Agriculture Minister Pu C. Lalrinsangan Serchhip sira Mat Lui kama buh leh thlai dang chinna hmunpui, Zawlpui zau leh a chhehvel ram te nimin khan tlawhin loneitute nen an inkawm a, Mat Irrigation Project hmun hma te a tlawh nghal bawk.
Zawlpui-a Agri & Horti Society te thlama loneitute nen an inkawmnaah Minister chuan, mahni tharchhuah ve theih reng state dang atanga chawkluh a tam lutuk chu a rilru nat thlak a ni, a ti a. He thil ngaihmawhawm tak tireh tur hian ngaihtuahna sen thar a tula, hnam dang ram dang mite thil siamsa zawrh chhawn ringawt ngaihtuah lova a tharchhuaktu, a siam chhuak ve tu nih tum zawnga inelna neih a tul hle a ni, a ti.
Minister hian mipuiin an ei nasat ber buhfai thar tam a pawimawh thu sawiin, buhfai phurh kual velnaah hian sawrkar sum luangral a tam lutuk a, hei hi tihbo vek theih anih loh pawhin nasa taka tihhniam a ngai a, state dang atanga buhfai chawkluhte tiphai kawk thei tura a tharchhuah lama tan lak a ngai a ti.
Agriculture Department a thawktute pawhin an mawhphurhna pawimawh zia hriain iptepui aka hnathawk thin tur an ni tih an hriatreng a tul a ni, a ti. Serchhip District chhunga Oil Palm chingtute harsatna pawh a hriatpui thusawiin, Bukvannei lamah Godrej Company in Mizoram thar zawng zawng lei an inhuam a, anni hnena hralh zel dan tur ruahmanna a ngaihtuah nasat thu leh a hlawhtlin ngei a beisei thu a hrilh a ni.
Serchhip district ah hian WRC farmer 2040 awmin, WRC leh Tlangram lo atangin buh qtl 74870 tharchhuah a ni a, ram hactare 4236 a zauvah buh chin mek a ni. Chutihlaiin District in kum khat chhunga buhfai a mamawh chu qt nuai 1 & 6600 a ni thung a. Tun dinhmunah Serchhip district hian a mamawh zat buhfai zaa 60 a thar chhuak mek a ni. Ram 1510 vela zauva chin belh leh chuan mamawh zat thar theih inbeisei a ni a, chutianga zau buh chin theihna hmun chu a la awma ngaih a ni.
Pu C. Lalrinsanga’n zawlpui leh a chhehvel a tlawh kualnaah hian Serchhip bialtu MLA Pu Lalduhoma pawhin a tawiawm a ni.
(PTC Serchhip)
Post a Comment