Chief Electoral Officer (CEO) Ashish Kundra chuan NGO Coordination Committee in an thilphut ngiat nana hmalak an tum chu thulh turin a ngen a, NGO thutlukna chu pawi a tih thu sawiin, mipui te chanvo chhuhsak lo tura ngenin, Mizoram chuan India ram rorelna in-ah aiawh an neih ngei na tura hma la zawk se a ti a ni.
Nikum Assembly inthlan dawn khan ECI, NGO Coordination Committee leh State Election department te chu inbia in, Mizoram chhung ngeiah Tripura a cheng Bru ten vote thlak se tih an rel bawhzui nan Kanhmunah polling station siamsak an ni tawh tih sawiin CEO chuan hetihlai hian Bru te hming chuanna polling station ah kher vote thlak tir tumna a awm lova, sawi ho a nih a hrelo a tih a sawi a ni.
Bru laklet chungchanga harsatna Mizoramin a tawh mek chu, inthlanpui hmanga chinfel theih chi a ni lo a ti a, sorkar hotute leh Bru hruaitute inbiak a ngai a ti a ni.
CEO chuan, inthlanpui neih tur hi boycott ni ta se, postal ballot a vote tla ringawt pawh pawm a ni thei tih sawiin, tunah hian postal ballot hmangin mi 450 velin vote an thlak tawh a, service voter hi an vaiin 2,000 vel an ni a, Election Commission chuan a duh chuan heng ho vote hmang hian result a puang mai thei a ni a ti.
Bru te hi nikum Assembly inthlanpui neih tuma vote thlak tir an nih danin, tun tumah hian ramri hnaih Kanhmun ah special polling station 15 siamsakin vote thlak tir leh tum an ni a, hetah hian Tripura relief camp 6 a awm voter 12,081 te vote thlak tir tur an ni.
NGO Co-Ordination Commitee hian thawhtanni khan Meeting neiin Tripura Transit Camp-a Bru te tana Special Polling Booth siamsak duh loh lantirna na zawka kalpui ni se an ti a, Tun thla ni 11-a Lok Sabha inthlanpui neih tura duty tur Sipai phurh khawm nan leh Election Duty atana Commercial Vehicle leh Private Vehicle te Election buaipuitu ten a man khawm pawh che chhuak lo turin a ngen a. Election kaihhnawih atana hman remti lo turin lirthei neitute a ngen a, an thilphut a hlawhtlin theih nan karleh thawhtanni atang khian tiamchin awm lovin Mizoram pumah Total Bandh huaihawt a rel bawk a ni.
He a thurel hi, Mizoram pumah inthlanna muanawm leh tluang taka neih a nih loh nan hmalak tha a lo tih tawh bawhzuina a ni an ti a. Election buaipuitute leh Sawrkar lamin Kanhmun-a Special Polling Booth Tripura Transit Camp-a awm te tan siam mek chu NGO Corrdination Committee chuan tha a ti lova, Transit Camp-a awm mekte Mizorama Electoral Roll-a an chuanna Polling Station theuhah vote thlak tir tura thuneitute a ngenna chu tihhlawhtlin ni ngei se an ti a ni.
Vawi tam tak Mizoram a let tura tih pawh a let duhlo Bru te avanga harsatna Mizo mipui leh Mizoram Sawrkarin a tawk ngun ta lutuk hi NGO Co-Ordination Committee chuan pawi a ti a, hetiang hi a tawp theih nan Mizo mipuite tanrual a tul a ni an ti. - AIR Aizawl
Post a Comment