Zanin hian Tuaisiala debut music video 'Suangtuahna Neitu' tih chu an tichhuak dawn ta a, YouTube-ah an upload ang. He hla hi Triau Trackx frontman Ramenga produce a ni a, video pawh hi a upload sak nghal dawn a ni. Tuaisiala hi Lawngtlai tleirawl rapper/singer niin, kum 18 mi chauh a la ni a, 'Suangtuahna Neitu' tih hla hi a original a ni a, Mizo rimawi khawvelah a hming kan hriat tanna a ni dawn a, Tuaisiala tih hming hi kan la lam nawn foin a rinawm.
Ramenga chuan Tuaisiala chu a takah a la hmuh bik loh thu leh a zai pawh 'live'-a a la ngaihthlak bik loh thu sawiin, "Kan la intawng bik lo a, a taka a zai pawh ka la ngaihthla lo, mahse, hetia ral khat atanga kan inbiakna atangin ka phurpui a, produce ngei pawh ka duh ta a ni," a ti a, "A music arrange te pawh ka pui hran lo a, a hlathu leh a thluk te pawh ama kutchhuak vek a ni a, keiin ka lo tihchhuah sak a ni mai.
A hla thu leh thlukah chuan a kum tlema a naupanna te chu a lang ve deuh a, a tirah chuan han siamthat chak deuh te pawh ka nei a, mahse, a kum ang ruala ka nih lai ka ngaihtuahin kei aiin a thiam ka ti zawk a, ka khawih danglam ta lo," a ti bawk. Ramenga chuan Tuaisiala chu a kum naupanna te lanna awm ve deuh mah se a tlangpui a lak ralah chuan tha hle a hriat thu sawiin, "A hla flow te a dik riau a, a thluk chikhat atanga a danga a pakai dan, inla lawn vel pawh a nalh thei riau. Ani chu rap tih dawn chuan a melody te a awm ve leh deuh bawk si a, a zai tih dawn a rap deuh reuh ni bawk si a ni a, 'chhamzai' tiin ka dah mai," a ti bawk.
'Suangtuahna Neitu' music video-ah hian Mizo Instagram star Adelide Pach an hmang a, music video hi ama siam vek niin amah a chang nghal. He music video hi smartphone hmanga lak vek niin, phone atanga edit vek a ni bawk a, a changtu Adelide Pach hian amah leh amah a inlak vek bawk a ni a, hetiang music video hi Mizoah chuan a hmasa ber a ni ngei ang.
Post a Comment