a thawk a ni.
ii) ONGC ( Oil & Natural Gas Commission / Corporation)
Ni 7 July 1992 ah Institute of Management Development (IMD), ONGC Dehradun ah Assistant Executive Engineer ( Production) anga zawmin Well Stimulation Services ( Oil khur damlo treatment lam, Oil Field Doctors an tih ho, WSS line ah lut chhovin) Ahmedabad, Gujarat leh Sibsagar, Assam ah te a thawh hnuin Executive Engineer ( Production) a kai hlimin ONGC chu ni 30 September 1997 ah a bansan leh ta ani.
ONGC ah hian Mizovin huaisen leh tlawmngai chawimawina nopui kan tih ang hi Award chi hnih; Oil khur kang huaisen taka a thelhmih vang leh Oil khur hluihlawn mai tur Mizopa tlawmngaihna liau liau atanga a pump chhuah vangin a dawng a ni. Amah mai ni lovin, Mizo hnam tan chhinchhiah tlak tak a ni awm e.
iii) IBM ( Indian Bureau of Mines)
IBM hi Ministry of Mines, Government of India hnuaia Subordinate Office niin India ram puma Leihnuai hausakna laih chhuah chi hrang hrang, Major Minerals ( Non Fossil Fuels) an tih ho endik a, Mine Owners hote chu most scientific and sustainable methods of mining hawi zawnga kai hruaitu Central Sawrkar department ani. Statutory body anih avangin inspection pah a Mines te chu a tul chuan khar sak thei nghal khawp a Magisterial Power pek nghal vek anni.
IBM ah hian ni 20 October 1997 ah Kolkata Regional Office ah Assistant Controller of Mines a zawmin, Guwahati, Bangalore, Bhubaneswar leh Kolkata ah te thawk kualin ni 30 November 2018 khan Senior Controller atanga Deputy Controller of Mines a kaisang leh hlauhvin, Early Retirement / Voluntary Retirement in a bang leh ta ani.
IBM a hna a thawh lai hian dikna ngainatu tiin CBI chuan REDI Brothers chhui tur khan a thlang a, Thla thum chhung lekin chhui chhuah an ni. Deputation in CBI ah IBM atangin a kum tel takmeuh a thawk tawh tih pawh hi hriat sak ve ta mai mai ila.
iv) Tunah hian khawvel puma Steel Industry company lian leh lar ber te zing ami, Multi National Company, Belgium based Arcelor Mittal group of Company ah; Manipur leh Chin Hills, Myanmar Chromite Mining project enkawl turin Techno-Legal Consultant a chhawr zawm lehnghal ani bawk.
5. HRIATA CHHANGTE HI SATLIAH VE MAI ANI...
I) Class VIII hnuai lamah naupang lehkha thiam thei ani ngai lo. Class III pawh a bei nawn a, chu pawh chu a fail leh ti tih deuh roh tlat mai a. A pa in, zirna lamah a fapa ve ngawih ngawih chu a beidawn tak tak a hlau si a, an Sikul hotute hnen ah promotion a dil sak tawp mai ani.
ii) Matriculation / HSLC a exam dawn hian zirna lamah a tui chho ve tan chauh va. HSLC ah Distinction leh PUC / Plus 2 Science te chu First Division ah passed ve mahse B. Tech ( Mining Engineering) 8 Semesters course hi 11 semester chhung zet zirin, kum 1 leh a chanve ngawt a reiin a zir chhuak ve leh hram chauh ani. Kum 1989, ISM Dhanbad a B. Tech Final Year ah hian mi 56 passed zingah 52 ani ve hram hram chauh.
iii) ONGC ah khan merit promotion ngat hmuin AEE atanga EE kha kum 4 ah kai mahse IBM a thawh leh na ah hian Assistant Controller of Mines ah khan kum 14 zet ( 1997 - 2011) chhung kha kaisang miah lovin a awm thung. Kum 2011 ah Senior Assistant Controller ah kaisangin a kum leh 2012 ah Deputy Controller of Mines ah a kai leh thung lawi si. Kum zawnin a kai leh thung si anih chu. Hetianga kaihruaitu Pathian hmangaihna hi hmangaihna mak tak chu alo ni.
Heng a chunga kan tarlan atang hian Hriata Chhangte hi mi lehkha thiam thei tia sawi tur chu ani bik hauh lova, chuti taka mi bik taka siam chu ani hranpa lo tih a hriat. Amaherawhchu mi tumruh; a thil tih tawhna lamah chuan theihpatawpa bei vak chi mihring erawh chu ani thung. A thil tih reng reng ah mi hrat khawkheng ani tih a chiang. A zin kawng a hlawhtlinna a neih hote hi hrat laka a hlawh chhuah tia sawi tur vek zawk ani. Amah hi chance aia choice dah pawimawh tute huangah a khung loh theih loh tlat.
6. THUNAWI
i) Mizo zinga B. Tech ( Mining Engineering) hmasa ber ani. 1989
ii) Mizo zinga ONGC, India ram Oil company hausa ber, lian ber a thawk hmasa ber ani.
iii) Mizo zinga IBM ( Indian Bureau of Mines) officer hmasa ber a nih bakah, North East States 8 atanga IBM Officer thawk tawh emaw thawk mek la awm chhun a la ni.
iv) Kum 2015-16 atan Confederation of Indian Industry ( CII), India ram a Industrial Policy siamtu pawl upa ber, hlun ber leh chak ber, Odisha State Chapter a Advisory Board Member a ni. CII a Mizo zinga Board Member ni hmasa ber leh la awm chhun ani.
v) By heart system a lehkha zir thin a ni a, cl-X a zirlai pawhin English bu a by heart mai. By heart a tih chu sawi chhuak thei piah lamah ziak chhuak thei a ni hmiah mai.
A nupui Pi Mahlimi pawh hi duai lo ve tak a ni tih a lanna chu English News Channel a chanchin thar puangtu atana sawm a ni fo mai hi a ni. English News reader interview ah chuan zuk tling ngei zel a.
Tunah hian a fapa Ray-a chuan LL.B final semester bei mekin, a fanu San San-i pawhin MA (Eng) final semester a bei mek a, Kulikawn a an chenna In leh Serchhip Inpui kar tawnin chhungkaw hlim takin an khawsa ve mek a ni. ~ Mahmuaka Chhakchhuak
Post a Comment