Hmeichhe man Rs-420 ațanga 20 an kir chhan - TIMES OF MIZORAM

Home Top Ad

Post Top Ad

Hmeichhe man Rs-420 ațanga 20 an kir chhan

Hmeichhe man Rs-420 ațanga 20 an kir chhan (Hre famkim lo leh Nupui man ba ral kan awm takin)


man leh mualTunlai hian Țhutphah awmzia hrelo hi kan tam khawp mai, Inneihna a Hmeichhe man hi Rs 420/- a ni a. (Hei hian Bungrua anga man neihna lam a kawk lova, chhûngkaw 2 te inchhûngkhatna thuthlung nemnghehna a entir a ni.) 

Tunlai in hmeichhe man sân rawt ching an awm. (Mihring hi Bungraw hralh a hralh chi anni lo. Hlutna chhut chhuah theih loh khawpa hlu anni. Inhralh satliah chi a ni lo.)

Tunlai tihdan ah chuan "Rs. 20/- hi țhutphah atan kan kir leh e" tiin man dawngtu ten palaite an kir țhin. Țhutphah hlutna leh an kir chhan hre lo hi a tam zawk kan nih ka ring. Kan Mizo Pi leh pute kha mifing, thuhnu dáwn zet mai an lo ni a, an ngaihtuahna thui zia hi ka ngaihtuah fo țhin.

Ṭhutphah hian a tum dik tak chu, Mi kan in ang lova, misual tak tak nupuite kutthlak ching an awm țhin. Nupuite, 'Ka tâ a nia, a man ka pe a lawm' ti a, sawisak leh sal chhawr a chhawr ching te awm theih a ni bawk. 'Ka nupui a nia, ka thu thu' ti a ti rethei te an awm thei tih hria in hetiang laka inven nan hian mizo upa te chuan Ṭhutphah hi an lo pe kir ṭhin a ni.

A chunga kan sawi ang khian mi in a nupui lo ti rethei viau sela, 'Ka nupui a nia, ka thu thu, in lo sawi ve tur a awm lo tiin Court-ah te hial ṭan lo khawh ta se, hmeichhe chhungten, 'Ekhai! mai mai a! Aman i la tlâk hleinem. Ṭhutphah kan kir che a lawm, chuvangin kan nau hi, a thlavang kan hauh thei a, kan tâ a la ni ve e, Chuvangin hetianga i tih mai mai hi kan remti love.' An la tih theih nan Ṭhutphah hi kir ṭhin a ni.

Țhutphah hi Rs 20/- kher tur tihna a ni lova, 400 bâka a chuang hi an kir mai țhin a ni.

Tin, man leh mual thu a Mizo dân lo ropui zia hi zir fe tham a awm. 

Mizo te tluka hmeichhe dinhmun dah pawimawh a, an derdepna leh chak lo zawk anni tih hria a, zahthiam hnam hi an tam lo khawp ang. Hetia Ṭhutphah kirleh hi engtia tihzel tur nge tih laite hi a pawimawh a sin! Thutphah hi neih hlen veng veng emaw, lo ngaihthah ngawt chi a ni lo.

Nupa chu man leh mual inhlan felin fanau te an han nei a, fanu 2/3 te neiin a fanu te zawng zawngin pasal an neih zawh vek hnu ah, "Khai le! Ka nupui man bâ ka tlâk thei ta" tiin, a pu-zawnte hnenah Ṭhutphah hi a pe tlak tur a ni. Fanu nei lovin man an tlâk thei ngai lo tih hriat a pawimawh bawk.

Mizo Inneih man leh muala, Ṭhutphah pawimawh zia leh a hlutna te hrechiang in, hmang țangkai thar zel ila a țha hle ang.

Nupui te man bâ ral ta mai mai hi kan tam awm a sin maw le.

By: Ja

No comments:

Post a Comment

Post Bottom Ad