Mizoram Peoples Conference Party Hruaitu Lulawk An Bang - TIMES OF MIZORAM

Home Top Ad

Post Top Ad

Mizoram Peoples Conference Party Hruaitu Lulawk An Bang

Mizo Peoples' PartyZoram Peoples Movement Party(ZPM)-ah Mizoram Peoples Conference Party mi te an Vice President Pu Lalthansanga MLA hlui hoin an lut a, Pu Lalthansanga chuan Rangkachak anga tuiek thei lo Brig. Thenphunga Sailo policy tuipuitu party-ah a zawng zawnga thawk turin MPC atanga bangin an ZPM pumhlum ta tih vawiina ZPM Party inkhawmah a sawi a. 

Brig. T Sailo policy atchilhtute an la nih reng thu sawiin, Pu Thena’n ‘Ngaizel khamah zuangthla rawh u’ ti se dam chuan vanneih a ni mai tih rilru pu chungin an zuang thla duh hial ang, a ti.

ZPM zawm ve bawk MPC Sr. Vice President Pu C. Laltanpuia chuan ZPM chungchangah pumkhata awm leh party dang chetchhiatna sawia phur ringawt lova kalphung thar kawng zawha a taka chet chhuah a tul thu a sawi a. Pawisa leh therhlo dang hmang te, dawt leh finfiah hleihtheih loh hmangtea sorkarna siam tum lo turin ZPM mipuite a sawm a. 

Mizoramin ramri buai a neih chu vei ringawt a tawk lo va, chingfel tura a taka thawh a ngai a, sorkarna chelhtute mawhphurhna a sang hle a ni, a ti a, “Kristianna leh Politics hi inhnerem taka kalpui theih a ni a, Politcs-ah Krista chanchintha a zalen chuan rorelna tha leh dik a thleng ngei dawn a ni” a ti bawk.

MPC Party Sr. General Secretary Pu Phairothanga pawhin MPC chhuahsana ZPM-a an awm tak chungchang sawiin Mizoram hmun hrang hranga MPC te pawh reiloteah ZPM ah an rawn inchhunglut vek ang, a ti.

ZPM hnuaiah hian party leh pawl hrang hrang pasarih an inchhungkhawm a, nikuma General Assembly chu chuhin MLA 7 an nei a, chung MLA zingah chuan a hmaa MPC ni thin 3 an awm a ni. ZPM chu Party anga kal a registration a tihfel hnuah erawh an thawhpui thin MPC chu inhnukdawkin a kal hrang a ni.

Hetihlai hian, ZPM Legislature Party a MLA pasarih te thutna turah buaina a awm thei em tih zawhna chhangin MLA Pu Vanlalhlana chuan ZPM hnuaia independent-a inthlan chuha tling an ni a, anni chu Independent MLA an ni mai a, Assembly ah pawh ZPM Legislature Party thutnaah an thut mai tur thu a sawi a ni.
Pu Vanlalhlana chuan MPC-ah nihna nei thei an ni tawh lo tia MPC President-in a hrilh hnuah an nihna chelh te an bansan nia sawiin MPC an chhuahsan thu erawh a sawi chiang thei lo a ti a, ZPM Legislature Party-ah an thu a nih erawh chuan ZPM mi anga ngaih theih an ni thei tih a sawi a, hemi chungchanga thil chianglo hi hrilhfiah mai theih a la ni lo a ni, a ti.

Mipui thlan tlin MLA leh MP-te’n thlan tlin an nihna party bansana party dang an zawm chuan Anti Defection Law hmanga ban theih an ni tih a ni a, hemi chungchang hi zawhna tamtak a awm a, MPC leh ZPM Party inkarah pawh hei hi zawhna zawh tam ber a ni.

ZPM MLA zingah hian MPC ni thin MLA 3 - Pu Vanlalhlana, Pu C. Lalsawivunga leh Pu VL Zaithanzama te an ni a, tun dinhmunah ZPM Party zawm zingah hian an la tel ve chiah lo a ni. ~AIR

Post Bottom Ad