JNV THENZAWL A CHAKMA ZIRLAI CHUNGA THIL THLENG CHUNGCHANG - TIMES OF MIZORAM

Breaking

Home Top Ad

Post Top Ad

JNV THENZAWL A CHAKMA ZIRLAI CHUNGA THIL THLENG CHUNGCHANG

JNV THENZAWL: Ni 26.9.2019 khan Thenzawl a Jawahar Navodaya Vidhyalaya School ah Chakma mipa rawlthar, pawl 12 zirlai chu Mizo ten rawng taka sawisain, Iron rod ten an vua niin Social Media lamah thehdarh a ni a. Hemi chungchangah hian vawiin Pathianni chawhma khan Thenzawla Vantawng Chanchinbu Editor, Doordarshan palai ni bawk Liantluanga Renthlei chuan JNV hi tlawhin, a hmunah thil awmdan a enfiah a. Mizo leh Chakma zirlai awmte thu a zawtfiah.

JNV Thenzawl School Captain, pawl 12 zirlai Lalnunhlima chuan, Ni 25.9.2019 khan Hostela awm mi 2 pawisa Rs. 1000/- leh Rs. 250/- a bo avangin hemi zan hian zirlai an inkokhawm a, pawisa rutu chuan dahlet turin warning an in pe a, pawisa bo chungchangah hian rinhlelh thu hlaah Mizo pahnih leh Chakma zirlai pahnih chu thu an zawtfiah tih sawiin, Mizo 2 leh Chakma 1 chu pawisa bo ni a an awmna nen pawisa rutu hi ni theiin an hrelo a. Hetia zirlai an inkohkhawm hnu hian, pawisa bo Rs. 250 chu tutih hriatlohin a dahlet leh a, hetihlai hian Rs. 1000 chu dahlet anih ve loh avangin, ni 26.9.2019 zan hian zirlai inkokhawm lehin, hetah hian Chakma zirlai pakhat chu thu zawtfiahin, an dawp deuh a, hetah hian Iron rod bung hmang an hriatloh thu leh hetianga an tih chhan hi chi inthliarna leh inhmuhsitna vang ni lova, Hostel a pawisa bo awm ṭhalo an tih vang leh pawisa bo hi hmuhlet an tum vanga hetianga inzilh an nih thu hi a sawi.

He zirlai kuttuar nia sawi hi 27.9.2019 zing khan Integrated Ayush Hospital, Thenzawl ah hruai a niin, first aid pek a, JNV ah hian hruailet lehnghal a ni.


He thilthleng chungchangah hian zirlai kuttuartu chhungte hi nimin Inrinni khan Thenzawl JNV ah hian kalin, JNV hotute nen pawh inpawhtlang takin engkim an sawiho a, Social Media lama boruak ṭhalo ang zawnga a darh vak mai chu JNV Principal leh Staff leh zirlai kuttuar nu leh pa te pawhin pawi an tih thu leh hetiang hi thleng tawh lo se an duh thu an sawi a ni.

He thilthleng chhuichiang tur hian vawiin chawhma khan JNV Lunglei Principal, hun rei tak Thenzawl JNV a Principal lo ni tawh Pu JC Lalsangzuala chuan Thenzawl JNV hi tlawh nghalin, a hmunah thil awmdan a enfiah nghal a ni.

JNV Thenzawlah hian tun dinhmunah zirlai 206 an awm mek a, Chakma zirlai hi mipa 25 leh hmeichhia 10 an awm mek a, hetianga social media lama thuthang vang leh Chakma zirlai ten an duh vangin Nizan Inrinni zan aṭang khan Chakma zirlai mipa te hi Hostel/House pakhatah a hlanga awmtir an ni.

JNV Thenzawla Mizo leh Chakma zirlaite chuan hnam leh chibing ang rawngkaia indihduhdahna leh indiriamna ang chi engmah an neih ngai loh thu leh chibing hawia inthliarhranna a awm an hriat ngai loh thu anmahni kawmtu Thenzawla Vantawng Editor Liantluanga Renthlei chu an hrilh a ni. ~Gilbert Renthlei

No comments:

Post a Comment

Post Bottom Ad