CHIEF MINISTER HOVIN BAMBOO CONSULTANT LEH HORTICULTURE DEPARTMENT HOTUTE INKAWM - TIMES OF MIZORAM

9 Feb 2019

CHIEF MINISTER HOVIN BAMBOO CONSULTANT LEH HORTICULTURE DEPARTMENT HOTUTE INKAWM

Chief Minister Pu Zoramthanga chuan nizan (8.2.2019) khan CM’s Conference Hall-ah Dr. N. Barathi, Bamboo Consultant, Energy Plantation Consultant leh Pu Hae-Bong Cheoung, Advisor, Eco-Nexus leh a fapa chu kawmin Mizorama mau tha chi tam tham tak phun leh tihpun dan tur te an sawiho. He hunah hian Horticulture Department hotulute an tel bawk a ni.


Chief Minister chuan industry hrang hrangah Mau mamawhna a sang in, hun reilote chhunga puitling zung zung a nih bawk avangin environment tana tha tur leh suma hlawkna tur thlir pawhin a that hle thu a sawi a. Chutihrual chuan chi chhuah zen zen lo a nih avangin tam tham taka mau hmun siam a phun tur chuan science thiamna hmanga tihpun chu a tul thu a ni, a ti a. Chumi atan chuan Dr. N. Barathi chuan mau chi khat – Dendrocalamus Brandisii variety khat chu hlawhtling takin tissue culture tiin kum nga chhung a beih hnuah a lo tihpun sak thu a sawi a. Chief Minister chuan hmabakah chuan kalphung mumal tak neih a, mau hmun tur buatsaih te, lei tha leh tui lakna tha te, mau hmun kara hmun awl a hmang tangkai tura thlai dangte chin tel dan leh thil tur dang awm tur te sawiho fel tul a tih thu a sawi a.


Dr. N. Barathi leh Horticulture Department hotute chu Mizorama mau chin dan kalphung te sawiho in, Hosur-a Director-a a thutna, Growmore Biotech Ltd. hmunhma chu tlawh turin a sawm nghal a ni. Pu Hae-Bong Cheoung chuan an company in mau atanga fuel an siamchhuah thin thu sawiin, chumi atan chuan engtik lai pawha mau tam tham tak supply mamawh reng a nih thu a sawi ; Mizoramin bul tanna tur sum a mamawh te state leh ram pawn atanga hmuh theih dan tur te an sawiho bawk a ni. ~ DIPR

No comments:

Post a Comment