MIZO LOVE STORY 'KIMKIMI'

-Zama khiangte khuangleng

Fur a intan tawh; ni khat chu thawmhnaw tihnâwng tham lek hian ruah a sur cherh cherh a. Nihliap ka ken loh avangin ka bag chhipchhuanin kal luih mai ka duh a, ka khawmuan chuan ka tlai dawn tlat a ni. Tlan mai tuma ka insiam rem lai chuan vantirhkoh aw ni hiala mawi hian ka hming ngeiin min rawn ko a. Vantirhkoh aw hi ka hre tawh a ni lo; mahse, lei mihring hmeichhe dangte aw ai chuan ani aw hi chu a mawi tlat a ni.

Min kotu lam ka va hawi chuan a aia mawi awm tawh lo tur hian Kim Kimi chuan min lo nuih a. A nihliap âng chhungah chuan ka tan hmun a awm tih ka hre thiam ve nghal mai. Hnial ka tum lo va, ka phal hek lo. Hemi ni zet hi chuan Chanmari leh kan school inkar hi hnai ka ti ngei mai. Kawngah chuan lehkha zir chungchang te, kan Principal chanchin te, pawl sawm kan zirna leh kan result te kan inzawt tawn a. Kan vawi khat inbiakna ni mah se, kan innelin kan inpawh nghal em em a, kum tam tak lo inkawm tawh ang mai kan ni. Science leh Arts building a hran avangin kan building lamah ka pheisan ta a. Tlaia haw rual tura min sawmna chu, a tawngkam tha chauh pawh lo ni se, khami ni kha chuan nghah ka tum hrim hrim. A uang bik lo a ni ang, class an ban hma zawk avangin min lo nghak a, hawn kawng pawh ni dang zawng aiin a tawi ka ti daih. Hemi ni atang hi chuan zing tin Chanmari-ah kan innghak a, tlaiah kan haw rual leh thin. City bus te chu tawt takin a tlan tih kan hre chang tawh lo va, ruah a sur phei chuan nihliap pakhat hnuaiah lungrual takin kan inkuah haw thin. School chawlh te hi kan tan chuan a hrehawm mah zawk a, kar tawp chawlh hi rei kan ti dun thin khawp mai. Chawlhni te hian kan inlen pawh a, a nu leh pa, a unaute paw’n min hre thiam tawh hle. Inrinni bazar hi kan pahnih tih turah an dah tawp tawh a, keini tan hnial phal rual a ni lo. Aizawl bazar leh Millennium Centre te hi kan khawvel par chhuahna hmun a ni a, khang hun lai khan hetiang hian hrehawm ka insiamna tur a ni tih kan hre thiam pha lo.

Kim Kimi hi tawng tam leh harh tak ni lo mah se, nuih peih tak a ni a. A nuih zawnga a ha var rual tha tak lo lang leh inthlahrun hmel taka a biangsum lo lang thin hi a duhtu tan chuan tluk chhiatpui tham ni hiala mawi a ni. A pumrua tê fel thlap, pian inrem khawm fuh tak leh a nungchang ngainatawm tak hian amah a timawi a. A inrin tawkna ringawt pawh hi ngaihzawn tham niin ka hria. A sam nung tak hian a mitmeng mawi tak hi a chawimawi a, duhawm lo lai reng kei chuan ka hmu ve lo a, ka hmu phal hek lo. Sawi vek dawn ila ka sawi kim sêng dawn chuang lo va, kan hlimnate kha ka sawi chhuak pha hek lo ang. A châng chuan office-ah zirtirtu-te’n min hau a, zirlai nih laia inngaihzawn that lohzia te min hrilh a, an thin kan tihrim zual chang phei chuan classroom-ah min hruaiin kan thiante awm laiin min hau bawk thin. Mahse, chung te chuan kan inzawmna a suih nghet zual zawk a, thihna chauh lo chuan min pawt then dawn tawh lo ti ila kha tih hun laia kan inzawmna nghehzia sawina’n a tawngkam hi a la nghet lo ka la ti zawk hial. Kan thinlung hi pakhat a ni tawp a, kan inlungrual a, kan inhmangaih tak zet bawk. Thla eng lawma haw nachang ka hriat loh zan te, Lammuala inkhel kan en tuma kan hlimzia te, an ina chaw ka ei tûka a pa thu min hrilh zawng zawng te leh kan thawnthu pum mai kha sawi vek sen a ni lo ang. Kan thawhthu tawp tâk dan erawh sawi lan ngei a ngai si; hetiang hi a ni.

December thla chawhnu lam a ni a, a boruak pawh Krismas tawh tak a ni. Bazar a lûnin zan lamah pawh dawr inhawng an awm a. School chawlh kan neih tirhin ka hawn duh tur chu ka lei fel vek tawh na-chungin Kim Kimi’n haw lo tura min chelh nat em avangin, ka ticket tum hnih ka cancel hnuah kan khaw lam pana sumo chhuak hnuhnung ber turah ticket ka la tha leh ta a. Ka haw dawn zan chuan Kim Kimi nen Millennium Centre chunga dawr hran an siam, zan lama an hawnah kan va kal a. Hemi zan hian hun dang angin kan nui tam lo. Kan inkai chawt a; coffee te kan in dun bawk. T-shirt hring min lei a, kei paw’n T-shirt sen, ka rawng duh ber ka leisak ve a. Chu chu ha haw nghalin, inhmeh zawk nih kan inchuh der te chu kan hlimpui ve khawp mai. Kan ina ka thawmhnaw min siam felpui zawhah an inah kan phei leh a; kan sawi lo na a, mut hma chu kan tum lo. An tuala thing buk hnuaiah chair la chhuakin kan thu dun a, vawi thum ngawt chu haw ka tum a; mahse, kan inthlah thei lo. Duhthawh takin kan infawp a, kan inkuah a, a tawpna a awm thei tak tak si lo. Ka thlah thei lo a, ani pawh chutiang tho chu a ni. A mittui lo tla te kha awle mittui a ni lo tih ka hre chiang a, tuna ka ngaihtuah leh phei hi chuan haw kha eng vanga lo tum lui tlat nge ka nih ka hre thiam bik tawh lo. Pathian remruat ka tih dawn chuan kan chhiat nan Pathianin rem a ruat ka ring thei si lo, tu nge ka dem ang tih pawh ka hre thiam lo.

Zing dar khat velah Kim Kimi nu’n mu tawh tura min tih avangin an in lam chu hreh em emin min pansan ta a. A pindan puan zar kêu chunga ka kal liam tur min thlir te chu ka hmu ru reng nain ka hawi let ngam tawh lo. Amah ang bawkin hawsan ka hreh a, a kianga awm ka ning thei lo a ni. Krismas leh kumthar te chu nuam takin ka hmang thei ta reng reng lo. Krismas tuk atangin Kim Kimi chuan ka phone call a la duh tawh lo a, mi dang phone atanga ka tih paw’n ka aw a hriat chuan a dah hmak thin. A chhan min hrilh bawk si lo, insawi fiahna hun reng reng min pe ve lo te chu ka thin a rim a; mahse, ka thinrim ti reng chung siin ka haw thei chuang si lo. Kum a thar veleh Aizawlah ka chhuk nghal vat a. Amah hmuh vat ka duh avang zawka ka chhungte bulah pawh lehkha zir chhuanlam ka ni a, anni paw’n min hre thiam takin min chhuk hmatir kha a; a tak takah chuan lehkha zir chu a lang lo hrim hrim. Kim Kimi te in ka kal leh hmasak ber ni chuan an kawngkhar ka kik a, a nu’n min rawn hawn a, ‘Kim kimi a damloh thu leh min hmuh duh loh thu’ min hrilh a, kawngkhar a khar leh nghal hmak. A awmzia ka hre lo viu nain Kim Kimi nu hmelah khan khawngaihna hmel leh lungngaihna inchawhpawlh ka hmu a, thinrimna reng reng a lang lo. Mahse, ka mipa thinlung sak a rawn thawk ve ta. Min hmu duh lotu chu eng vangin nge ka hmuh bik ang, ka tihsual sawi tur a hria pawh a ni chuang si lo. Min be duh lo ve tawp a, eng nge thlenga eng nge a tawn sawipui theihin a awm duh bawk si lo. Kar khat zet chu zan tin ka ngaihtuah a, ka muhil thei ngai lo. An ina va kal ka tum a, ka chhuah vek tawh hnuah te ka let leh thin. Ka mu thei lo va, ka theihnghilh thei chuang bawk si lo. School kan lut; kal chakna ka nei ngai lo a, ani lah chu school pawh a lo kal ngai tawh si lo.

Kar hnih a liam hnu chuan Kim Kimi te in chu ka pan leh nge nge a; mahse, thil danglam eng mah a awm lo, A nu bawk khan min hmuh duh loh thu min hrilh leh a, kawngkhar a khar leh nghal hmak. Luhlul chhuahin tualah darkar khat aia rei ka awm a; mahse, eng mah a danglam chuang lo. A thiannu hnen atangin Kim Kimi chu a damlo tak tak tih ka hria a, a cher tawhin amah pawh a chawrche tawh a ni awm e. chaw a ei ngai lo va, a muhil tlem em em a, a harh chian vak loh phei chuan ka hming a lam nasa thin niin a sawi. Mut hmunah te, khawi hmunah pawh chawl lovin Kim Kimi nena kan inkar chu ka ngaihtuah zui a ni ber mai. Eng vanga an inah chuan lut lui a, a nu tal chu thil awm dan zawt chiang ngam lo nge ka nih pawh ka inhre chuang si lo. Kawngkhar min khar hnan khan eng vangin nge ka haw leh mai thin. A nu tal chuan eng emaw chu min hrilh ve tur a ni dawn lo’m ni. Chuti lo zawng chuan; kei thingtlang tlangval ve mai hi an chhungkua chuan an fanu tan min iai thar a, ruahmanna dang an nei zawk? Keimah avangin Kim Kimi chu an khar khip ta nge, thawnthua an ziah thin angin Kim Kimi chuan natna a vei a, min hmangaih em avangin min then a duh! Ka ngaihtuah tam leh ka buai a, ngaihtuah loh ka tum nasat leh ka buai zual tho bawk si. Awm dan ka thiam seng lo a, awm loh ngawt dan a awm chuang si lo. Ka beidawng leh kan awm dan ning tawh lutuk chuan Kim Kimi emaw a nu emaw chu thu chiang ka zawt tawp ang a, min hrilh thei lo a nih chuan anni aia mak sakin ka che ve ang tiin thutlukna ka siam ta ngawt a. February thla inrinni vawi hnihna chiah a ni, kar hnih zet chu Kim Kimi chanchin ka hriat lohna a ni ta. Ka insiam mawlh mawlh a, a T-shirt hring min leisak kha hain, ka kekawr zinga aman inhmeh min tih thin ber secondhand jeans ha bawkin converse dum ka bun thung. He ka dress hi Kim Kimi duh ber a ni. PWD penga ka chhuk thlak lai chuan Kim Kimi nu hian ka darah a rawn kuai her sawk a, a hmanhmawh hle a nih ka ring. restaurant-ah kan thu lut a. Tawng hmasak kan hreh dun khawp mai. Zawh duh tam tak ka nei chungin sawi hmasak tur ka hre bik chuang lo. A ip chhunga lehkha khawr tawh tak chu a phawrh chhuak a. Eng dang sawi chuang lo chuan lehkha chu min pe leh ngawt a. A ngaihna hre lo fea lehkha leh amah ka thlek tawn zak zak hnu chuan, chu lehkha chu ka chhiar ta a.

Duhtak,

Nang nena hringnun kan hman dun hlimawm tak tak atanga min kai hrang a, thihna lui lama min hnuk luttu hi khawngaihin lo ngaidam hram ang che. Kei chuan ka ngaidam thei ngai dawn si lo va.Rûm leh tahna khawvela min nuihtir a, lungngaihna khawvela hlimna min petu i hmangaihna kha tunah chuan dawng tlak ka awm ta lo. I pangpar mawi tak, ni tina i chawm, tui i pek thin hi khawngaihna leh lainatna tel miah lovin min thliak a, par chhuah leh thei tawh ngai lo turin min siam a, i enkawl tlak ka awm ta lo. 

A... ka sawi tawh mai ang, hreh luat vanga thih theih chu ni se mual ka liam tawh tur. Eng vanga he hringnun hi ka chunga nunrawng bik nge maw a nih le? Mi tinin Isua piancham lawm tura an sum leh tha, an thinlung an hlan zan khan kei chu ka thianghlim vena te tihbawrhbanin a lo awm asin. A hming leh nihna eng mah ka hrilh ngam lo che, a chhan chu min hma-ngaih êm vanga phubâ i la tur hi ka ngâingam lo a ni.

Ka grape wine in turah damdawi an lo telh a, chu damdawiin ka taksaa hna a thawh meuh chuan mihring pangngai pawh ka ni tawh lo. Ka sawi ngam tawh lo; mahse, nang lo chu ka ngaihtuah lo asin. Kha mihring, mipa azawnga tenawm ber khan khawngaihna leh lainatna nei miah lovin min pawngsual a, kei lah damdawi hna thawh avangin tang tur ka awm si lo. I hming ka lam char char asin, eng a ti nge min rawn chhan loh... i awm si lo tiraw?

Mihring pangngai rilru ka put leh meuh chuan i tan mi tenawm ber ka lo ni ta. Ka hmu ngam tawh lo che a ni satliah mai lo, i aw tak ngial pawh ka hre ngam tawh lo. Ka hre chak lo a ni lo va, ka hmu duh lo che a ni hek lo, ka ngam tawh ngang lo zawk a ni. Kha zan khan nangmah ka ngaih em vang chea grape wine kha in ka ni asin; lo tih loh tawp tur a ni a. Kan ina i lo kal ni te khan ka tap a; nangmah ka hmuh chak luat avangin. I haw hnu khan pawna i thutna ngeiah khan rawn thuin, i awm tawh lo tih hre rengin ka zawng ru che a, i rawn lan leh mai te kha ka beisei a; ka va ngai tak che em! I aw ka hre chak lutuk ringawt pawh hi âtna tham chu a ni tawh. Ka thinlung chhung rila inthlahrunna awm hian nangmah hmu ngam lo turin pindanah min khar khum a, khaw eng hmu ngam lo tur khawpin min sawisa a, min chhan theitu awm chhun nang lah chu ka beisei ngam tawh si lo che. Ka chau ta, ni tam tak chaw ka ei thei tawh lo va, ka muhil thei bawk si lo, dam pawh ka dam rei tawh lo ang. Ka nu’n min awm tawp a, nilengin ka tap a ni ber mai. Ka nu pawh hian min hnem thei tak tak lo, a lungchhe tap hi ka hmuh hmaih ngai lo; mahse, tu nge inhnem chuang ang?

A tawp ber atan, nang ka lo tawng che hi ka lawm a, hlimna min lo pek tawh zawng zawngte kha a mal phei chuan ka hre seng tawh lo. Ka thinglungah leh mitthlaah an cham reng a, ni tin hian khang nite kha ka chhui a , koh kir leh ka chak thin. Ka nunna hi keiman ka la ngam lo a, min Siamtu ka zah luat avangin; mahse, aman a lak hun ka nghak tawp tawh thung si He ka hringnun chawhnu tawh tak, ka dam ni upa tawh lamah hian Pathian khian duh thlan tur pakhat chauh pawh min pe se; ka hmangaih, ka thih hma ngeia i hmui fawh lo chu thlan tur ka nei lo, chu chu ka thih thlamuanna tur awm chhun a ni. Hmmm… kei chu ka dam rei tawh dawn lo, khawngaihin min theihnghilh la, i hringnunah kei ang hmeichhe vanduai hi i tawn nawn tawh loh nan Pathian ka lo dilsak ang che. Chu chauh pawh chu a ram thlen min chaktirtu a va ni si em… mangtha… mangtha… ka hmangaih che.

Lehkha ka chhiar zawh chuan Kim Kimi nu chu ka’n en a, a mittui a lo hru char char a ni tih ka hre chiah. Eng mah sawi lovin ka chhuak a. Rahlum North-a Kim Kimi te in lam chu hman-hmawh taka ka pan lai chuan a nu pawh chuan min rawn zui ve nghal a. Mahse, a tlai tawh, an in ka thlen hma chuan tlangval tlawmngai tak tak te’n Kim Kimi te ina bungrua an thiar chhuak chu ka hmu ta, hrilhfiah leh chuan ka ngai tawh lo. Ka mit sulh sulh a, ka lu a hai mum mum a, eng mah ka hre chiang thei ta lo. Ka hminga hmeichhe aw-in min ko ri ka hre zuai zuai a; a chiang lo. Tap thawm leh au thawm ka hria a, dar ri pawh a tawp lam chu ka hre hman; mahse, kei hi khaw’nge ka awm?