Mipui Candidate Lalnghinglova Hmar (Tetea Hmar) - TIMES OF MIZORAM

15 Mar 2019

Mipui Candidate Lalnghinglova Hmar (Tetea Hmar)

MP atana Mipui Candidate Lalnghinglova Hmar (Tetea Hmar)
Candidate puannia Tetea Hmar thusawi:

Mipui Candidate Lalnghinglova Hmar (Tetea Hmar)

Nikum November thlaah Hnam Chhan Hnatlang neiin Mizoram hmun tinah tan kan la a, kha mi tula ka thlalak hmuh khan tun hi min hruai thleng ta a ni ber.

Silchar lama Mission Compound-a missionary pakhat chuan, "Aw lalpa, Kan ram neih chhun Mizoram hi i hmangaih Zofate tan kumkhuain tinghet ang che," tih hi lehkha ziak a keng a, Mizo thuamin a inthuam a, Facebook-ah a tarlang a ni. He Mizo missionary hian Mizoram tan tih theih dang a nei si lo a, a theihna sang ber a lo chhuah a ni. He thlalak ka hmuh hian ka lung a chhia a, "Kei hian Mizoram tan eng nge ka tih ve theih?" tih zawhna a lo lut a ni.



He mi ni vek hian putar pahnih inzui det det ka hmu a, an aw rawl tawpin an au a, an mittui a tla lo chauh a ni. Ram tan an theihna sang ber an hlan.

Zep nak emaw, kei tehlul hi political party hrang hrangte hian MLA inthlan dawn hi chuan candidate atana min rawn dawr ve thin a, len chilha min sawm hialte pawh an awm a, vawiin a tel ve lo party pawn min sawm fiam ve a, party dangte pawh. Politics hi ka kalna tur niin ka hre ngai lo a, Pathianin kawng hrang hrang min pe a, ka kalna zawna theihtawp chhuah mai hi ka duh dan a ni. Print journalism lamah a ni emaw, sports-ah a ni emaw, thalaite tana tih tur hrang hrang buatsaihah te, kohhran hrang hrang thalai leh tleirawlte bula thusawia min sawmte hian theihtawp ka chhuah ve thin.

Tuna Lok Sabha MP atan sawmna ka dawn tirh pawh khan ka kalna tur niin ka hre chiah lo a, nimahsela ka rilruah thil pathum a lo lang nghal:

Mipui Candidate Lalnghinglova Hmar (Tetea Hmar)1. Miin ram tan an theihna sang ber an hlan a nih chuan, kei pawhin ka ti ve tur a ni. Mizoram leh Mizo hnam tana sports leh thil danga kan tih ve chhun chhun hi hei aia level sanga chhunzawm hi ka duh a, ka tum a, Pathian leh mipui zarah ka tling a nih chuan ka tih theih ngei ka beisei.

2. Mizo thalaite hi India ramah hian kan lang ve tur a ni, tih hi ka ngaihdan a ni. Parliament kan thlir a, hnam dang chu kum 40 chu sawi loh kum 30 rual te te pawh ram rorelnaah an tel thei. Mizo thalaite hi India ram rorelna sangah kan tling ve tawk tih lantir ka duh. Pathian leh mipui zarah MP hi ka tling a nih ngai chuan, Lok Sabha-ah Mizoram leh hnam tan ka au ngei ang. Mizo thalaite min pui turin ka sawm che u a, in chungah rinna ka nghat lian a, min thlang tling a nih chuan in tan theihtawp chhuahin ka ding ang.

3. He Lok Sabha inthlan lo awm tur hi Citizenship Ammendment Bill 2016 duh leh duh lo inbeihna a ni. Journalist ka nih angin ka theih angin ka zir ve a, CAB hi Mizoram tan a hlauhawm a ni. CAB hi kan duh lo a nih chuan Lok Sabha-a CAB titlang duhtu lam hi kan do mai tur a ni, a bak kawng dang a awm lo. Tawngkam thiama, "Chu mite pawh an chuti khati..." tia sawi chi a ni lo. CAB duh lo chuan CAB duhtu hi kan do ang a, kan thawhpui lo mai tur a ni. CAB dotu mai ni lo, CAB duhtute ep zawnga ding tur ka ni.

Mipui Candidate Lalnghinglova Hmar (Tetea Hmar)February 17-a North Lakhimpur-a Youth Rally an neih tumin BJP President Amit Shah chuan, "BJP kaihhruai NDA hi Lok Sabha inthlana kan tlin chuan CAB kan tharthawh ang, kan kal tlangpui ang," a ti. Khati khawpin kan duh lo a, total bandh kan huaihawt a, protest day kan hmang a, India hmar chhak miten kan duh lohzia an hre chuanga heti taka zah loa min ti mai hi a na ka ti a, Lok Sabha-a BJP kaihhruai NDA-a ban phar lo turin ka lo pen chhuak a ni.

Mizoram mipuite vawiinah hian ka sawm duh che u a, tun hi tan rual hun a ni. Tun hi party bil dah thaa Lok Sabha-a Mizoram, Mizo hnam leh Mizo sakhua a himna tura kan pen chhuah hun a ni a, chutiang tak tur chuan Mipui Candidate atan ka rawn inpe a ni. In puihna ka mamawh e. Ka lawm e.

No comments:

Post a Comment

Post Bottom Ad