Nizan March ni 21, Ningani thimhlim (dar 6 PM vel) khan Zemabawk leh Thuampui inrina (Falkland peng) Pioneer (BRTF) Duty post bula Pu Vanlalrawna leh Lalsangpuia (Taxi driver) Falkland Veng ten Pioneer duty kut an tuar hi pawi kan tiin kan dem tak meuh a ni. Pu Vanlalrawna hi Greenwood Hospital panpui nghal niin, admit a ni a. A nghawng bakah a Lu (head)-nâ a ti hlê a. Ngaihtuahawm lutuk a ni lo hlauh a ni.
Mizo kutthlaktu vai hmuh tum Mizo tlangval pungkhawm leh Police lam pawh an innawr buai chho zui a. Boruakin ziaawm lam pan lova a punlun tak zel avangin DIG-in Branch YMA President Pu Lalramsanga rawn biain, Branch Committee member tlawmngai thenkhat te buaina lam panin kal nghal a ni a. Theihtawpin mipui lamah remna siam tumin ban phar nghal niin, pungkhawm boruak a ziaawm nghal viau nghe nghe a. Branch YMA hruaitu te’n Zemabawk mi chu mahni in lam pan tura ngenin, hei hian awmzia a nei hlê bawk. YMA hruaitu te thuawihin mi thahnem tak chuan mahni in lam an pan nghal a. YMA hruaitute ngenna zah taka dawng sawngtu Zemabawk thalaite an fakawm hlê a ni.
Mi thenkhat mawl fal tlem tê avang erawhin boruak a ralmuang har deuh a. Helai hmun hi Taxi Stand anih bakah World Bank Road luhka tak, Picnic leh leng vak tamna a ni a. Boruak awmdan mumal hrechiang lo ruiphur te avangin kan boruak a alh leh hluai thin niin a lang. YMA hruaitu te leh Police lam ten a bul hnai dawr siamte boruak a zia deuh theih nan tiin, an dawr te khar tura ngen an ni a, a ziaawm phah viau bawk.
Mipui phungkhawm khap dai tura, kan hruaituten thusawi an sawi mek laiin, mipui hmachhawna ding; Tv. K.Vanlalthanzauva (Lalpuia), Zemabawk (Branch Executive Committee member) Lu-ah lung kuttum tiat velin a rawn deng dawp a. Pioneer MI-ah hruai nghal niin, Pioneer Doctor a rawn kal ngam tak loh avang leh nîkhawhrelo (unconscious)-a a awmzui avangin Police Ambulance-in Civil Hospital, Aizawl lamah Branch hruaitu ten an pan pui a, CT Scan leh test chi hrang hrang tih nghal niin, a that thu leh ngaihtuahawm anih loh thu kan dawng a, a lawmawm hle mai. Boruak a ralmuang thawkhat tawh ni a, a lan tak hnuah dar 1:30AM vel khan Police duty lam te tin san an ni ta a. Tichuan, Lalpuia pawh Casualty (Emergency) Ward-ah admit niin, a rawn harh chhuah chhoh zel bawk avangin dar 2:30AM khan damdawi in atangin tin san a ni a. Central YMA hruaitute piah lamah, Pu Lalchamliana Home Minister leh Police hotuten an ngaihvenin an ngaihsak hlê a, a inenkawlna senso thlenga tumsak a nih tur thu an sawi a, a lawmawm kan ti hlê a ni.
Ram leh Hnam humhalh duhna rilru pu a, Mizo tlangval pungkhawm thahnem tak hmel hmuh kha a nuam a, a lawmawm tak zet a. Mizo tlangval huaisen ṭhian chhan thih ngam hmel kan hmuh khan thla a ti muang a, kan ram kan hmangaihzia a lang chiang hle a ni. YMA member pung khawmte thuawihna, a hun taka a lang kha a Mizo viau bawk.
Kan khua, kan veng, Kan ramah ngei vai kut kan tuar erawh rilru a na a, insumtheihna tlak chham a awl a. A phutawk hremna tuar ngei se. A bo a bang awm lova inenkawlna sen so tumsak ngei se tih hi kan duhdan a ni.
Chutihrual erawh chuan, a mawlfal pahnih khat avanga pawisawilovin kutpalh an tuar leh nunna hial chan thei dinhmun a kan Mizo pui ngei te kan siam erawh inenfiah nan hmang ila.
Buaina avanga hliam tuar zawng zawng te rilru kan hriatthiam pui a, an dam leh thuai kan duhsak a,kan Ṭawngṭaina a ni e.
MALSAWMDAWNGZELA
Secretary, ZYMA
Post a Comment