PRISM Party chuan nasa zawka Citizenship Amendment Bill, 2016 dodal a nih theih nana All Party Meeting ko tura ngenna Chief Minister leh Speaker hnenah an thlen nawn leh.
Hemi chungchanga an thuchhuahah PRISM party chuan Mizoram, Mizo hnam leh sakhaw tana Citizenship Amendment Bill, 2016 hi a him loh avangin lian leh nasa zawk leh inlungrual zawka dodal a ngai an tih thu an sawi a. He mi bul tan nan hian political party zawng zawng ten thu khat vuak a \ul an tih avangin All Party Meeting ko turin thla hmasa ni 15 khan Chief Minister Pu Zoramthanga an lo ngen tawh a, tun thlengin hmalakna hmuh tur a la awm lo a; an ngaih pawimawh em avang leh Dan chhunga dodal a tul an tih avangin vawiin khan ngenna hi an pe nawn leh tih an sawi a.
He Bill dodalna hi State Legislative Assembly-in a neih tul an tih avangin nimin khan Assembly Speaker Pu Lalrinliana Sailo hnenah pawh All Party Meeting ko tura ngenna an pe bawk tih an sawi a ni.
Mizo Zirlai Pawl (MZP) pawhin The Citizenship (Amendment Bill) 2016, Parliament-a pass a nih loh nan hma an la chhunzawm zel tih thuchhuah siamin an sawi a.
MPZ thuchhuahin a tarlan dan chuan The Citizenship (Amendment) Bill, 2016 hi Lok Sabha-a pass a nih tawh hnuah Rajya Sabha-ah pass tumin BJP Sorkar chuan chak takin hma a la mek zel a. The Citizenship (Amendment) Bill, 2016 hi pass a niha India Sorkarin a hman chuan Mizote tan chuan a hlauhawm dawn hle nia sawiin pass a nih loh nan NESO chuan nasa taka hma la tawhin nawrhna hrang hrang a lo huaihawt tawh a ni, an ti a.
MZP leh NESO hruaitute hian central-a political party hrang hrang hruaitute pawh hmu tawhin, CAB pass a nih loh dan tur hi an sawipui tawh niin MZP thuchhuah chuan a sawi a. The Citizenship (Amendment) Bill, 2016 hi pass a nih loh nan NESO chuan hma a la chhunzawm zel dawn a, hemi hmalakna kawngah hian MZP chuan Mizo mipuite thlawpna leh tawngtaipuina thinlung takin a ngen nawn leh tak meuh meuh a ni, an ti.
Mizoram Pradesh BJP President Dr. JV Hluna pawhin CAB chunghangah hian nimin khan chanchin thar thehdarhtute kawmin, CAB hi parliament-a pass a nih loh nan Mizoram Kohhran tin te tawngtai rual ni se an duh thu a sawi a. Lok Sabha-a CAB pass a nih dawn hian hun tepter takah hriattir an ni chauh a; hemi hma, kum 2016 khan CAB hi pass an duh loh thu Prime Minister hnenah an lo thlen daih tawh a ni, a ti.
Hetihlai hian, Mizoram Kohhran Hruaitute Committtee chuan Citizenship Amendment Bill 2016 cgy ram leh sakhua tan a him lo ni a hriian, ram leh sakhua a him a, sakhaw zalenna a awm zel theih nan, ni 16 inrinni zan khian kohhran tinah tawngtai rual neih ni se tiin ngenna a siam a ni. - AIR News Aizawl
Post a Comment