INKHAWM TURA CHHANDAMTE - KAN THUPUI BER INKHAWM - TIMES OF MIZORAM

30 Jan 2019

INKHAWM TURA CHHANDAMTE - KAN THUPUI BER INKHAWM

29th January

KAN THUPUI BER INKHAWM -
Ringtu tha, mi pangngai, piangthar, mi zahawm kan tehna ber chu 'A inkhawm ngai em?' tih a ni ta ber mai. Inkhawm la lungrun ber hnam kan ni hial awm e. Kan inkhawm erawh kan nunah kan senglut lungrun ber lemin a lang lo.

BIAK IN THLENGPHA LO TÂN -
Kohhran inkhawm leh Thalai inkhawm a kan tawngtai Subject chuai thei lo a ni. Hmangaih tak tak leh hmangaih em em lem lo tein kan tawngtai sak thin. Anih leh heng kan tawngtaipui reng mai te hi Chunglamin chhângin Biak In rawn thleng ta mai se, Kohhran Upa, Tual Upa, Rawngbawltu, Thalai hruaitu fing leh fel zawk taima tak tak rawn ni ta mai sela, sahuai thing vawna NIHNA buai a buai chelh fun reng mai ho hian kan chanvo te min han luahlan dawn chiah se kan lawm reng ang maw? Chutianga Fapa tlanbo u zawk dinhmuna dinga chanvo pawimawh kian lova, BIAK IN THLENGPHA chin chiah kan duh tawk pui a nih vaih chuan kan Subject hi min chhâng hukin ka ring thin lo.


INKHAWM RAWNGBAWLNA -
Rawngbawlna ber emaw ti hial tawk kan awm ta. Rawngbawl tura inchherna hmun tih kan hre ta lo. Kan inkhawm chuan Rawngbawlna hlenah kan in ngai a, kan inkhawm chhan Biak In pawn lamah hman chhuah tur kan pai haw tawh der thin lo. Inkhawm khâtin chak lo, inkhawm taimakin ringtu chak kan inti vel ta deuh ber mai.

Chunglam tehfung tur khi ka dawnpui chang chuan inkhawm hleithei lo, chawhmeh zuar thlenga duat em em thin, rethei ten an fairel an tawmpui zauh zauh ngam, tukhaw hriat loh a sumpai pe chhuak zauh zauh, mi anglo te tlangnel ngamna Kohhran leh vantlanga in tarlanga in vaivung pui chiam lo te hian Chunglamin rawngbawlna a tih zawk hi an hlen fo ta ve in ka ring.

THAWHLAWM CHAPONA -
Kan Pathian Ram(Sawma Pakhat)pek dan te chu a List in kan siam a, kum khat chhunga pek dan kip a kawi chu in tinah kan sem loh leh Biak In bangah te chuan kan tar ta dah a!! He mi tinzawn rana petu lah bo lo. A pe tlem tan chuan khua a van var dawn lo tak em. Chunglamin a hria a, Kohhran Committee in a hriat chuan tawk mai awm tak, tu emaw chawimawina, lansarhna remchang kan insiam sak tawn mai mai zawng a ni e. Hetiang pe thate dichanna tual a nihna lai a awm tawh si a!! Mi hriata thawhlawm an thlak ruih ruih thin avang khan a lawm, hmeithai khan inthlahrung taka Dar tangka dere a thlak a ngaih phah ni. Chunglam hriat aia mi hriat kan dah hmasa thin hi a pawi.


TLANGKAWMNA -
Khup zawite, ban uaithlate chhan chhuak thei tura Thawhtan, Thawhleh, Nilai, Inrinni zan baka Sunday Zing chhun Zan a Training la a inkhawm te hian Khup zawi leh ban uaithla te chu kan hawlam kallam ah kan pel kumtluan mai zawng a nih ber hi. Inkhawm hi thil tha tak a ni a, a tangkai dan leh a nih tur lam aiin Tradition ang zawngin kan nei ta ber a nih hi. Rawngbawl tura chhandam ni lovin Inkhawm tura Chhandam rawng kan kai tak zawk mah tawh a ni e.

No comments:

Post a Comment