Zu khapna dan chu pass a ni ta a. Kan CM leh Synod Moderator Open Letter ka thawn, a copy MLA zawng zawng ka pekah khan heng thute hi ka sawi a:
1. Khawvel history-ah zu khap rem thei an awm kan la hre lo. MNF phei chuan ramhnuai aṭanga silai nen meuh pawha tihrem an tum an hlawh chham tawhna a ni.
2. Zu khap hian zu ina buaina a thlen theih aia buaina nasa zawk tam tak a thlen thin. CORRUPTION kan tih pawh hi America-a Prohibition an neih laia lo piang chhuak a ni.
2. Pi leh pute khan zu kha chhan nei vek leh thil ṭha tih nan vek an hmang a. An culture-ah THIL ṰHA nihna an neihtir a. Chuta ṭang chuan mi pangngai tan hman sual thiang a ni lo. Zu an hmang sual zen zen lo va, an nun tihphuisuitu-ah an hmang zawk a ni.
3. Missionary hmasaten kan hnam zia min tihchhiat sak zingah zu kha a langsar ber pakhat a ni a. Kristian hmasaten an tana chhan pawimawh tak avangin zu kha thil sualah an chantir a. Chuta ṭang chuan zu in chuan chhan hran awm lovin châk vang ringawtin a in a. Chu chuan ruih ngei a chawh a, chu chu kan buai ṭanna a ni.
4. Mi tam tak zu vangin an thi a, buaina tam tak kan neih phah kan tih zawng zawng hi Missionary hmasate leh Kristian hmasatena zirtirna dik lo an neih aṭanga inṭan leh chuvang liau liau chu a ni. Kristian kan nih hma, pi leh pute hunah zu vanga thi an awm kan hre ngai lo va, zu vanga intibuai an awm kan hre ngai lo.
5. Khap a ni emaw, Zawrh a ni emaw, zu-in mi a tihbuaina chhan ber chu zu chhia vang a ni a. Zu chhia zuar lova, zu ṭha chauh zuar tura a zuartute leh a endiktu turte Sawrkarin a thunun thei ṭhin lo hi harsatna leh buaina thlentu lian ber a ni.
6. Mizo zu a sak dan dik taka sak hian ‘alcohol’ ṭhat lohna a nei ve lo va. Mizo zu dik tak tihchingpen loh hi zuar ila, buaina kan nei lo vang.
7. Kohhranten zu chungchanga zirtirna dik lo an neih hi an ṭhiat hma chuan zu hi kan buaipui zel ang a, kan buaipui tawlh tawlh ang.
Heng thute leh thu pawimawh dang sawi telin, CM leh Moderator, Synod Open Letter ka thawn bakah a copy MLA zawng zawngte ka pe vek bawk a. Tu man min rawn chhang lo va, khing thu pawimawhte khi haiderin an ngaih dan nghet neih sa ringin zu khapna dan chu an pass ta a ni.
Anmahni sawi dan ngeiin ZU POLITICS hi an tlin chhan a ni a, an khệl zel dawn a ni ber e. Bible-in zu a duh lo, Pathianin zu a duh lo an han ti lehzel phei hi chu Pathian zah lohna nasa tak niin ka hria. Khawvel ram danga kan Kristian-puite zingah hetiang ngaihdan nei hi an awm ve si lo va. Bible-in zu hi thil sual a ni a ti lo va, hman sual theih a nih avangin fimkhur turin min fuih mai zawk a ni. An hlawhchham chuan Pathian chu an mawhpuh em lo vang chu!
A thuhrimin kan CM meuhina zu vanga thî 5000 – 7000 a tih hi khawi ‘source’ aṭanga a dawn nge ni ang le? Zu vang thi ni ngeia kan hriatte chu an chhungte OFFICIAL VERSION-ah chuan INTERNAL BLEEDING tih te an ni deuh zel si a! Rin thil thu mai mai, Evidence awm si lo te hi ram leh hnam hnuk khawih thei thil Dan pass nana innghahnaa kan hmang a nih chuan a va hlauhawm awm ve?
Kan ram Corruption hluarna ber a nih leh Natna ṭihbaiawm pui puiina a bawm nasat ber kan nihna chhan hi Sawrkar-ah leh Kohhranah te Hruaitu tling leh ṭha kan neih loh vanga Inkaihhruaina ṭha a awm loh vang a ni. Zu aia hlauhawm zawk Corruption leh Natna ṭihbaiawm pui pui min neihtirtute hi engtikah nge kan Sawrkar leh kan Kohhrante hian an do ve ang le?
A chhanna chu ZAWHTE CHU TU NGE ṰHI AWRHTIR ANG? tih a ni mai ang em?
Michael Lalmanzuala21/03/2019
Post a Comment