BRU LALET TURIN RUAHMANNA SIAM - TIMES OF MIZORAM

Breaking

Home Top Ad

Post Top Ad

BRU LALET TURIN RUAHMANNA SIAM

Tripura relief camp 6-a awm Bru chhungkaw 5,000 chuang lakletna atan ruahmanna siam chhoh leh mek a ni a, hei hi Bru ho lalet tura ruahmanna siam hnuhnung ber tura nih thu sorkar hotute'n an sawi.

BRU LALET TURIN RUAHMANNA SIAM

"Tripura relief camp 6-a awm Bru-te lakletna atan ruahmanna siam chhoh leh mek a ni a, hei hi Bru ho lalet tura ruahmanna siam hnuhnung bertur a nih thu sorkar hotute'n an sawi"

Bru laklet hna thawk tura inpuahchahna bul tanna atan Thawhlehni kalta khan Kolasib-ah Kolasib district Core Committee on Bru repatriation chu an thukhawm a, a tuk Nilaini khan Mamit district-ah he district core committe chu an thukhawm leh bawk a. He inkhawm pahnih tel puitu Additional Secretary for Home Pi Lalbiaksangi chuan inthlan hma a NGO Coordination Committee leh sorkar inremna angin kumin hian a tawpna atan Bru relief camp a awm chhungkaw 5,000 vela mi 32,000 vel awmte laklet hna hi thawh tum a nih thu a sawi a. Mamit district-ah hian Bru chhungkaw 4,185 te chu hruaikir a inbenbel tir turin ruahmanna siam a ni a, Kolasib-ah chhungkaw 822 chu khaw 10-ah inbenbel tir tum niin a dang zawng chu Lunglei district-a dah an ni ang. Hetiang hian ruahmanna bul hi tan ni mahsela, fur zualpui reh hma chuan a taka hruai kir hna thawh hi chu a rem a rin loh thu Home department hotu pakhat chuan a sawi a, chubakah sorkar laipui atanga sum ruahman sa an dawn phawt pawh a ngai hmasa dawn niin a sawi a ni.

Lok Sabha inthlan hma khan Bru ho chungchangah hian NGO Coordination Committee chuan Kanhmun khua a Bru relief camp a vote nei 12,000 chuangte vote thlak tir tum dodalna atan inthlanpui kawmserh hialah an vau tawh a. Hemi chungchanga sorkar nena inremna a siamah chuan kumin chhung ngei a Bru te hruaikir hna ruahman leh a, a lokir duh lote chu Tripura a inbenbel tir tawh a, Tripura a awmte chu Mizoram electoral roll a\anga an hming pih vek ni se tih a ni.

Sorkar laipui leh Mizoram leh Tripura sorkarin kum 2010 a\ang khan theihtawp chhuahin vawi 8 lai lokirna tur ruahmanna a siam tawh chungin Bru sang tel chu kir duh lovin Tripura relief cam-ah an la awm tlat a. Delhi a inremna siama anmahni uaptu pawl hlun ber Mizoram Bru Displaced People's Forum (MBDPF) hruaitute'n an hming an ziah hnan pawh an pawmpui duh tawh lova. Hetah hian Bru chhungkaw lokirte chu an bank account-ah cheng nuai 4 theuh thun sak, chhungkaw tin an insakna tur cheng nuai leh sing nga pek leh kum 2 chhunga chhungtin thla tina Rs 5,000 chhawmdawlna sumfai pek leh a thlawna ration pek tihte a ni. 

Kum 1994 a Bru hnam humhalh leh hmasawnna atana din, Bru National Union (BNU) chuan kum 1997 September ni 23 leh 24 khan Mamit district-a Saipuilui khua-ah inkhawmpui kovin, Tripura atanga palai tel vena he inkhawmpui-ah hian Mizoram khawthlang lam satthla a Bru autonomous district council hrang din an ngiat thu an puang a. Hei hian helai bial velah boruak a tih sosan bakah BNU leh Bru Students' Association (BSA) hruaitute'n an mite chu autonomous district council an nawrnaah tharum thawhna thleng thei a nih avangin Mizoram chhuahsana Tripura a pem turin an ti a. Hetih lai hian hel pawl lo ding tawh Bru National Liberation Front (BNLF) mite chuan hemi kum October ni 21 khan Dampa Tiger Reserve chhunga ramsa humhalh tura duty Pu Lalzawmliana chu an kaphlum a, Mizo thinrim er tur hlauthawngin a hlawpin Tripura-ah an pem ta a ni.

Bru pem thlate hi kum 2009 November ni 16 atanga Mizoram lama lalet leh turin ruahmanna siam tan a ni a, mahse a hma ni 3-a BNLF hovin Bungthuam tleirawl Zarzokima an kahhlum leh tak avangin laklet tumna hna hi a tlawlh satliah pawh ni lovin Bru chhungkaw engemawzat an pem thlak phah leh ta a. A hnu-ah vawi engemawzat an lokirna tur ruahman a ni chungin chhungkaw 1,916 a mi 8,855 chauh an lo la kir a, tam tak chu sorkarin an lokirna tur a buatsaih sak ni lova anmahni duhthu a lokir an ni.

~AIR Aizawl

No comments:

Post a Comment

Post Bottom Ad