MANGTHA TIH MAI ZAWNG (Mizo True Story) - TIMES OF MIZORAM

Breaking

Home Top Ad

Post Top Ad

MANGTHA TIH MAI ZAWNG (Mizo True Story)

Dustin Lalkulhpuia


Thlahleinga zân a ni a, vân chu a thiang hle mai. Nipui lâi mah ni se, zan boruak dâi leh thiang kâk mai chuan ka biang chu dim tein a rawn chhem heuh heuh a. Ka pindan kawngkharah chuan ka dâk a, vân zaupui maia awmze nei taka inrem arsi, mawi taka pe uar mai chu ka thlir a; thâwk leh khatah dan rual lohvin ka mit atang chuan mittui hi a rawn luang zawih zawih a. Ka thinhnûn chu thal hriam taka vih ang maiin a thîp vawng vawng a, ka tisate chu an khûr a, mit leh benga hmutute tâna hriatthiam theih rual lohvin ka thinlung chu na tuarin a rum vawng vawng a. 

Di lenmawi suihlung dumtu,
I kimtlang zawng a mawi ngei e; 
Kan thiamthu di zawngte kha
Tawngmang mawl mai em lo ni?

Mizo True Story

Ni, a mitmeng Bengal tuipui anga paw no ruâi maia min melh chunga, “Bawihte, hringnunah chuan eng pawh kan hmachhawn a thiang a, pai chawn chawna kal a ngaih châng pawh a la awm ang. Mahse, keiin nang ka hmangaihna che leh, nangin kei min hmangaihna hi ‘thu’ maia thiah theih a ni ngai lo vang,” a tih lai kha fiah em emin kawl phe ang maiin ka suangtuahna mitthlaah chuan a rawn lang a. 

Kum thum teh meuh kan inzui hnu pawhin a aw ri thâwp sat chu ka suangtuahna bengte chuan an la ngaithla kham mawlh lo. Dawt thu lêng vêl avanga ka thian kawm ngei ngawih ngawihten na theih tawpa min ensan laite khan zanin ang chiah hian mittuia bual âtin ka lo awm tawh a; mahse, kha zan leh zanin a danglamna chu - khawvela aw mawi ber, ka thinlungin a thinlung a hnaih ber, englai pawha min hmangaih em em tu lo ni tawh thinin kha mi zan kha chuan ka mittui min hrukfaisak tlat a ni. 

Phone-ah kan inbia a, a sek zawk chu hmeichhe bulah ka tap hawm hawm a, khatih lai khan ka kiang hnâiah awm ni se chu pangchan luâtah ka kuah zâl thei hialin ka ring. 
Min hnêm tuma min koh duat apiang chuan ka thinlunga chemte bur sa chu a nem luh belh ta mai emaw tih turin kei lah chu ka pangchangin ka tap ring sauh mai a. Mahse, kha zan ang em ema hlim kha ka la nei lo. Ani chuan a aw chauh pawhin ka thinlung hliam chu min thâwidam-sak thei a, ka hlimna siam nân ka bula a awm kher a ngai lo. 

I nghilh zawk ang kan tiam biahthu, 
Beisei bo I tâwnah hian, 
Lêng dang tang chu bêl ta la, 
Kei paw’n nghilh zâi ka rel ta’ng e.

Hei hi a harsa lai ber chu a ni – Hmangaihna avanga theihnghilh theih tura kan lo ngaih ngai reng reng loh, theihngilh a ngai ta hi! Hmangaihna chuan mi derdêp leh paukhauh a hre hrang lova, thlipui angin kalkawng pawh a nei bawk hek lo. 

Amah ka hmuh hmasak ber ni kha ka la hrereng mai : hmeichhe tam tak zingah khan a langsar larh a, ‘make up’ inhnawih chhah lo ber ni si kha ani aia duhawm leh hmeltha reng reng ka hmu lo. Keia beisei phâkah ka ngai ngai lova, mahse a duh hian ka duh nghal ngawih ngawih a ni ber. Khami ni kha Mizo zirlai freshers’ social a ni a, ani chu kum thum lai (Kan awmna phaia) lo awm tawh a nih avangin a hming pawh a lâr kher mai. 

Phone atanga kan inbiak hmasak ber zân khan, kan chenna lei ni lo leiram dangah daih cheng niin ka inhre ber. Min duh ve a ni tih hre lem lo mah ila, a nu leh pa hnathawh atanga phûrthak a neih dan chanchin thlenga min hrilh duh pawh kha ka tan chuan hlim zankhuana tling a ni. 

Facebook-a a profile chu ka hawng a, a thlalak leh a status (a status comment-na zawng zawng nen) zawng zawngte chu a bo-a-bang awm miah lovin ka en chhuak vek a, a then ka ‘save’ a. Vawi hnih kan inbiak hnu phei chuan a thlalakte chu ka comment ngam ve ta a. SMS pack thun ngai hlei lovin thla khat dam ‘pack’ ka han thun ve tak hnu phei chuan, ani chu ka nileng-zankhaw ngaihtuah a ni ta der mai! 

Fiamthuin ka bêm fiam thin a, ani pawhin fiamthuin min hnar fiam bawk thin. Mahse, ani chu nula hmeltha leh pian thiam tak, vawi khat han melh fuh palh pawha melh nawn leh ngei ngei ngai ang chi kha a nih miau avangin kei ang bêl vâl vâla vâl ve mai tan chuan tihtaka han bem ngam chi awzawng zu ni suh. Tûk tin zan tina lehkha chhiara inchhawp hnawk nuai thin kha, tunah chuan fel thênin phone bih ngur ngurin ka mu zâl tawh a, ka inluahpui ka thianpa phei chuan ka nungchang inthlâk thut dan kha mak a ti khawp mai. 

Khang hun zawng zawng ka ngaihtuah kir phei chuan, ka mittui chu a kang thei ta lo emaw tih mai turin a buak hian a baw zawih zawih a. Naupang chhe tahin ka tap hawm hawm a. “Kei paw’n ka duh che a sin,” tih paha a vawi khatna’na ka biang a fawh tumte chu ka hma maia inchhawp ang main fiah em emin ka suangtuahna mitthla chuan ka hmu a. 

Khang hun zawng zawng mumang mâwl ang maia an liam tur te, thu kan lo intiam tawh leh kan zirlai kan zawh huna ka thil tih tur zawng zawng kan lo duan lawk sa diam tawhte engmah lo mai ang chang tur te ka ngaihtuah chuan pem thar in thamsak ang maiin ka taksa chu a na vin zawr zawr a. Hahdam thei turin ka taksa leh ka rilru te chungah chuan thu rêng ka nei tawh si lo. 

A ni teh meuh mai, hriatreng atana kan duh dun, hun hlimawm tak tak kan hman liam tâk, a liam tâk ‘vâng mai pawha kan ui ngawih ngawih, loh theih lohna avanga hre reng chung sia ‘thleng lo’ ang hmiaha theihnghilh a’n ngai ta chu tlangval hi a va hamhaih theih ngai tehlul em! 

Khuarei kumsul lo veiin 
Tawn ni pawh lo her mah se, 
Ka thinlai tina zualan 
Hlan zai ka rel tawh lo’ng che. 

Ni e, engtik niah emaw chuan hêng natna zawng zawngte hi ka tuar dam hun a la rawn thleng ngei ang. (Hun erawh a va duh rei dawn em!) Chumi hun a lo thlen hunah chuan ka hmangaih loh vâng che ni lovin, I hmangaihna biahthu sawhkhawk natzia ka hriatchian tawh êm avangin, nang nena impumkhat leh ai chuan hreh chung chunga hnungchhawn che chu ka thlang tawh zawk ang. 

Ka thinlung chuan hla a sa nawn awn awn a. Ka pindan kawngkhar chu nî zûng chuan dîm tein a rawn chhun a, ka mittui chu ka hrufai a, ‘repeat mode’-a ka dah Thiamchantira zai chu ka hmet tâwp a. Ka khum lam pan chuan ka phei ta a.

Post Bottom Ad