CHAWIMAWINA TLÂNGAH ZIRLAI-3 (Self Support Award 2019) - TIMES OF MIZORAM

Home Top Ad

Post Top Ad

CHAWIMAWINA TLÂNGAH ZIRLAI-3 (Self Support Award 2019)

Zirlai ni chunga an zirna senso leh chhungkaw pawimawh tur sum thawk chhuak a, intodelh theite chu kum 20 chuang Student's Self Support Union chuan kumtin an lo chawimawi tawh thin. Kumina Champhai khawpuia SSU General Assembly-ah khan zirlai pathum chawimawi leh an ni a, heng thalai pathum tumruhna leh huaisenna avang hian SSU Assembly na hmuna kalte chu an mittuite a tla hial a, chung mite chanchin chu ZONET - Zoram Kalsiam Programme chuan documentary an siamsak a, he programme hi November ni 12, 2019 (Thawhlehni) zan dar 8-ah ZONET Zawlbûk Channel-ah tihchhuah tum a ni.


Self Support Award dawngtute zinga pahnih hi zirlai ni chunga Vanglaini chanchinbu sema inhlawh an ni a, pakhat hi online hmanga pheikhawk chah a, thawn kual leh thin a ni a, zai leh lamna hmun (karaoke) enkawltu a ni bawk.


Self Support Award dawngtu zing ami Vanlalmalsawmzuali (Sawmtei) tia koh hi Khawhai khua, tuna Pachhunga University College a BA 1st Semester zirlai a ni a, ani hian zing dar 3/4 velah thoin Vanglaini chanchinbu a sem thin. Chanchinbu a sem chungchang a sawinaa mite rilru khawihtu lian tak chu mipa anga a lan theih nana a sam a tan hi a ni. Zing hma tak takah Treasury velah a tei a ngai a, Vanapa Hall leh a chhehvelah drugs addict te an tam thin avangin a hlau a, "Ka sam ka zuah sei a, addict mipaho hian min en duh em em thin a, ka hlau ve thei em em thin. Mihring hi chu kan lan danah hian min hmuh dan tam tak a awm a, ka sam ka tan a, min hmuh dan a dang a. Ka sam sei hi mawi lo ka ti lo bik a ni lo, a tul vang a ni," a ti a, hei hi mite rilru a hneh hle.

Kumina Champhaia Self Support Award dawngtu dang leh mipa awmchhun chu Richard Lalhmangaihzuala, Saikhamakawn, Aizawl, tuna Govt. JL Higher Secondary School, Aizawl a Class-XII zirlai hi a ni. Richard-a hi chhungkaw harsa tak an nih avangin a chhungte pawhin a zirna chawlhsan tura an lo tih hial tawh a ni nghe nghe. Mahse, hna tul tul thawka a zirna chhunzawm chu a thlang tlat a. Tunah hian Saikhamakawnah Vanglaini chanchinbu a sem a, khaw thenkhatah a thawn bawk thin. Puan thui a thiam a, Chess a thiam bawk avangin naupangte a zirtir bawk thin. Self Support Award a dawnna chhan pui ber chu Vanglaini chanchinbu sem bâkah AMC hnuaiah Thawhtanni leh Inrinniah bawlhhlawh paihin a inhlawh thin. A dinhmun khirhziate a hriatin a zirlaipui, lehkha zirna hun thawl leh tha neite chuan taima takin zir se a duhsakzia pawh a sawi hial a ni.


SSU in zirlai mahni intodelh an chawimawi dang leh chu Veronica Lalthanzuali, Zotlang, Aizawl, tuna Govt. Aizawl College, a IIIrd Semester BA zirlai a ni. Veronica-i hian tunlai thiamna chu tangkai takin a hmang a, online in pheikhawk an chah thleng a, heng pheikhawkte hi Mizoram hmun hrang hrang mai ni lo, India ram khawpui lian zawk thlengin an thawn thin. Hei mai hi a ni lo, a sum khawlte leh a nu leh pate pawisa a puk hmangin Aizawlah zai leh lama intihhlimna (karaoke) a din a, chu chu College kal pahin a vil a, a thawk kawp thin. A lehkha zir tibuai lo turin a invawng tlat a, a nu leh pa pawisa a puk pawh a rul leh hial bawk. Chutiang khawpa hmeichhe tumruh leh huaisen chuan chawimawina a khum tan ta.

Heng mite hi zirlai mahni intodelh pawl tia hriat lar SSU Gen Hqrs chuan tunhnaia Champhaia Assembly an neihnaah an chawimawi a, zirlai tam tak chawimawi tur zinga an thlan chhuahte an ni. An chanchin ngaihthlak lai hian a puangtute hnuk a ulh a, zirlai kal khawmte zingah mittui tla tam tak an awm hial a ni!

By : Lalnunṭawma Fanai, Zoram Kalsiam Prog.

No comments:

Post a Comment

Post Bottom Ad