CHANCHINTHAR: Vawiin khan MNF Party Office Mizo Hnam Run chu kumthar atan hawn a ni a, MNF President Chief Minister Pu Zoramthangan Citizenship Amendment Bill chu an duh loh thu a sawi a. Hemi chungchangah naktuka NESO-in Total Bandh a siam tur chu Hmarchhak zirlai leh MZP-ten zaa zain an thlawp tih sawiin hei hi a tir atanga MNF-in an hnial leh tha an tih loh an dodal char char kha a ni a ti.
An sorkarin a kalpui tur SEDP chu MNF chauh ta tur a ni lo a, mitin ta tur a ni a, mitin huap vekin kalpui a ni ang a ti a, chutih rualin a pumpui tlang chhah leh ril phiar chu fatuin an ei pawhin mipuiin an sawisel ngai loh kha," a ti.
Chief Minister chuan, sorkar kalphung chu neitu sorkar chet dan tur a ni dawn a ti a, Bamboo Development Project-ah Board System-in an kalpui dawn a. Link Road atan Board pui pakhat awmin Minister a Chair a ngai ang a, Vice Chairman-ah MLA dah ngaiin, party mi leh NGO-te pawh dah tel an ngai dawn a ti. AMC pawh sorkar hmasa khan baloon hampuar ve det det ang chauhin a kalpui a, tunah chuan a kal tha tawh ang a ti.
'Missionary nuai khat an tir chhuak ang' tih a sawi thin chu mi thenkhatin fiamthu thawh nan an hmansak a, tunah pawh sponsor leh sponsor loh singthum vel an awm a, chhungtin sum lakluh a pun chuan nuaikhat tirh chu harsa lo tak a ni ang, a ti a. An sorkar tuk lawkah sorkar zu dawr an titawp nghal vek a. A dang mimal ta chu Budget Session-ah legislate a ngai a. January ni 14 thleng Dry Day puan chu a tul chuan thla khat dang pawh la puan chhunzawm zel theih a ni a ti. Kawngpui chhe zual an thuam tha nghal tih sawi bawkin, a theih ang angin an chhunzawm zel dawn tih a sawi a. Sorkar hmasa kihhnawkah an buai ve lo a, mi dem hman an ni lo tih sawiin, an thawk char char dawn a ni," a ti bawk.
Post a Comment