JAISH-E-MOHAMMED LEH AN HOTUPA MAULANA MASOOD AZHAR CHANCHIN ṬHENKHAT - TIMES OF MIZORAM

Breaking

Home Top Ad

Post Top Ad

JAISH-E-MOHAMMED LEH AN HOTUPA MAULANA MASOOD AZHAR CHANCHIN ṬHENKHAT

JAISH-E-MOHAMMED LEH AN HOTUPA MAULANA MASOOD AZHAR CHANCHIN ṬHENKHAT

MAULANA MASOOD AZHAR
Tunlai chu India leh Pakistan-te, indo turin an inpuahchah mup mup a, ralthuam pawh an chelek ṭan a ni ber a. He buaina bul hi, vawi tam tak India lo bei tawhtu Pakistan a Terrorist lar JAISH-E-MOHAMMED (JeM) a ni a. Chu pawl, JeM leh a dintu Maulana Masood Azhar-a chanchin, tlem han tarlang ila.

Jaish-e-Mohamed (JeM) hi, "The Army of Muhammad" an ti mai ṭhin a, rawlrala che ṭhin leh mi rikrap ching, muslim firfiak pawl pakhat a ni a. Jamu & Kashmir a Terrorist pawl lian leh hlauhawm ber a ngaih a ni. An hmunpui ber (headquarters) chu Pakistan ram Punjab a Bahawalpur-ah a ni a, an chettlatna ber pawh Kashmir a ni.

He JeM pawl dinchhan leh a tum bul ber chu India aṭanga Kashmir lak hran a ni a, Jamu & Kashmir-ah hian vawi tam tak inbeihna an lo chawkchhuak tawh reng a. Afghanistan a tawrawt taka rorel thin Taliban leh Osama Bin Laden-a pawl Al-Qaeda nen pawh inzawmna ṭha tak an nei an ni awm e.

UN leh BRICS te bakakah India, US, Russia, UK, Australia, Canada leh UAE te chuan JeM hi, mi rikrap ching pawl hlauhawm tak (Terrorist Group) ah an puang tawh a. A dintu leh a khaipa ber chu, India sorkar in a theihnghilh tawh ngai loh tur, Indian Airlines Flight 814, Kandahar a Hijack tak passenger te nena inthleng nana a chhuah tâk Masood Azhar-a kha a ni.

Masood Azhar hi Terrorist zingah India in a mi ngaimawh leh man a duh ber pakhat a ni a. Kum 1968 khan Bahawalpur, Punjab (Pakistan) ah piangin, a pa Allah Bakhsh Shabbir chu Sorkar sikulah Headmaster a ni a. Pawl 8 a nihin sikul aṭanga hnawhchhuah a ni a, Jamia Uloom Islamic School-ah lut lehin, chuta ṭang chuan Alim tih hmingin 1989 khan a graduate ta a, chumi hnu lawkah Zirtirtu hna a thawk a.

Jihad Training naah a inziaklut a, a zirchhuak lo na a Soviet-Afghan War ah a tel ve a, a inhliam vangin a chawl a. Chuvangchuan, Harkat hnuaia mite fuihphurtu leh Sad’e Mujahidin leh Sawte Kashmir Megazine editor-ah ruat a ni ta a.

Masood Azhar chu Harkat-ul-Ansar General Secretary a ni zui a. Muslim hote, Islamic dan hmanga rorelna ram pakhat hnuaia inpumkhat taka awm zirtirna (Pan-Islamism) thute puangzar leh chumi atana pawisa mamawhte ṭhahnemngai taka khawnkhawmin khawvel hmun hrang hrang - Zambia, Abu Dhabi, Saudi Arabia, Mongolia, UK leh Albania te a zin kual a.

Kum 1994 kumtir khan a nihna diktak thupin Srinagar, India-ah a lut a. Terrorist tih hriain India chuan Khanabal hmunah lo manin, Lunginah a khung a. Kum 1995 khan Al-Faran intite chuan J&K-ah ramdangmi khualzin 6 an ru bo a, thil phut an nei a, chu an thil phut zingah chuan India kuta tang mek Masood Azhar chhuah zalen a tel a.
JAISH-E-MOHAMMED
Kum 1999 December khan Harkat (Terrorist) ten, Katmandu atanga thlawkchhuak Indian Airlines Flight 814 (IC814) chu hijacked in Taliban rorelna Afghanistan-ah an tum tir a. He thlawhna hruaikawi hi Masood Azhar a nau Abdul Rauf Asghar-a ruahman a ni a, an unaupa tho Ibrahim Athar-a chuan hijack tu Terrorist-te hi a ho a. Hijack tute hian, India in Lungina a khung mek Terrorist hotu lawk pathum Maulana Masood Azhar (tuna JeM hotupa ni ta) leh Ahmed Omar Saeed Sheikh leh Mushtaq Ahmed Zargar te chu chhuah an phut a, chhuah an nih hma chuan passenger-te chu hren reng emaw tihhlum hial emaw ah an vau a.

Khawvelin a thlir thup a, India hruaitute an buai hle a. Pawisawilo tam takin an thih phah ai chuan tiin Terrorist-te phut ang chuan Maulana Masood Azhar-a te chu chhuah an ni ta a. He thutlukna hi mi tam takin an sawisel a, Ajit Doval-a ngei pawhin Terrorist hruaitute chhuah hi “Diplomatic failure” tiin a sawisel a nih awm e, mahse Sorkar hotuten tih loh theih lohah an ngai si a.

Thenkhat sawi dan chuan, Masood Azhar chhuah a ni hi, ISI (Pakistani intelligence) te chuan hnehnaah ngaiin an lo lawm a, Pakistan hmun hrang hrangah an zinkualpui a. India aṭanga chhuah zalen a nih hnu lawkin, Karachi-ah mipui tam tak hmaah chuan "He hmuna ka lo kal chhan chu, ‘India ram kan tihchhiat hma chuan Muslim-te hi muang ten kan chawl mai tur a ni lo’ tih hrilhhriat che u hi ka mawhphurhna a ni” tiin Kashmir chu India lak ata la hrang turin mipui hmaah chhia a chham hial a ni.

Tichuan, ISI puihnain pawl thar Jaish-e-Mohammed chu a din ta a, JeM te hi Kashmir leh hmun dang dangte beih nana Pakistan intelligence (ISI) ten an dinpui nia ngaih a ni. JeM din a nih hian Harkat-ul-Mujahideen atangin engemaw zatin an zawm nghal a, Osama Bin Laden a pawl Al Qaeda ho trainingna chu an hmang ve a, chuvangin Al Qaeda lakah hian that an chhuah hle nghe nghe niin an sawi.

He Terrorist group (JeM) hian, India leh Pakistan innghirnghona thlen thei khawpin vawi tam tak India an bei tawh a. Kum 2001-a mi 38 zet thihna J&K Legislative Assembly beihnate, kum 2001 a mi 14 zet thihna leh India leh Pakistan inep vak na chhan Indian Parliament beihnate kha an tih a ni a. Kum 2016 Pathankot a Indian airbase beihnate kha JeM tih a nih bakah, Masood Azhar te unau ruahman a ni nghe nghe a. Kum 2016 a Indian Mission, Mazar-i-Sharif beihnaahte, kum 2016 Uri beihnaahte leh kumin 2019 a Pulwama beihnaahte mawhphurtu an ni a, India tan chuan JeM hi hnawksak tak an ni.

Kum 2001-a India Parliament beih a nih khan Pakistan chuan, khawvel hmuha inthenfai nan Masood Azhar chu a hreng ve a, kum 2002 ah JeM pawh chu khap a nih thu official in a puang bawk a. Mahse, ‘ban’ a nih hnu pawhin, langsar takin Pakistan-ah hian an awm reng tho a, Masood Azhar pawh kum 2012 December khan Lahore High Court chuan a chhuah zalen leh nghal mai a, India a thin ur hle a nih kha. A pawi khawih zozai thlir chuan, Pakistanin zalen taka a awmtir hi a huatthlala hle reng a.

Tuna India leh Pakistan innghirnghona bul, February 2019 a Pulwama (India) a thihchilh bomb hmanga an rawn beih khan CRPF 40 chuang zet an thi a nih kha. Hei mai bakah, Jaish-e-Mohammed (JeM) hian India chu nasa zawka beih leh an la tum tih India in a hria a, an chet hmain India chuan JeM te hmunpui, Pakistan Balakot a mi chu February ni 26 khan a bomb darh ta a, Pakistan an thinur hle.

Boruak a sosang zel a, Airforce thlawhtheihna an inkahthlak sak a, India Air Force pilot pawh Pakistan ten an lo man ve bawk. India leh Pakistan hi lo inkap zeuh zeuh tawh ṭhin mahse, hetianga Air Force hial hmanga India in a beih hmasak hi kum 1971 hnuah a vawi khatna a ni. An inkar boruak hian ziaawm lam a pan thei hrih lo a ni ber mai.

He buaina bul JeM hotupa Masood Azhar chu UN in Global Tertorist a a puan zinga telh turin India chuan tunhnai kum 10 chhung khan vawi 3 ngawt - kum 2009, kum 2016, kum 2017 te khan UN ah a lo pulut tawh a, mahse China in a lo dodal (veto) zel a. Hetia buaina a chawhchhuah leh takah hian US, UK leh France te chuan Nilaini khan UN Security Council ah Masood Azhaar chungchang hi an pulut leh a, mahse China erawh a la ngawi tlat hrih a ni.

JeM hotupa Massod Azhar hi UN in terrorist a puan zinga a telh chuan, khawvel hmun hrang hrangah, kawng tinrenga hrekna a tawk anga, chet a la thei vak tawh dawn lo a, chu chu India tan chuan thawk huaina tham a ni ang.

(Group : THE BETTER MIZORAM)
Dt 28th February @Buata Bawihtlung

No comments:

Post a Comment

Post Bottom Ad