Lushai Soap Industry siam Dish Wash - TIMES OF MIZORAM

Breaking

Home Top Ad

Post Top Ad

Lushai Soap Industry siam Dish Wash

LUNGLEIAH LUSHAI SOAP TLANGZARHNA HUN HMANG


Nimin Zirtawpni dar 1:30 PM khan Art & Culture Auditorium Venglai Lungleiah Thleng Silna (Dish Wash) H. Laldinmawia, Zohnuai (Lushai Soap Industry) siam thar chu Pu H. Lalthansanga, President MJA Lunglei chuan a tlangzarh. 

Pu H. Lalthansanga chuan Lunglei tlangvalin a ma kutkawih ngei hmanga inbualna sahbawn a siam tawh hnuah thleng silna sahbawn (Dish Wash) a siam chhuak leh tlangzarh a ni thei chu lawmawm a tih thu a sawi a. Mizo siam ngei thil hi kan ngaihhlut a, keimahni Mizote ngei hian kan hman uar a tul a, chu chuan kan khawtualah sum tualleng a siam tam a, economic dinhmun tha zawkah min awmtir theitu a ni a, phai lam atanga thil siam ringawt lei leh hman ai chuan Mizo siam, kan khawtual mi ngei siam kan hman hian kan ram leh khawtlang tan pawh a sawtpui zawk a ni, a ti. Mizo thalai mahni kutkawih hmanga eizawn tum leh hmalatu kan nei chho zel hi hmasawnna lawmawm tak a ni a, ngaihsan tur dik kan ngaihsan a, sum hmanna tur dik taka kan hman thiam a tul a ni a ti bawk. 

He hunah hian H. Laldinmawia, proprietor Lushai Soap chuan lawmthu a sawi bakah kalkhawm atangin mi hrang hrangin thu an sawi a, kal khawmte Vanrammawii Pautu chuan zaiin a awi bawk a ni. 

H. Laldinmawia, Prop. Lushai Soap hianZohnuai Lungleiah Lushai Soap Industry hi 11th Sept. 2015 khan a din a, sahbawn siam hi CSDP, N. Delhi-ah a lo zuk zir tawh a ni. A thil siam thleng silna sahbawn hi 500ml bottle niin Rs 100/- man tur a nih laiin tlangzarhna hmunah hian Rs 70/- a hralh chhuah a ni a, kalkhawm ten an ken zawng zawng an lei zawh sak nghal vek a ni. ~DIPR

No comments:

Post a Comment

Post Bottom Ad