Craft Exhibition, Costume Show & Ethnic Cuisine 2019 - TIMES OF MIZORAM

Home Top Ad

Post Top Ad

Craft Exhibition, Costume Show & Ethnic Cuisine 2019

ART & CULTURE BUATSAIH EXHIBITION KHARNA HUN HMANG

Vawiin khan North East Zone Cultural Centre (NEZCC) Dimapur, Ministry of Art and Culture leh Mizoram Art and Culture Department tangkawp buatsaih ‘Craft Exhibition, Costume Show & Ethnic Cuisine’ kharna inkhawm chu Vanapa Hall, Aizawlah neih a ni. Ni thum awh he programme kharna inkhawmah hian Art and Culture Minister Pu R.Lalzirliana chu khuallian a ni.

Art and Culture Minister Pu R.Lalzirliana chuan ram chhunga hnam hrang hrang awmte hnam zia leh nunphung a bo lohna turin sawrkar laipui Ministry of Culture chuan hma a la thin a, NEZCC kaltlangin Mizoramah pawh hnam hrang hrang chengte pualin an themthiamna, inthuamna leh ei leh in te thangthar zelten an hmuha an hriat theih nan programme a buatsaih chu a lawmawm tak zet,  a ti a. Kan hnam tawng, ei leh in, hnam incheina leh hnam zia rangte humhalh turin sawrkarin hma a lak mek lai hian a neitu hnamte hian kan hnualsuat tur a ni lo, a ti. Pu R.Lalzirliana chuan ram hmasawnna nasa tak karah khaw thlang tih dan, inchei dan leh ei leh in te kan ching chho ve zel a, chutih mek lai chuan Pathianin kan hnam inthuamna mawi tak min pek a bo loh nan te, hnam min phuar khawmtu tawng kan hman tlanglawn Duhlian tawng humhalh a, hnam bil tawng hrang hrang te a bo loh nan leh kan culture vawn nun a nih zel theih nana hma la zel turin kalkhawmte a fuih a ni.


Craft Exhibition hi Vanapa Hall bathlarah neih niin stall 9 a awm a, chungte chu :- Khuang - Saitual Chhim Veng Presbyterian Kohhran Ramthar Committee; Chem - S&JJ Industry; Kuhva kau atanga disposable plate, bowl leh spoon - Village Organisation Bilkhawthlir South; Mizo cooker, hmarcha rawtna etc. - CT Alluminium, Chhuanthar Tlangnuam, Baktawng; tiang hawl chi leh khuang vuakna - W.S Production; suk leh sum - SS Production, Saitual Chhim Veng; tea coaster, em, bottle dahna - R&Z Handicrafts leh hnang tah hmanga bag chi hrang hrang siam - J.Tei Craft Bag ten an thil siam an pho chhuak a ni.

Ethnic cuisine lamah hian stall pathum - Diana Catering, Zo Foods leh Hill Taste ten an siam a. Hetah hian bal, chhawhchhi, chhangban kan leh chhum, buhban, changkha tauh, behlawi bai, bawngsa rep bawl, thingpui hang leh kurtai te chhawpchhuah a ni. Costume show neih ni bawkin hetah hian Mizoram chhunga hnam hrang hrang chengte incheina pho lan a ni bawk.

Kharna inkhawm Pu Lalzirmawia Chhangte, Art and Culture Secretary kaihhruaiah hian Art & Culture Director Pu R.Hmingthanzuala’n lawmthu sawina hun a hman bakah Programme Coordinator Pu F.Lalthanmawia’n report a pe bawk a ni. ~ DIPR

No comments:

Post a Comment

Post Bottom Ad