Mizoram Sawrkarin Officer-te Laptop Leisak Dawn - TIMES OF MIZORAM

Home Top Ad

Post Top Ad

Mizoram Sawrkarin Officer-te Laptop Leisak Dawn

OFFICER-TE INVULHNA RAM - MIZORAM

Mizoram sorkar ah hian thil mak deuh mai awm chu, an awmna department a zirin awmhmun ţha leh ţha lo a in ang lo hi a ni a. Department tam bera thawkte chuan khawpui a awm an duh vek a, a bik takin Education, Health department-te ang chi, thingtlanga an awm pawimawhna em em ang chi-ah hian hnathawkte hian khawpui a awm an duh a, an kherh nasa a, a bik takin Aizawl khawpui a awm an duh em em deuh vek a ni. Hnathawk tamna dang Police department-ah pawh hian chutiang tho chu thil awmdan a ni a, silai keng chi a lũt, hmun kilkhâwra outpost a awm tŭr a inhuam a inpete pawh Aizawla awm theihna tiin a thei fà chuan, Traffic leh Security unit lama insawn an tum ta vek emaw tih tur a ni.

Chutiang chu department tam taka thawkte duh dan ber a nih laiin department ţhenkhat, a bĩkin engineering department leh Environment, Forests and Climate Change department te angah chuan a letling hlauh a ni thung a, hei hi tlêma officer laklawh deuhvah a zualkai bĩk. He’ng department-ah hian division hrang hrang a awm a, Aizawl khawpui chhunga awmhmun nghet nei, division satliah a hotu ber nih ai chuan thingtlang lama division – territorial division an tih mai – a thawh chu an duh vek zawk a. Aizawl khawpui chhunga division-ah pawh, territorial division ang hi a awm thova, chutianga awm chu an chuh hle bawk.

Hetianga awm duhna an neih bĩkna chhan hi eng dang vang mah ni lovin, a hna a mawm vang a ni a, eirŭk tŭr a tam a, a awlsam vang a ni e, tiin sawi ta ila a chiang mai àwm mang e. He thil hi thurŭk uâlaû (open secret) a ni chungin han tarlang ta tho ila – hetianga awmhmun ţha (lucrative post) chang ve lova, khawpui a an department lian pisa a lal ve ang reng tak lawi si a ţhute hi awmhmun ţha, khawpui emaw thingtlâng lam emaw a an thawhpuite hian pawisa thawhkhâwmin thla tin an pe ţhin an ti zu nia! An hmangaih leh an khawngaih vang emaw, sorkar dâna a inziah vang emaw ni lovin, awmhmun mawm lo a awmte hnena an pawisa thawhkhâwm pek hi tihdan phunga rei tak an lo neih tawh niin an sawi. Aizawla an pisa pui a officer nih aiin territorial division lama arpa nih an thlang a nih hmel e.


Ţhenkhat sawi danah phei chuan Police-te hi inthununna hnuaia inrélbàwl an nih avanga an hotute an zahin an hlau thiam ber tura ngaih a nih laiin, Engineering department a thawkte hi an inhlau ber zawk a ni àwm e. Police-ah chuan kalphung pangngai leh an tihtur a nih avangin an aia lal zawkte, mi hmuhah chibai bŭkin an zahna an lantir a, engineering department a thawk ţhenkhatte’n, an aia lal zawkte an hlauh leh tlawn dan erawh chu chhŭngril tak aţanga lo chhuak ni àwmin an sawi a. Hei hi sum leh pai a inlaichinna thŭk zawk vanga inzahna leh inhlauhna hi lo lang chhuak ţhin niin an sawi a ni. Sum leh pai, chu pawh mipui sum (public money) hmanga inchhèk-arbâwm a, tute emaw zah leh hlauh an lo phur ve hi chu nihna leh thuneihna hman dik lohna chiang tak, mipui sum khawih chingpenna leh thil tenawm tak chu a ni chiang khawp mai.

Department hrang hrang thiltih dan lo endik a, an kal dik lohna a lo khalh ngiltu tur, a bik takin mipui sum hman dan phung dik lo a awm leh awm loh lo chĩk a, endik a a dik zawk anga kal tura thuràwn petu chu Secretariat lam hi an ni a. Secretariat hi ‘a sorkar lai tak’ tia sawi ţhin a ni. Under Secretary leh Chief Secretary inkâra awmte hian, sorkar thuchhuah reng reng an hming an ziah hnan ţhin a, “The governor is pleased” tih hnuaia hming ziak ţhin, a sorkar bera chu an ni. Chutiang chu an nih avangin Secretariat a thawkte hi an sorkar satliah mai ni lovin, department hrang hrang kalphung leh an thiltih ţhat leh chhiatte hre chiang em em tŭra ngaih an ni. Hman deuh khan Power department enkawltu Deputy Secretary pakhat-in, “PWD hi chu sum hman dik loh a awm pawhin an inthup thiam a, an fel thlup tho hian a lang a, kan department erawh hi chu chuti hlauh chu kan ni,” tia a sawi zauh hi ka hre tawh.

Chutianga department/directorate kut dinglamin a tih leh veilamin a tih hriat saktu an nih avangin Secretariat a awmte, Under Secretary aţanga Chief Secretary inkâr ho hian, department-te bakah sorkar (ministry) mar dek thiam ber an ni mai àwm mang e, a tih theih. Sorkar hmasa hunlai khan Secretariat-ah hian tunge an nih pawh hriat chian loh muster roll (MR) an lo chhawr ţeuh mai tih, khatih laia Finance Minister khan a hmu chhuak a, tihtawp a nih tak avangin sorkarin cheng vaibelchhe têl tak meuh meuh a hum theih phah niin an sawi.

Hei bakah hian dân tlawhchhan awm miah lovin Chief Secretary leh Under Secretary inkâr a mite hian MR an lo chhawr ve ringawt mai hlawm a. An lal dan indawtin an chhawr tlêmin an chhawr tam a, an lal inkhaidiat dan angin a kal chho ve thliâi a ni. Dân kalh a hetianga MR an lo chhawr ve ngawt mai hi a chhan nia lang chu, engineering department a awmte’n an lal dan indawta an chhawr an hmuh ve reng vang a nih hmèl e. Chubakah department ţhenkhat ngaihdan nghet tak anga an awmna (Secretariat) hi awmhmun mawm lo tak nia an ngaih avanga mahni lo inhaivũr ta mai niin an lang bawk. Sorkar lah chuan hetianga dân kalha MR an lo chhawr ngawt hi tihtawp sak ta lo chuan, a hmingin a tihtlem sak diat diat a, a pawmpui (regularized) sak ta zawk daih leh nghal a.


Hei bakah hian sorkar hnathawkte hi pisa leh in lama telephone kawl a, sorkarin an hman man a pek sak hnu hmanah, kum 2004 aţanga Mizorama mobile phone kan hman ve ţan hnu lawk khan, thlatin a an mobile hmanna senso engemawzat a tum sak leh ta a. Thawhţanni khan laptop/notebook/tablet leh hetiang lam thil engemaw ber leina atan sum an han phalrai leh ta a. Secretary leh a chunglam zawng tan Rs 80,000 man, Joint Secretary leh Additional Secretary te tan Rs 60,000 man leh Under Secretary leh Deputy Secretary te tan Rs 40,000 man te lei phalna turin hriattirna chhuah a ni. Dik tak chuan hetiang thil hmang thiam leh hmang ţhang hi chuan an nei vek tawh tura ngaih a ni a, a la nei lote hi chuan pawisa a awm avang hian lei thar mahse an hmang thiam chuang lovang a, an ţangkaipui chuang loh bakah, sorkar tana ţangkaina awm lo leh a lo thlâwna sum sènna mai a ni ang tih a chiang reng. An hlawh kan hria a, hetiang leina tur a hranpa a pek ngai lo khawpa hlawh tam lutuk vek an ni bawk.

Mizorama sorkarin computer (desk top) lei nachang a hriat ţantirh aţang khan enlêt ta ila, a hlâwkpuitu ber chu supplier-te leh a leina sum khawihtu official (minister te pawh an tel mahna)-te an ni ber a. Man to uchûak taka lei pâwl an awm a, CAG report-ah thleng tarlan a nih kha. Khati khawpa sum tam sènga kan lei kha hun rei ta chu ‘Zuma’ leh computer game dang dang khelhna atan leh ‘puitling ennawm’ dahţhatna atan baka chhawr ţangkai lovin tam tak chuan an rûla-raw-neih a nih kha. Computer hman ţangkai theih dan, a software program hrang hrang ţangkai lutuk mai tam tak zu hmang ţangkai pha hi chu kan department hrang hrangah hian khawvâr lam arsi ang pharh an nih a rinawm.

Kan officer-te hian mipui rawngbawltu, sorkar chhiahhlawh (sorkar chu mipui tà a ni a) tih inhre lo ang mai a an thuneihna hmanga mipui sum ren hlek lova inhaivũr an chĩn uar poh leh, an hnathawh leh mipui tana an thawhchhuah hi kan en uluk dawn tih hria sela. Mipui hmasawnna tur sum khawihtu leh thawktu an nih lai a, thawh ţhat lam leh thawhchhuah tam lam chuan tur nei mang si lova an inhaivur zêl a nih chuan, an luchungah meiling an chhék ve zêl tih hria sela, hetianga mipui tana ţangkai lo, ţul lo taka mipui sum tihhek kawnga sorkar hnathawk thunun ngam lo sorkar pawh hian mipui thinrim a tawngbaw ngei ang.

Ziaktu : HC.Vanlalruata, 
Principal Correspondent, PTI

No comments:

Post a Comment

Post Bottom Ad