MIZORAM HMUN HRANG HRANGAH CHHIATNA THLENG - TIMES OF MIZORAM

Breaking

Home Top Ad

Post Top Ad

MIZORAM HMUN HRANG HRANGAH CHHIATNA THLENG

Tunlai fur ruahtui tla mek hian chhiatna rapthlak leh nasa thlen lo mah se district thenkhatah tuilian leh inkalpawhna kawngpui ping te, mimal chenna in chim te a awm nual.

Aizawl Dist.-ah chuan tun thla ni 2-a Durtlanga BSUP Bldg. chima mi pahnih an thihna bak chu mihring nunna chân an la awm lova, amaherawhchu tunkar Ningani-a Tlawng luia tla Pu C. Lalfakzuala, Aizawl Govt. Complex ruang chu chanchin buatsaih lai tleng hian hmuh a la ni lova. Khawpui chhung leh chhehvel khawimaw laiah kawng hnawh pinga leimin te awm bawk mah se buaina lian a thlen hmain thenfai leh nghal an ni.

Tukin Dar 9 vel khan Bawngkawn Shalom Veng, Suzuki Showroom chhakah lei a min a, a chhak a RCC Building hi chim mai thei dinhmunah a ding. A hlauhawm hle. In chim anga thudarh kha Bawngkawn veng mite zawhchian an ni a, in hi a la chim lova, chim thut thei erawh a nih thu kan dawng.

    

Lunglei dist.-ah pawh tun thlengin ruahsur a la chatlak lova, Lunglei khawpui chhungah leimin tenau a awm nual ., College vengah in 6 chu luah ngam a nih loh avangin an inthiar chhuak a. Khawthlang lamah Lungsen khaw bul, Sihphir leh Tlabung inkarah leimin lian tham hmun 65-ah a awm a, eng motor mah a tlan tlang thei lo. Lungsen atanga Tlabung Kawlphetha pekna hruipui thingtluin a delh chat nasain ban tlu a tam hle bawk a. Theihtawp chhuahin siam pawh nise hmunpui lam atangin an rawn pui a nih loh chuan chawlhkar khat vel chu kawlphetha an hmuh theih a rinawm loha ni.

Tlabungah hian In 150 chu hmun him lamah an inthiar chhuak tawh a, Tipereghat leh Chakma khua engemawzat an insuan chhuak tawh bawk a. Hnahthial-ah pawh leimin vanga chenna in luah ngam loh a awm nual a, Tuipui D pawh a lian sawt viau.

SUMO LEH TRUCK INSU

Vawin  13.7.19 chawhnu dar 4:00pm vel khan Tachhip khaw hnuai ah Thiak sumo leh Vai Truck an in su a, hliam tuar mi pathum te chu Falkawn hospital ah phurh phei an ni.


Lunglei North bialtu MLA, Dr. Vanlaltanpuia MYC Chairman chuan a bial chhunga leimin vanga chhiatna thleng khaw hrang hrang tlawhin Silpouline a tul angin a sem zel a ni.

Lunglei District Disaster Management Authority chu a tulna apianga che chhuak turin an inralring reng a. Official-te insemdarhin thli leh ruah avanga Lunglei hmun hrang hranga leimin, mimal leh vantlang thil tihchhiat te a hmunah kalin an enfiah a. Chhanchhuah leh chhawmdawl hna kalpui mek a ni. 

Hemi bakah hian 2nd Battalion MAP hnuaiah SDRF trained personnel 100 awmin sipai engemawzat an che chhuak mek a ni.



Lunglei District Emergency Operation Centre pawh hawn leh tawh a ni a, a tul hun apiangah phone no. - 0372-2325949, 9774294825 leh 9862653478 -ah te engtik lai pawhin an biak theih a ni.

Mamit Dist.-ah chuan Mamit atanga Dapchhuah khaw thlen dawnah National Highway 44A kawngpuia leitan chu a min avangin lirthei kal theih lohin a ping a, leitan helna kawng pawh ruahsur nasat avangin a diakin a nal hle a, lirthei kal tur te pawh lei laihna khawl hmanga hnuh chhuah thin an ni.

PWD Highway Div. I hotute chuan National Highway 44A-ah hian leimin dang awm ve bawk mah se lirthei kal theih tura an then fai nghal vek thu leh hmun hran hranah khawl an inchhawp thu an sawi a ni.

Serchhipah pawh leimin vanga chenna In atanga inthiar chhuak an pung chho zel a, nizan hmasa leh nimin khan Serchhip Saron Venga chhungkaw 7-an inthiar chhuak a, a hmaa lo inthiar chuak tawh chhungkaw 4 an awm bawk.

  
  
Ruahsur nasa vang hian Serchhip Tuikhuah Venga leimin leh leitawlh thin pawh che lehin, hei hian National Highway 54-na a hnawh ping thin a, kawng ping hi JCB-in a khat tawkin thianfai thin mah se a chhak lam atanga lei tawlhin a rawn hnawh leh zel thin avangin khual zin phur leh lirthei veivak engemawzat tangkhangin a theih dan danin Serchhip Chhim Veng lamah heltir an ni bawk a, kum hmasa lam atanga Serchhip Tuikhuah Veng-a lei tlahniam pawh che leh in, lei tlakhniamna intanna laiah hian lei khi thar a awm leh tawh bawk a ni.



Serchhip Bialtu MLA Pu Lalduhoma chuan Serchhip hmun thenkhata chhiatna thleng te hi vawiin khan a tlawh.

Pu Lalduhoma hian Serchhip Dinthar Veng, Saron Veng leh Vengchhung hmun thenkhat tlawhin, chhiat tawk chhungkuate invawmluhna hmun a tlawh nghal bawk. Pu Lalduhoma hian Dinthar veng YMA leh Saron veng YMA hruaitute hmalak dan tur a sawipui a, Bialtu MLA a nihna anga a tih theih chin chinah hma a lak dawn thu leh khawtlang hruaitute nen pawh a tul dan ang zelin inbetawna inrawn tawn zel phawt ngaia a hriat thu a sawi a ni.

Pu Lalduhoma hian Dinthar leh Saron Venga lei min avanga in leh lo chhiate leh mahni chenna in luah zui ngam loh avanga hmun him zawka inthiar chhuakte chu an invawm luhna hmuh theuhah tlawh chhuakin a tawrhpui thu sawina hun leh tanpuina pawisa fai hlanna hun a neih nghal bawk a ni. Bialtu MLA hian hnatlang thingpui lumna tur te leh chhiat tawkte tanpui nan YMA Branch pahnih leh chhiat tawk chhungkaw 16 hnenah Cheng 3,7000 a hlan a ni.

~Lawrkhawm:AIR/FB


No comments:

Post a Comment

Post Bottom Ad