Nimin tlai khan Hawla Indoor Stadium-ah kum 2019-2020 chhunga Mizoram State Sports Council Budget chungchang ngaihtuahin Mizoram State Sports Council(MSSC) General Body Meeting chu an thukhawm a. He meeting pawimawh tak hi Sports Minister Pu Robert Romawia Royte, MSSC president ni bawk chuan a kaihruai a ni.
Mizoram Sawrkar hnuaia State level Sports Association hrang hrang 32 thlungkhawmtu Mizoram State Sports Council hian kumtin General Body meeting neiin an sum hman tur Budget an ruahman thin a. Nikum khan Sports Association Promotional Fund (Budget)-ah Rs.208,70,000.00 dah a ni a, kumin hian 20% a tihpun chhoh niin Rs.250,44,000.00 a ni ta a, a punna chu Rs 41,74,000 a ni. Mizorama district pariat a District Sports Committee budget-ah nikum (2018-19) khan Rs.16,20,000.00 dah a ni a, 2019-20 atan Rs 24,30,000.00 dah a ni a, kum hmasa aia a punna chu Rs.8,10,000.00 niin 50% a pung chho a ni.
MIZORAM STATE SPORTS COUNCIL GENERAL BODY MEETING THUKHAWM
MSSC (Mizoram State Sports Council) hnuaiah hian Sports Association 32 awm mahse Cricket Association of Mizoram chu BCCI (Board of Control for Cricket in India) hnuaia an awm tak avangin MSSC atangin fund an dawng ve thei ta lova, chuvangin Promotional budget te hi Sports Association 31-te tan semzai a ni dawn a ni. Tin, Establishment-ah Rs.95,00,000.00, Reserved Fund-ah Rs.5,00,000.00, Other Promotional-ah Rs.115,10,000.00, Sports Medicine-ah Rs.5,00,000.00 leh Sports Infrustructure-ah Rs.50,00,000.00 ruahmanin pawm (passed) a ni bawk a. MSSC-in India ram aiawha khawvel huap inelna lian (International event)-a tel te tanpuina Kit Allowances Rs.10,000.00 a pek thin chu a vawi khatna atan ti pungin Rs.20,000.00 pek thin an ni tawh dawn a. Infiammite Mizoram ram pawn leh ramchhunga ei in man (DA/Food Charges) hun rei tak an lo hman tawh Rs.250 per day chu ram pawn bikah Rs.400 per day-a tihpun a ni a, ram chhungah Rs.350/- per day-ah tihpun a ni bawk ni. He General Body Meeting-ah hian MSSC-in a enkawl play field leh indoor stadium hrang hrang hman man bituk thar a ni a, enkawl dan tur -Regulations for the Procedure for management of Assets pawh sawiho nghal leh a tul anga ennawn leh tura tih a bi.
Kum kalta 2018-2019 chhungin Sports Association zingah Mizoram Amateur Taekwondo Association chuan International, National leh Regional-ah medal 262 an dawng a, All Mizoram Karate Association chuan International, National leh Regional-ah medal 115 an dawng a. Muaythai Association of Mizoram chuan National-ah gold medal 15 leh silver 1 bakah Regional nen a vaiin medal 44 an dawng a. Heng Association pathumte hi medal dawng hnem zualte an ni. Hetih lai hian International, National leh Regional level-a medal dawng lo Sports Association 14 an awm bawk a ni.
MSSC Meeting kaihruaitu Sports Minister Pu Robert Romawia Royte chuan Sports Association leh District pariatte sum hman tur, infiammte Kit Allowances leh DA tihpun a ni thei chu lawmawm a tih thu a sawi a. Sawrkarin infiammite hmasawnna tur nasa taka a ngaihtuah mek thu leh Mizoram State Games ropui tak neih tuma inbuatsaihna a kal mek thute, kan mamawh leh a hmun mil tawka stadium sakna tur sum te pawh neih fel a nih tawh thu sawiin Mizo mipuite chu India rama hnam fit ber ni tura tan la turin a sawm a ni.~DIPR