MARY WINCHESTER (ZOLUTI) LAK LET LEH THU

MARY WINCHESTER (ZOLUTI) LAK LET LEH THU HI T.H. LEWIN –AN A HRECHIANG BER MAI

HAN KAWM VE TEH.

Lalngheta Sailo ,IPS(Rtd.) 

Mission Vengthlang

Hmânlai chanchin, thu mu hnu kaihthawh leh hi Sapin ‘HISTORY’ an tih hi a ni ber awm e. 'Ngaihdân a tam, pawm dân a tam' tih hla ang deuh khan, Mary Winchester (Zoluti) kha Mizo lal Bengkhuaia pasalțha, vai runtute zingah khân, tuin nge, khawi khuaah nge, tu hnen ațangin nge an lak let leh? Hengte hi thu inchuh, a dik tak hriat harsa tawh a ni a; mahni ngaihdân leh duh dân dik bera tarlan tumna avanga History tih danglam pawh hrehlohna te hi thil awm thei ani awm e.

Hetih hunlai hi kum 1871 ,November thla tawp lam leh kum 1872,February thla laihawl vel hun chhûng, tunah chuan kum 139 kal tawh a mi kha a ni. (He article ziak hunlai Jan.2011). History ah chuan a la rei lo, hman ni lawk tih mai theih a ni a, mahse Mizoten ziak leh chhiar kan thiam hma daih anih avangin, keimahni lamah chuan record engmah kan neilo a, thawnthu ang a kan pipu leh rual û te sawi chhawn kan hriat ve chu, kan hriat theih chin (source) chu a ni mai. Unau thawnthu sawi pawh adang tih ang deuhvin tun hnaia mi hran hran thu hriatte, Chanchinbu a kan lo hmuh ațang pawh hian hriat dân a in ang lo hle. 

Tin, kan lehkhaziaktu țhenkhatte pawh hian belhchian a dawl lem lo. Entirnan: Chhimlam vai len vawikhatna kum 1871-1872 leh chumi ațang a kum 20 zet hnu, 1892-a J.Shakespear(Tarmita), Superintendent of South Lushai Hills hova lal țhenkhat la tlawm duhlote tuk dawl tur a lo thawk, chhimlam Vaillen vawihnihna ti a sawi țhin te pawh, sawi pawlh ta mai mai an awm a. Amaerawhchu, Sâp pachal, lehkhathiam, British Sawrkar ropui lâi a Officer lian leh pawimawh, Bawrhsap hna a chelhtu, chhimlam Vailen vawikhatna, Mary Winchester la let tur a lo thawk rawn hruaituin, uluk tak a ama Diary-a a chhinchhiah leh mit hmuh leh tawnhriat ngei ațanga a ziak, ’A fly on the wheel’ a mi hi rinhlelh rual a ni lo. A dik tawk hle tih hi rinngam a ni. 

Amaerawhchu, mihring hming leh an hming a ziak dân te, khaw hming ai a an lal hming a tarlan țhin avangte hian zir ngun a ngai deuh a ni.

Kan hriat țheuh angin Vaillen Vawikhatna kha țhuang hnihin a lo thawk a. Hmar lam ațanga lo thawk (Northern Column) chu Cachar lam ațangin, British General Bourchier-a hovin Tlabung lam ațangin Bengkhuaia lalna ram lam panin an rawn hrut chho a. Chhimlam ațanga lo thawk (Southern Column) hi Lt.Col.Tom Herbert Lewin ( Mizovin Thangliana anlo tih țhin ) Chittagong Hills a Deputy Commissioner ni mek chu, Political Officer a ruat niin General țanpui turin a lo tel ve a. Tun hma lamah Mizo lal pakhat, Rothangpuia Thangluah nen anlo inhmelhriat in, țhianah anlo insiam tawh a. Tin, chubakah Mizote a lo hmelhriat tawh bawk a. Chuvangin, Chhimlam Vaillen hruaitu atan hian a țangkai hle nghe nghe a ni.

‘A Fly on The Wheel' lehkhabu Chapter XII–THE LUSHAI EXPEDITION1871-72 a T.H Lewin-an a 

ziak dan in, November ni 16,1871 ah Kassalong atangin Demagree(Tlabung ) panin a țhianpa, Colonel Macpherson nên an chhuak a. An hotupa General Brownlow pawh a lo thleng ve thuai a.

November ni 22 ah chuan, General Brownlow nên Thangluah lal Rothangpuia ( Rutton Poia,ama ziak dan in ) khuaah an kal a. Rothangpuia chu țanpuitu atan an sawm a. Mahse alo hreh hle a, neutral-a awm a duh thu alo hrilh a, mahse an nawrluihna avangin zui ve a remti ta a.

December ni 2 ah chuan Mizo lal pakhat, Vanpoia (ama ziak danin ) leh T.H Lewin an inhmu a. Vanpoia chuan T.H Lewina hnenah Sylus( Sailo tihna) ho chuan an sialte talhin anlo in ralring nasa hle hle a. Vailian lo do ngei an tum tih a hrilh a.

December ni 27 ah chuan, 27th Punjab Native Infantry sipai 500 zet anlo thlen belh a. A hma hian 2nd Gurkhas-sipai 500 leh 4th Gurkhas – sipai 500 leh Frontier Police tam tak leh Laipui pû te, Surveyor-te, mi 2000 deuh thaw an pungkhawm a. Hei bakah hian an puakphur ringawt pawh tam tak, an mahni zat zet an nih ngei a rinawm. Lewina hian an number zat hi a ziak lova, Sipai ho operation thuruk deuh pawh a ni maithei e. Puakphurte nen chuan sang thum chuang chu an nih mai hmel hle. 

Hetih hunlai hian Tlawng lui thlang lam, Pukzing tlang dung leh Thorang tlang bul velah te hian, Sailo lal Lianlula thlahte, Savunga fate ho an lal a. An ni ho hi T.H Lewin an Sylu chiefs a tih te hi an ni. Tlawng lui chhak lam Mat lui chhaklam thlengin Sailo Lal Rolura thlahte ho an lal a. An ni hi, T.H Lewin a hian Howlong chiefs a tihte hi an ni a. An target ber Zoluti leh vai sal tam tak kawl tu an ni tih an hria. Howlong Lal a tihte hi mi hran daihah a ngai niin a lang. Khawthlang lal ho te hian nasa takin vailian hi dan an tumin an lo bei hlawm a. An hneh loh mai bakah an khuate pawh an hal sak deuh vek a, an tuar nasa hle a ni.

January ni 2, 1872 ah chuan General Brownlaw leh T.H Lewin te chu Thorang tlang chhipah lawnin khua an thlir a. Khawchhak lam thui tak ‘Howlong’ Lal ho (Rolura thlahte) khua te chu chiang takin a lang thei a. Nothern column ho chanchin hriat an chak em em chu engmah hriat phak a ni lo thung. 

January ni 13 ah chuan T.H. Lewin leh Rothangpuia te chu Gurkha sipai 50 rual nen ‘Howlong’ lal khaw pakhatah an han kal a. Khua a mi ten an thawm an lo hriat veleh an khua chu an mahniin an lo hal a. Hei hian inremna an duh loh zia a entir a ni tih T.H Lewin leh Rothangpuia te chuan an hre chiang hle a, camp lamah an kir leh rih a. 

Rothangpuia chuan ‘Howlong’ Lal hotute unau Bengkhuaia leh Sangvunga te chu a fala hmuh a țha berin a ring a. A rawtna angin Rothangpuia leh Frontier Police Subedar Mohamad Azim te pahnih chu Bengkhuaia khaw lam panin mi dang pawh hruai lovin an kal ta a. He tih hunlai hian General Brownlow- a ho sipai tam tak chu Burma tlang dung khawilai emawah an in camp niin a lang. Khaw hming hi sawi a nih loh avangin a hmun lai tak sawi a har hle. 

January ni 21 ah chuan ‘Sylu Chief’ Savunga fapa naupang ber, Lalzika khua chu nasa takin an kap a. An laipui te chi (seven pounder) te pawh an han hmang chhin a ni awm e. Hemi ni, January ni 21, 1872 hian T.H Lewin chuan thu lawm awm tak mai a dawng a.  Chu thu chu Rothangpuia leh Sebudar Mohamed Azim ten Mary Winchester an lak let leh tawh thu leh Chittagong ațanga Calcutta pana an thawn thu Colnel Tytler, 4th Gurkha C.O, Demagree a awm chuan a rawn hrilh chu a ni. 

Colonel Tytler chuan, Mary Winchester chu Rothangpuia khua, Tlabung kiang vel (Belkhai a ni mai thei) ațanga la chhawng leh in; Chittagong lamah sap ram a thawn haw turin an thawn tih thu chu a țhian pa T.H.Lewin a rawn hrilh a ni. Bengkhuaia khua ațanga Rothangpuia leh Subedar Mohamed Azim ten Zoluti an lak ni leh an lak dân hi chipchiarin a sawi lo va. An lak ni tak pawh hi a lehkhabuah hian a sawi lang lo. 

January, ni 21 hi T.H Lewin an he thu lawmawm, a țhianpa Tlabung a mi in a rawn hrilh chhawn a lo dawnna ni a ni tawh a. Chuvangin Bengkhuaia khua ațanga Tlabung kiang Rothangpuia Lalna khua thlenga an kal hun chhung te han ngaihtuahin Mary Winchester lak let ni hi January ni 21 chu a ni thei lo hrim hrim a, a hma chawlhkar khat vel zet a nih ngei a rin awm.

Kan thu inchuh lian ber an lakna hmun hi khawi khua nge tih hi T.H Lewin lehkhabu ațang bawk hian lo chhui leh ila

February ni 12, 1872- ah chuan Delesari lui (Tlawng lui tihna a ni) panin an awmna camp (Buarpui tlang dung vel) ațang chuan an chhuk thla a. Tlawng lui an kai hnu ah, thui fê an kal hnu chuan, ram hmun rem, thengthaw nuam tak an thleng a. Hei hi Thenzawl phai ruam ni in a lang. Lui dung thui tak an zawh leh a. He lui hi Vanva ni ngeiin a lang. Tichuan riah hmun (camp) an khuar ta a. Helai camp hmun chiah hi hriat a har tawh hle a. Vanva lui hnar lam Tuikhiang phul vel hi a niin a rin awm. Sipai tam tak leh puakphurte khan, hmun rem leh tui tamna an thlang ngei ang tih a rin theih. 

A tukzingah chuan T.H Lewin leh Captain East chuan ram an fang vel a. Khaw kang hlim hlawt an hmu a. Chu khua chu khaw miten an hal a ni a. Khaw mi tam tak an hmu a; chung ho chuan inremna an duh thu an sawi a. Helai hi Chawngmama khua niin, T.H Lewin hian a ziak a. Chawngmama hi Thenzawl vel khaw pakhat enkawltu (Sangal khawng an tih țhin) Bengkhuaia hnuaia awm niin a lang. 

Khaw pakhat an mahniin an lo hal hi Lianrikhuma khua, Bengkhuaia hnuaia khaw per bawk niin a lang bawk. Lianrikhuma hriatrengna lung hi Thenzawl khaw hlui tlaklamah a awm țhin an ti. A khaw awmna chiah hi hriat a har tawh hle. 

Bengkhuaia leh a u Sangvunga leh an farnu pahnih leh hmei fa Zathawma te hi, chhim leh hmar indo laia Vûta nena Buanhmun inchuh Lalpuithanga fate kha an ni a. Lalpuithanga hi Rolura fapa upa zawk, Lalrivunga fapa a ni. Bengkhuaia u Sangvunga hi a pa lalna hmun Bawngchawmah a lal a. Bengkhuaia hian Sailam ah, in 1000 khua neiin, khawper 6 lai a nei a. Chungah chuan a makpa te leh a mi rin ngam te khaw hotuah a siam a. Chung chu Kawlriah a farnu Chhawnthiangi Pasal Zangkuna, Chhiahtlangah Zangtoha, Tahreuh tlangah Bungpauva Paihte, Diarkhai ah Lalburha, (Tlangduta, a patea fapa) Samlukhaiah a nau, apa hmei fa Zathawma, Thenzawl phai ruamah Chawngmama leh Lianrikhuma te buhchhun eiin (sangal khawngin) an awm hlawm a. A fate hi an la puitling lova, tlang hrana rorel thei an la nihloh avangin, heng a mi rinho te hian a fate puitlin huna an lalna tlang insem tur remchang atan alo ruahman lawkna niin a lang. 

Bengkhuaia hi 1879 a Thenzawla a thih khan kum 50 mi vel lek a la ni a. A nupui Ngurbawihi pawh chu rei vak lovah a thi ve ta mai a. An fate an la naupang si a, engtin tak awm  ang maw miten anti a. Mahse Ngurbawihi nau, Pi Bengngawngi an tih chuan a pasal Rothangvunga chu fa neilovin a sûn bawk a. A ni hian Bengkhuaia khumpui chu luahin a u fate Thawngliana, Tlungbuta, Lalhrima leh Kamlova te unau chu a țulpui ta a. An lo puitlin chuan Bengkhuaia’n a lo ruahman lawk angin heng khua ah te hian Lalna tlang an insem ta hlawm a ni.

Vailian chanchin lamah han kirleh ila; February ni 15, 1872 ah chuan General Brownlaw chuan an awmna camp bul vel en chiang turin party pahnih a tir chhuak a. Captain Batty chuan Camp ațanga khawchhak lam mêl khat vel maiah chuan, luite pakhat ral lehlama Bengkhuaia hote silai leh fei keng mi tam tak an awm tih a zuk hmu ta a. General Brownlow chuan T.H Lewin hnenah, Bengkhuaia hote chu eng emawti a biak pawh theih dan kawng zawng turin a hrilh a. Chumi zana an inbiakna angin T.H Lewin chu a tuk zing khawvar hlimah Bengkhuaia hote awmna chu sipai tumah hruai lovin a pan ta a. 

Hei hi luikam a ni a. He lui hi T.H Lewin hian Tuldung lui tiin vawi tam tak a sawi a. He lui ah hian thing sei tak ft. 18-20 vel an lo kit kai a. Lui kam lehlamah silai leh fei nen mi tam tak an lo awm a. An thingkih kaina lai tak pawh hi helai khaw chhehvel a mite chuan hmanlai atangin ‘Vai biak kai’ tiin kan lo hre țhin. Tuldung lui tia T.H Lewin an a sawi hi tuna Thenzawl khaw thlanmual atanga km chanve vel Lau lui ‘Vaibiak kai’ tih hming lo pu ta hi a ni ngei tih hi rinhleh rual a ni lo. He lui hi hmanlai ațangin Lau lui tia hriat a ni a. Engvanginnge T.H Lewin hian Tuldung tia a lo hriat tih hi chu kan chhui chhuak thei rih lo a ni.

 T.H Lewin a sawi dan ațanga han ngaihruat in, Tuldung lui chu lui tui dum luang muang tak, chu lui kanna tura thing sei tak ft. 18-20 vel kita lui kam lehlam vuak kai theihna tur lui dang helai velah a awm thei lo. Tin, mi thenkhatin Mat ni awma an sawi pawh hi a dik lo tih chianna chu Thenzawl camp ațanga mêl khat vel, thing ft 18-20 in a vuak kai theih, tui dum luang muang tak, (a black slow – flowing stream, the Tuldung) a tih hi Lau lui ngei a ni. Mat lui chu ft 18-20 a sei thing kih kai phak chi a ni lo va, a tui a dum in a luang muang hek lo va, Camp ațangin mêl khat vel a ni thei lo bawk. Helai hmun ah hian T.H Lewin chu amah chauhin a kal a, Bengkhuaia leh a u Sangvunga te nen an ralthuam ken lai Silai leh ngunhnam te inthleng tawnin inremna thu an sawi ta a. Hemi tuk tuk leh, February ni 18, 1872 hian T.H. Lewin leh Bengkhuaia te unau hian remna thuthlung chhia an chham a ni. 

An tihdan tak hi T.H. Lewin chuan ‘I swore the indispensable oath by blood and steel with the Howlong chiefs’ a ti a. Eng ang Ceremony chiah nge hriat chian a harsa. A hmun chung changah hian John Shakespear(Tarmita) Lushai Hills Bawrhsap (Superintendent) hmasa ber khan December ni 3, 1910 a T.H. Lewin lehkha a thawnah chuan Lushai Hills lo țhan chhoh dan a hrilh a. He lehkhathawn hian ‘Thenzawl phai ruam (valley) a, Mary Winchester mantute nêna in inbiakna vel te kha, buh chin na hmun a lo ni vek tawh e’ tiin a hrilh a. Hei hi tuna Thenzawl Field lian saw a ni ngei ang. Tunhma keini naupan lai pawhin ‘Lo țha zawl’ kan ti țhin.

An Inbiakna hmun tak hi tuna Thenzawl hmarlam km 3 vel Lau lui khawhthla chhak chiah saw a ni. Art and Culture ho pawhin chhinchhiahna lung chhete an phun ve. He inremna ang hian vai sal tam tak chu chhuah an ni a. Gurkha sipai tlem tê leh survey party te chu Bengkhuaia khua leh a chhehvel khaw dangte tlawh turin an kal a. Sipai dang General ho leh T.H. Lewin te chu Tlabung lam panin an haw leh nghal a ni. He tih lai tak hian Governor General Loard Mayo chu Andaman thliarkar a tlawh laiin an kâp hlum hlauh mai a. He thu lawmawm lo tak hian T.H. Lewin hlawhtlinna chu a rawn chhilh ta burh mai a. A hnu British Sawrkhar Chawimawina a lo beisei ve țhin te pawh a lo tlawlh phah ta niin a sawi a ni.

Tin, Bengkhuaia hi Sailamah khua in 1000 neiin 1876 favang laia thlichhe tleh khân, a khua a nuai chhe vek a. A ma in pawh a tlûng a țhuai bung hmawk a, hei hi thlil țhalo takah an ngai a. Chumi kum buhseng zawhah Thenzawlah pemin Sailam chu an rauh san ta. 

He thli chhe tleh kum 1876 hi Mizote thil chhinchhiahna hun pawimawh ram puma thleng kha a ni a. Bengkhuaia hi Thenzawla a pem hnu lawk, 1879 ah kum 50 vel mi niin a thi ta a.

Vaillen hun hi 1871, November leh 1872, February a ni a. Sailam vanglai, in 1000 khua a an inchhal hun leh a chheh vel khawper 6 lai Bengkhuaia hian a awp lai a ni ngeiin a lang. Heng a faten a thih hnu a an awp tak khua te hi, a hmain Sailo lal awp khaw pangngai an ni lo tih pawh hriat a ni a. Hetiang hi khatih lai huna thil awm dan a nih avangin Mary Winchester pawh kha Bengkhuaia khawpui Sailam ațangin, amah Bengkhuaia remtihna ngeiin Rothangpuia leh Sebudar Mohamed Azim -a te khan an la let leh tih hi rin ngam a ni. Sipai tam tak han kal a lak kir leh an ni lo va. An lak ni chiah pawh hi sawi theih a ni lo.